متمردتي المطلقة

🩸متمردتي المطلقة🩸

بقلمي: اريا ستارك

😷الحلقة الرابعة عشر: بين الشوق والنسيان 😷

متمردتي: 5

بعد مرور الأسبوع التاني حنان يالاه فايقة بزز كتحس براسها مطحطحة وقفات مشات ديريكت كوزينة دارت قرنفل يتبخ واستنشقات لبخار مزيان، خدات لما ديالو وصيبات بيه اتاي هزات عصير ديال ليمون تاهو مع حبة ديال فيتامين c وحبة أخرى ديال زنگ حطاتهم فبلاطو مع قرعة لما، باريزيان لي سخنات وفرماج، وهزات لماسك ديالها ودارت ليگات حتى هوما ومشات لبيت عادل حلاتو وحطات ليه بلاطو وهزات لاخر مسخ يالاه غاتخرج وقفها كلامو...
عادل بصوت عيان: راسك قاصح بزااااف قلت لك سيري عند راجلك غاتعاداي مني..
حنان وقفات شوية هزات راسها فيه متكي فسريرو وداير لماسك ديالو: فطر وسكت شوية... أنا غانخرج نتقدى ونرجع دغيا
عادل ماعرف اشنو يقول وعارف راسو مايقدرش يخرج دار تيست ولقاه بوزيتيف كورونا ومن لي عرف وهو فبيتو وحنان كتعاونو عل أقل فماكلة ودوا كان اكفس فلأول دابا بدا كيتحسن شوية، وهي داخلها شك بلعيا لي فيها دكشي علاش لفيتامينات كتشربهم معاه كل نهار وعاد ديما قرنفل ولماكلة صحية عل اقل حتى يوليو بزوجهم لباس عليهم...
دخلات هزات جاكيط يالاه شراتها من أنترنيت لاحتها فوق من تيشورط لي لابسة وهزات سبرديلتها ومعقم ماسكها باقي فوجهها..
بقات كتسنى حتى سالات كلشي لي كين فدار من لماكلة وتقدية عاد قررات ضروري تخرج تجيب تقضية ديال شي زوج سيمانات، عادل خلا ليها كارط ديالو واخا عندها كارطة ديالها في جوا ديال تيليفون، عقلات على طريق كيما شرح ليها عادل وفجيبها كاين لادريس من لي تكون راجعة تاخد uber خرجات غادة وحاضية راسها، خرجات من دار غادة وحاضية راسها... هاد لبلاصة فيها لعرب بزاف حادرة راسها وصلات لسوبرماركت يالاه غادخل حسات بدوخة وقفات وتكات على لحيط كتستارح، بلخلعة من فيروس مابقاتش كتنعس وجهدات راسها اكتر من لقياس، غمضات عينيها بسباب ضبابة لي برزطاتها، حتى تحطو يدين على دراعها هزوها قبل ماطيح، بغات تهرب من ليدين دفعات كتبعد عاد مزادو كرزو عليها: حنان حنااان !!!
سمعات صوت بعيد مقدراتش تستوعب اش كيقول حلات عينيها غير ضبابة لي كتبان ليها، هاد لمرة مقدراتش تقوم بحال حسات براحة دابا تقدر تنعس ستسلمات وترخات...

                             *****************

من لي شافها من طوموبيل ماتيقش راسو عرفها غير من هيئتها خرج ردخ بابو وغادي لجيهتها محاسش براسو ملابسش ماسك عينيه غير عليها من لي شافها كتمايل زرب بخطواتو لعندها، ومن لي تكات على لحيط ولاحظ كيف جسمها كيتحرك بحال واقفة على حافة لإغماء.. هنا بدا كيجري حتى لقا راسو قدامها وجهها لي ديما كلو حياة ودفء كيبان بيض حتى من شفايفها عينيها كتحاول تحلهم ولكن بدون جدوى..
رائد: حنان مالك؟؟ اش بيك؟؟ حنااان حناااان؟!!!
حط يدو على وجهها لقاها سخونة بزاف شوية ترخات بين يديه حط دراعو تحت ركابيها وهزها فحضنو توحشها لدرجة غير وجودها حداه خلاه هادئ حتى يعرف اشنو واقع ليها...
وصل لصبيطار مخلوع خايف لاتكون فيها فيروس فعلا من لي وصلات عاملوها بحال فعلا فيها فيروس، دارو ليها تيست سريع لي كياخد غير ساعات قلااال.
تلاتة سوايع كيتسنى برا خرجات عندو اخيرا لفرملية وقفات بعيدة عليه: نتا عادل؟
رائد عاد تعصب اكتر من لي سمع سميتو: لا ولكن انا راجلها
لفرملية بتاسمات: لمريضة عندها نقص فتغذية وإرهاق تيست كوفيد خرج سلبي، ولكن خاصها تاكل مزيان وتنعس مترهقش راسها عل اقل لمدة تلت يام..
رائد: اوك ممكن نخرجها دابا؟؟
لفرملية وراتو فين يمشي يسني لوراق باش يخرجها، جاب طوموبيلتو قدام لباب وعاد دخل خرجها.