👑 حسناء الآغا 👑

|| الحلقة 2 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
———————————————
lI الحلقة 2 Il
رجعت بيها ذاكرتها للنهار لي تعرفت عليه ...
- فلاش باك -
كانت قاعدة فصالون لكبير لي يتمركز فوسط القصر لي عندهم .. طاوية رجلها و حاطة فوقهم كراس اوراقو بيوضة .. هازة فيدها قلم .. و ترسم على الكراس .. شعرها كان مطلوق و خصلات منو كانو طايحين على وجها .. هزت يدها و رجعت شعرها مور وذنها .. طلعت راسها و خزرت لسقف الصالون و غمضت عينها تتخايل فالمنظر لي قاعدة ترسم فيه .. تبسمت تبسيمة خفيفة وقت جات فبالها فكرة تزيدها للمنظر لي قاعدة ترسم فيه .. و هي هكاك و قبل ما تحل عينها .. صوت الرصاص ملا الدنيا .. قامت مبلاصتها مفجوعة ..
بدا الرصاص يخترق فالزجاج و رجع صوت الزجاج المكسر معبي الدنيا .. بين لحظة و لحظة قامت الحالة .. حبطت للرض و غطات راسها بيدها .. تعباو عينها بالدموع .. بدات تحبي حتا وصلت لعند طابلة تاع حديد و دخلت تحتها .. فاللحظة هاديك تفكرت بنت خوها لي كانت تلعب فالجاردان .. بلا متحس وقفت تجري من بلاصتها ماهمها لا الرصاص لا والو ، صورة ياسمين و هي تلعب فالجاردان كانت بين عينها لي معبيين بالدموع ..
وصلت عند الباب .. غير فتحتها قابلتها ياسمين فحضن البوديقارد و خوها لي كان فوسط الاشتباك هاز سلاح بيديه فيزوج و قاعد يتيري و يقتل فيهم بالواحد .. كانت راح تخطي خطوة للخارج اما حست بيد حاوطت خصرها .. و يد الثانية تحطت على فمها .. و جبدها للداخل و غلق الباب .. جسمها رعش بين يديه .. عينيها تحلو على وسعهم .. للحظة فكرت انهم قاعدين يخطفو فيها .. و مخيلتها رسمتلها افكار خايبة .. بدات تتحرك و تحاول تفلت من يديه اما مقدرتش .. وقفها عن حركتها صوتو الرجولي ..
معاد : حبسي الحركة و نفكك ..
هزتلو حسناء براسها بمعنى ايه .. رجع هدر معاها بصوت حنين يحاول يلعب بمشاعرها ..
معاد : ردي بالك تحاولي تعيطي .. راح نقولك زوج كلمات و نروح ..
هزتلو براسها بمعنى موافقة .. طلقها و نحا يدو من فمها .. دارت ليه بسرعة و شافتو .. بهتت فزينو .. غرقت فعينيه من الثانية الاولى لي شافتو اما تمتم اتداركت الوضع و عدلت روحها ..
شافها كي دارت ليه ، خصلات من شعرها كانو مغطيين وجها و شوية منهم كان يطاير معا انفاسها المتسارعة .. صدرها يطلع و يهبط بقوة .. يدها فيهم رعشة خفيفة .. ثبت عينيه فعينها و شافها كيفاه خزرت فيه و حس عليها بلي غاست فيه .. تبسم تبسيمة خفيفة على جنب كأنو وصل للي كان حاب عليه بوقت قصير و اقصر من لي كان يتوقع .. هدر معاها قبل ما تهدر معاه ..
معاد : صلح العشيرتين راهو فيدك ..
ترسمو فوجها ملامح الاستفهام و نطقت ..
حسناء : مفهمتكش واش تقصد ..
معاد : انا معاد من عشيرة شعابني ..
عينيها تحلو على وسعهم معا كلمتو الاخيرة .. تعرف هاد الاسم .. كيفاه متعرفوش و الشخص لي قدامها مالعشيرة المتخاصمة معا عشيرتهم و بينهم ثأر دم ليومنا هذا متقفلش .. هدرت مترددة و خاايفة فنفس الوقت ..
حسناء : و وااش جابك هنا ..
حس على خوفها اما حاول يطمنها باش يربحها فصفو ..
معاد : متخافيش مني .. جيت لهنا باش نحذر خوك مالهجوم تاع عشيرتنا اما سبقوني .. عندي مدة وانا نحاول نصلح بيناتهم اما مقدرتش محتاج شخص من عشيرة آل ضافر يعاوني و ملقيتك كان انتي ..
خزرت فيه مصدومة تحاول تستوعب واش قاعد يقول .. هي واش دخلها هي طفلة متقدرش تخدم خدمة الرجال و لوكان يسمع بيها خوها الاغا يشرب من دمها .. قطع تفكيرها صوت خوها يفتح فالباب و يعيط بأسمها خايف عليها .. صحيح انو قتلو عدد كبير منهم و الباقي انسحبوا اما خايف يكونو وصلو لداخل الدار ..
قرب ليها بسرعة .. جبدها ليه و همس فوذنها ..
معاد : كلش راهو بين يديك الا حابة الآغا ( خوها ) ميموتش و يبقى طول لعمر معاك عاونيني ..
و بعد عليها بسرعة متوجه للتاقة لي دخل منها .. نسمة باردة تعدات عليها وقت لي بعد خلات الرعشة تسري فبدنها.. عينيها بقاو مركزين فالتاقة لي خرج منها و صوت همسو قاعد يتعاود فوذنها ....
#ليلوشة
———————————————
اوبالاتي 💜
واش رايكم فالاحداث لحد الآن .. نظن فهمتو جزء من حكاية معاد .. زعما هو بطلنا ولا كاين دخيييل .. احم الحااجة لي توقعتوها اكتبوهالي فالرد تاع هاد الحلقة نحب نقرا تخمامكم و وين وصلوكم الاحداث .. ❤
متنسااوش تخلو جاام باش تشجعوني نكتب اكثر
و خلووو كومنتار واحد هنا فتعليق باش نجمجملكم عليه و تعرفو بلي حطييييت 😍🔥🔥🔥
#ليلوشة
ملاحظة : فالواتباد نحط كل يوم حلقتين لانو مزالها قيد الكتابة فالقروب فالفايسبوك