👑 حسناء الآغا 👑

|| الحلقة 9 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 9 Il
هيثم : لالا مدينا للناس كلمة .. نهار الجمعة عرسي مكاش تأجيل يعني بعد 4 ايام بالضبط.. راح يصرا تغيير صغير برك اومبعد نقولهولكم ..
و تبسم بخبث .. خطة انتقامو راح تبدا ..
راجل : حاضر آغا ..
راح الراجل و هيثم عدا يدو على لحيتو .. حركة يعملها وقت يكون يفكر فعفسة جدية .. و راح لمكتبو يحاول يشغل روحو باش ميتفكرش وفاة خوه ..
اما يماه زهرة .. كانت قاعدة معا نسا عمومو .. يصبرو فيها و تحكيلكم كيفاه مات معاد .. اما محكاتلهمش بلي حاول يغتصب حسناء للاسف .. حكات برك واش حبت هي .. و هاكا تكون العداوة بين العشيرتين زادت ..
نرجعو لعند جابر و سمر .. بعد ما وصلو لعند باب الاسطبل منعوهم الحراس مالدخول ..
الحارس : سي سلمان منع اي واحد يدخل ..
تبسم جابر بإستهزاء على جنب و قدم عند الحارس لي هدر .. وقف مقابل وجهو سواسوا .. ركز عينو فعينيه و خزر فيه بخزرة عصب .. و هدر بصوت كلو هدوء ..
جابر : تعرف شكون انا ..
خاف الحارس مرجعلوش .. حبط راسو ..
جابر : قلت لر** تعرف شكون انا ..
هزلو براسو بمعنى لالا ..
جابر : انا آغا هاد العشيرة .. و اخ الطفلة لي راك تحرس فيها ..
طلع راسو مصدوم .. الخوف باين على وجهو .. هدر بتردد ..
الحارس : اسف آغا معرفتكش .. جيت نخدم جديد ..
بعدلو مالباب باش يدخل ..
خبطو جابر زوج خبطات على كتفو كأنو يهدد فيه بأنها اخر غلطة ..
جابر : ادخلي سمر انا نبقا هنا ..
مقدرتش تهدر مالبكا هزتلو براسها بمعنى ايه برك ..
دخلت لتما .. شافتها قاعدة فزاوية .. ضامة رجلها لصدرها و تخزر فالفراغ .. و عينيها معبيين بالدموع لمعتهم زادت بينت لون عينها .. نيفها كان احمر مالبكا .. وجها مخبوش شوية ..
تقدمت ليها سمر بلعقل و تعيط بأسمها ..
سمر : حسناء .. حسناء ..
اما حسناء كانت فعالم وحدوخر .. مسمعتهاش اصلا ..
وصلت سمر لعندها .. قربت يدها بلعقل منها و حطتهم على كتافها .. فهاديك الدقيقة رجعت حسناء لعالمنا .. جسمها رعش .. بعدت على يد سمر تلقائيا .. طلعت راسها و خزرت فيها .. و هدرت بصوت غالب عليها لبكا ..
حسناء : سمر .. و طرطقت بالبكا .. كأنو كانت تسنا شخص يخزر فيها نفس خزرت سمر .. شخص يواسيها بعينيه برك ..
قدمت ليها سمر و عنقتها على قد ما تقدر ..
سمر : متبكييش يا روحي .. واش صرا .. واش راهم يهدرو كيفاه راح يقتلوك ..
تقطع صوت حسناء ضربة وحدة .. تصدمت .. لهاد الدرجة هي رخيسة عندهم .. محاولوش حتا يسمعو لحكاية منها ..
حسناء : يقتلووني ؟؟ مدرت والو يا سمر ولله ما درت والو .. هو هو ...
سمر : شكون هو ..
حسناء : معاد شعابني ..
سمر مصدومة : واااش داك ليهم يا حسنااء ..
حبطت راسها بضعف و بدات تحكيلها لحكاية من الاول للاخير ..
سمر : كلب .. حيوان .. مرخس .. دوك نحكي لجابر اكيد مراح يديرولك والو ..
قبل ما تكمل هدرتها سمعت صوت سلمان يعيط برا ..
سلمان : خرجوووها خرجوووها ..
دخلو الحراس يرفدوها .. حاولت سمر تمنعهم .. قد ما جربت ماقدرتش .. جابر مكانش معاهم قرر ميشوفش موت اختو و راح للجبل قعد تما وحدو..
كملت سمر تحاول تفكها منهم بصح طبعوها .. خبطت راسها و فقدت وعيها ..
خرجو حسناء لوسط ساحة .. وين كانو مجتمعين كبار العشيرة .. يهدرو بيناتهم و كل واحد واش يقول عليها و هي تحاول متسمعش هدرتهم ..
عندهم فعاداتهم و تقاليدهم .. تقعد ساعتين تحت الشمس بعدها يقتلوها .. كأنو نوع من انواع التعذيب ..
جازت ساعة .. و بدا العد التنازلي لتنفيذ حكمها ..
تعدات هاديك الساعة زادة و جا سلمان هاز فيدو سلاحو و متوجه ليها .. وقف عندها و حط سلاحو عند راسها سواسوا ..
حسناء : يا بابا راك ضالمني مادرت والو .. يا بابا متعاودش الغلطة مرتين يا بابا ..
سلمان : شهدي ..
استسلمت لمصيرها .. شهدت و هو يخزر فيها و مرفلو جفن .. كان راح يضغط على زناد اما وقفو صووت رصاصة طلعت فالهوا .. و صوت يقول : حبسسسس ....
#ليلوشة
—————————————————
اوبالاتي 🔥
راني بينتلكم شوية احداث ههههه .. بطلنا المغوااار شكووون .. و وشمن تغيير هدر عليه هيثم على العرس .. و واش راح يصرا فحسناء ..
خلولي توقعاتكم طواااال عراااض و جلو كومنتار غير نحط نجمجملكم على تعليقاتكم ..
#ليلوشة