👑 حسناء الآغا 👑

|| الحلقة 100 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 100 Il
الممرضة : المدام حسناء صراتلها صدمة ( كريز) حاليا .. محتاجين شخص من عايلتها يوقف هنا معانا ..
حس سطل ما تكب عليه .. جسمو برد ضربة وحدة .. وجيعة قوية يحس فيها فقلبو .. ندم لي بعد عليها .. ندم لي خلاها .. كأنها حست انو عاود فتح على حيزية .. هدر بهدوء ..
هيثم : ر راهي حية !!
الممرضة : ايه اما حالتها حرجة من فضلك متتأخرش ..
قصت عليه الاتصال .. نرخات يدو لدرجة انو تيليفون جاه ثقيل و طاح من يدو .. طاح هو موراه قاعد فدروج .. حط راسو بين يديه يحاول يفطن روحو .. يحاول يقنع روحو انها ممكن تعيش .. خزر فالبلاصة لي طاحت فيها و نعل النهار لي خرج و خلاها مريضة هكاك ..
بعد مدة قصيرة فاق على روحو .. حسناء محتاجتو و حتا هو يمكن راه محتاجها اكثر منها ..
ناض و بدا يمشي بخطوات متسارعة حتا رجع يجري .. فتح باب القصر و خرج منها و خلاها مفتوحة .. ركب فسيارتو و طار للمستشفى ...
فبلاصة وحدوخرا و بضبط فبالكون تاع غرفة .. كان الهدوء .. هاز فيدو كاس قهوة .. صدرو عريان و لابس شورت برك .. شعرو داخل فبعضاه .. ملامح النوم بارزين على وجهو .. دار خزر للسرير لقا وحدة من قح**** راقدة تما .. تبسم على جنب و رجع دار يخزر فجاردان و مستمتع بالجو .. قص على هدوءو صوت التيليفون ..
محمد : الو وي ..
الراجل : فريتها آغا انا مانيش متأكدة انها تموت .. محقنتهاش كامل لانو دخلت الممرضة اما حاليا دخلت كريز و راهم كامل عندها ..
تبسم بشر .. نظرتو لمعت .. هدر و الابتسامة على وجهو ..
محمد : حتا الا مماتتش دبر راسك كيفاه تقتلها بلا متبين خلي نحرقلو قلبو بعدها نقتلو ..
الراجل : حاضر آغا ..
محمد : و هيثم جا ولا مزال ..
الراجل : عيطتلو الممرضة راه فطريقو لهنا ..
ضحك بصوت و رجع هدر بملامح باردة ..
محمد : حظ موفق ..
و قص عليه الاتصال .. دخل يدو فالجيب تاع الشورت و كمل الاستمتاع بالمناظر كأنو ما صرا شي .. ( نعشق ليبسيكوبات انا حق ربي .. ) ..
بعد خمس دقايق هكاك .. دخل للغرفة .. لقاها مزالها راقدة ..
محمد : اي نتي نوضي اخرجي منا ..
مرجعتلوش قعدت راقدة .. قوى صوتو اكثر ..
محمد : اييي نتي ..
ناضت مفزوعة تخزر يمين و يسار .. بعدها خزرت فيه هزتلو براسها بمعنى ايه و خرجت ..
راح للمرايا .. خزر فروحو .. غرروا مش نورمال .. تبسم تبسيمة خفيفة .. ظهرت معاها الفوسات وسط لحيتو .. ( متسبونيش بصح حبيت محمد .. ) و هدر بينو و بين روحو ..
محمد : جايك لحساب يا هيثم .. هادا مصير كل واحد يوقف فوجهي ..
هز لفوطة تاعو و دخل يعمل دوش ..
بعد ما وصل هيثم للسبيطار .. هبط من سيارتو غلقها و دخل يجري .. حايب يوصل و يشوفها و فنفس الوقت خايف يوصل و يقولولو ماتت .. مش متحمل تجيه صدمة وحدوخرا ..
لحق قريب لغرفتها كانت كاينة حركة كبيرة .. باب غرفتها مفتوحة و الطبة و الممرضين داخلين خارجين .. شي لي زاد عليه .. رجعت يدو ترعش .. شواربو رجعو صفورة كأنو قطرة دم مافيهم .. قرب للباب اكثر ..
و وقف يخزر فيه يديرولها جهاز الصدمات .. ريقو نشف .. لي كان خايف يشوفو شافو ..
شاف طبيب كيفاه حبس .. و استقر فوذنو صوت الماشينة .. تيييييييييييييييت ...
#ليلوشة
—————————————————
اوبالاتي 💜
ملخر محمد كلب بصح حبيتو بسيكوبات زل ههههه فرايكم وااش راح يصرا لحسنااء .. و هيثم واش راح يدير لمحمد لوكان يفيق بيه و حيزية اللسقة كييفاه مصيرها ..
حطووولي توقعاتكم طوال عراض .. غدوة نكملو خلاص انا عييت و نعست تصبحوو بخييير
#ليلوشة