👑 حسناء الآغا 👑

|| الحلقة 47 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 47 Il
طاحت عينو فعين حبيبتو .. عينيه لمعو .. تبسيمة عريضة ترسمت على فمو .. دقات قلبو تسارعوا ..
وقت شافتو بهت فيها هكاك الرعشة سرات فجسمها .. حتا هو كان يهبل .. بقا يخزر فيها و هدر بصوت مبحوح شبه مسموع ..
هيثم : سبحان الله لي حط الكون فعينيك .. ( تقشيييرة انا ، حبة بيطراف ) ..
تبسمت تبسيمة صغيرة لانو سمعاتو واش قال .. كان راح يكمل يهدر اما فيقو من عالمو جابر وقت قدم ليهم و هدر ..
جابر : مزال باش تروحو ..
هدر هيثم و هو يخزر فحسناء منخاش عينو منها حتا حشمت ..
هيثم : رانا رايحين ..
مدلها يدو هيثم .. قعدت تخزر فيها .. ترددت الا تشدو ولا لالا .. اما تفكرت انو خلاص راهو راجلها عادي تشدو قدامهم ..
تحطت يدها فوق يدو و رجع قلبهم لزوج يخبط بنفس الوتيرة كأنو عندهم قلب واحد ..
تقلبت الدنيا بالبارود و صوت الرصاص .. مشا جيهة الطونوبيل و هو مزير على يدها خايف تروح منو على عكس حيزية لي طلقها و هرب منها ..
يمشي لطونوبيل و هو متبسم .. نسا بلي بعد لحظات راح تقوم القيامة و تتقلب الدنيا عليه سواءا من عايلتو ولا من عايلة حيزية ..
ركبو كلهم فطونوبيلاتهم .. و حسناء ركبت ملور و ركبت معاها سمر و سلمان باباها ..
قلع الكورتاج معا صوت الزرنة و الرصاص ..
وقف عند باب القصر .. يشوف فيهم يبعدو و كل ما يبعدوا قلبو يحرق .. عينيه حمووورة.. شعرو داخل فبعضاه .. الدموع خاديين طريقهم على خدودو .. زير على قبضة يدو و هدر و هو لاز على سنيه ..
اسماعيل : راح نتواجهوا ..
راح للاسطبل .. رفد حصان .. و راح موراهم بسرعة يحاول يلحقهم .. اما للاسف لحصان لي داه كان متصاوب و مكانش يجري مليح ..
الحالة مقلبة بالشطيح .. كلهم زاهيين و فرحانين .. حيزية بعد ما كملت شطيح رجعت لبلاصتها اما ملقاتش هيثم تما .. لتفتت براسها ملقاتوش ..
حيزية : ماما زهرة .. ماما زهرة ..
زهرة : انعم بنتي وشبيك ..
حيزية : هيثم وين راح وين راهو ..
زهرة : يمكن يكون معا الرجال بنتي ..
حيزية : ماقاليش بلي راهو رايح ..
زهرة : اما يا بنتي نتي كنتي تشطحي و اكيد مراحش يقعد معا نسا ..
حيزية : ايه صح هههههه .. و ضحكت معاها ..
راحو كملو شطيحهم و حيزية تحوس عليه بعينيها .. وصل الوقت باش يديرولها الحنة و من المفروض عندهم انو يديرولها الحنة و راجلها يكير الطبسي لي خلطو فيه الحنة .. ( خرطتها من راسي هاد العادة ههههه اقراو و خلاص ..)
سكتت ال٩الة و بداو لعجاير يبرحو و يديرولها فالحنة و نسا يزغرتو .. كملو دارولها الحنة و لحق الوقت باش هيثم يكسر الطبسي تاعها .. اما مكاشو .. حوسو عليه اما ملقاوهش .. سقساو صالح ..
صالح : قالي انو راح يجيب حاجة تخصو و يجي ..
ملحقش كمل هدرتو .. بداو يسمعو صوت الزرنة يقرب .. و البارود يضرب و صوت طونوبيلات يصونيو ..
حبزية تبسمت و هدرت ..
حيزية : اوو مزال مخلاصوش المعازيم اكيد راح يجيبهم ..
وصلو تما فالقصر .. سمر ديجا شمت اللوش و حيت لحاجة ماشي طببعية كي شافت طونوبيلات بزاف برا ..
جابر تبسم متشوق يشوف كيفاه راح يدير و فنفس الوقت خايف من ردة فعل حسناء ..
وصلو قاراو طونوبيلات .. كلهم قاعدين يشوفو فيه كيفاش حبط مالطونوبيل .. وقفت حيزية فنص الساحة تخزر تسنا تشوف شكون راح يحبط .. راح لجيهة باب حسناء .. و فتحها .. اما سمر و هدية حبطو هوما لولين مصدومين يشوفو فحيزية .. حبطت حسناء مطونوبيل و هي شادة فيد هيثم حشمانة .. و محبطة راسها .. حست بهدوء غير عادي .. حيزية الابتسامة تمحات من وجها .. رجع قلبها يدق بالقاوي و وجها اصفر وقت لي شافت عروسة وحدوخرا شادة راجلها ..
حسناء خطات خطوة بعيدة على الطونوبيل و طلعت راسها .. و طاحت عينيها فعين حيزية ديراكت ..
#ليلوشة
—————————————————
اوبالاتي 💙
اللقاء الاسطوري جا .. حطولي توقعاااتكم .. و سمااعيل متنساوهش و الله يستركم متقعدوش تقولولي كملي بسك كي نكتب نحط بلا متقولولي نتوما و كي نكون قاعدة راح نكتب كي منحطش معنتها راني مشغولة بكل بساطة
#ليلوشة