👑 حسناء الآغا 👑

|| الحلقة 112 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 112 Il
خرج بسرعة .. راح لمكتبو .. رفدو الذرع الواقي للرصاص لبسو .. غير صباحو و لبس gوداص .. حط على صدرو سلسلة تاع رصاص .. هز فيدو مسدس مالنوع لكبار .. تأكد من انو معدل .. حط لونات تاعو و خرج بكل هيبة .. كان يمشي بسرعة و صوت الرصاص لي فسلسلة يعمل حس .. كان يبان من القوات الخاصة..
لقا رجالو كامل جاهزين .. كانو كأنهم جيش .. هدر بصوت عالي ..
هيثم : هدفنا الاول انو نبعدوهم على الارض و اعملوا لي تقدرو عليه .. اتقسموا لفرقتين فريق يطفي النار و الاخر يروح مور رجال محمد ..
الرجال : مفهوم ..
رجع هدر و هاد الخطرة كان لاز على كل حرف يخرج من فمو .. و نظرتو تحولت لنظرة غضب ..
هيثم : محمد خلوهولي ليا ..
و راح يمشي بسرعة باتجاه طونوبيلتو و رجالو موراه .. ركبو سياراتهم و طارو بقوة .. كانو سيارات بزاف لدرجة انو خلاو اهل العشيرة يترعبو ..
كان هاز دخان فيدو و راكب فطونوبيلتو يسنا الخبر يوصلو .. حتا لحقو الاتصال لي كان يسنا فيه ..
محمد : الو ..
الراجل : آغا قلعو ..
محمد : رانا جايين .. اتصرفوا معا الحراس لي تما ..
تبسم و شعل طونوبيلتو .. نص رجال لي كانو معاه شعلو طونوبيلاتهم .. و طارو هوما زادة بسياراتهم ..
بعد ما كملت سمر و هدية جهزو روحهم .. رجعت راحت عند جابر لقاتو مزالو يخدم .. حطت يدها على وسطها و هدرت ..
سمر : مزال باش نروحو ..
جابر : اسف لتيت بالورق .. مديلي نص ساعة نعمل دوش خفيف و نجي ..
سمر : حاضر رانا نسناوك انا و ماما فصالون ..
راحت رجعت قعدت معا هدية فصالون و هو طلع يعمل دوش ..
بعد شي خمسة و ربعين دقيقة وصلو للارض هاديك .. غير وصل هيثم و رجالو رجال محمد ركبو فسياراتهم و قلعو هاربين .. تقسمو رجال هيثم كيما وصاهم .. نص راحو مور رجال محمد يحاولوا يحكموهم .. و رصاص عامل حالة .. و نص لي قعد معاهم هيثم حبطو يحاولوا يطفو النار ..
كانت الحالة كارثية .. سلاح محطوط تما و كان معبي برصاص و كي يسخن يرجع يتيري وحدو .. و البارود كان يطرطق كيف القنابل ..
بداو يطفو فيها و تصاوب شحال من واحد برصاص لي كان يتطلق وحدو ..
و هو هكاك يطفي نسا امر محمد كامل .. حتا صونا تيليفونو .. معا لول مسمعوش ..
رجع رن مرة ثانية و سمعو .. هز بلا ميشوف الرقم و هدر بصوت عالي ..
هيثم : الو شكون ..
رجع هدر محمد و هو قاعد فمكتب فوق الكرسي و يدور بيه ..
محمد : مضنيتكش غبي لهاد الدرجة و ضحك ..
من ضحكتو هيثم عرفو .. حط من يدو و بعد على الحس و هدر ..
هيثم : خفت تجي تواجهني ..
محمد : لالا جيت اما نتا لي رحت..
هيثم : مفهمتش ..
محمد : عارف وين راني .. ههه راني فمكتبك و عند كرسي هايل راك عارف ..
تخطف لونو ضربة وحدة .. راحت من بالو انو ممكن يستدرجو .. رجع لونو صفر .. قلبو رجع يدق بقوة .. هدر بلا ميحس ..
هيثم: حسناء....
#ليلوشة
—————————————————
اوبالاتي 💜
فهمتووو محمد واااش دااار.. صراحة انا حبيتو هههه مهم حطوولي تشو توقعاتكم واش راح يدير هيثم و حسنااء فرايكم واش راح يصرا فيها و محمد راح يخطفها و يهرب ولا وشنو ..
اسناو نكتب لي موراها و نجي نحطها
#ليلوشة