👑 حسناء الآغا 👑

|| الحلقة 115 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 115 Il
كانت قاعدة زهرة قدامها تشوف فيها كيفاه بدات تتحرك .. اما عينها بقاو مغمضين .. حتا حبست و حبس جسمها على الحركة .. قدمت ليها شوية .. حتا تفتحو عينين حسناء و تنفست بقوة كأنو كانت مخنوقة و محرومة من النفس لوقت طوييل ..
زهرة بقات فبلاصتها متحركتش مالخلعة .. مكانتش متوقعة تنوض .. حسناء بقات فوضعيتها تخزر و مكسلة ...
نروحو عند هيثم و جابر .. بعد ما جبدو لجيهة منعزلة عليهم .. هدر هيثم و بدا يحكي لجابر لي صرا ..
هيثم : معاد تفاهم معا هادا لي اسمو محمد باش يقتلوني و يرجع معاد هو الاغا و محمد يقدر يفوت سلاح لعشيرتنا و تكبر افعالو و خدمتو و كي لقاوك نتا عدوي لكبير استغلوا هاد الشي باش يخلوك تقتلني و يتهناو .. دارو هجوم على اساس انو نتوما راح تهجمو علينا و انا مكنتش هنا رجالي هجمو عليكم فهاداك النهار معاد تعرف على حسناء ..
تفكر جابر كي دخل للقصر و فيدو ياسمين كيفاش كانت حسناء تتلفت موراها و خايفة و وجها صفر .. فهم انو معاد دخل للقصر و كان معاها ..
جابر : كمل ..
هيثم : بعدها لعبلها بعقلها انو راح يبقا ثأر الدم لوكان ميتعاونوش .. خافت عليك و رجعت تتلاقاه بهدف انو يقوللها واش دير .. اما للاسف صرا لي صرا ..
وقت لي سمع جملة انها خافت عليك قلبو وجعو علخر .. تفكر كي مأمنهاش .. كي سبها كي ضربها .. كي خلاها بين يدين باباه و محاماش عليها ..
رجعت بيه ذاكرتو للنهار لي ظهرت فيه حقيقة سعيد و قمر ...
~~ فلاش باك ~~
بعد ما تعاداو يامات على موت قمر و سعيد .. كثرت الهدرة بين العشيرتين على علاقتهم .. و على حمل قمر .. رجعو يسموها عا*** آل ضافر .. ولا واحد فيهم عرف الحقيقة .. و انتشر انو جابر هو لي قتل سعيد و قتل ختو زادة .. يعني عاش ضغط كبير الفترة هاديك .. حتا انو اقتنع بفكرة انو ختو عا*** ..
فيوم جا عيان مالخدمة طالع لغرفتو .. حيلو مهدود .. طاحت عينو على غرفة قمر لي مدخللها حتا واحد من النهار لي ماتت .. مفاقش بروحو لقا روحو فتح الباب و دخل ..
قعد يشوف فتفاصيل الغرفة حتا تركزت عينو على تصويرتها محطوطة تما .. هي وياه كانو صغار و هي رافداتو فحجرها .. تبسم وسط دموعو .. غمض عينو و خذا نفس عمييق .. ريحتها معبية الغرفة ..
توجه لسريرها .. حط راسو على مخدتها .. غمض عينيه يشم ريحتها و طاحو دموعو ..
كان راح ينوض حط يدو قدام مخدتها و نص من يدو دخلت تحت لمخدة قاست ورقة .. عقد حواجبو و جبدها ..
فتحها و كانت عبارة عن ايكو للبيبي .. رقا شادها فيدو يخزر فيها .. كان راح يقطعها اما حبس .. حطها بجنبو و فتحها الدرج تاع الطابلة لي قدامها .. كان فيه صندوق صغير لفتلو اهتمامو ..
جبدو اما كان مغلوق بالكادنة .. اما سهل انها تتكسر .. كسرها و فتحو .. كان معمر بالورق .. بدا يجبد فيهم بالوحدة و يقرا .. كانت عبارة عن رسائل بينها و بين سعيد .. تحكيلو وحمها .. تحكيلو مشاعرها و خوفها من اهلها .. حتا لحق لورقة و فتحها ..
عنوااان كبير فيها خلا قلبو يدق بقوة بين ضلوعو ..
مكتوب فيها بالخط بالعريض " عقد زواج " ...
#ليلوشة
—————————————————
اوبالاتي 🦋
حطووولي توقعاتكم بعد ما فطنت حسناء واش راح يصرا .. و جابر و هيثم فرايكم راح يحطو يدهم فيد بعض و يغلبو محمد .. و حيزية لي راح تباان مستقبلا واش راح دير فميزكم ..
جمجموووو هادا واش قدرت نكتبلكم زيادة مهم كالعادة على 12 نتلاقاو فالحلقات تاع ليوم
#ليلوشة