👑 حسناء الآغا 👑

|| الحلقة 35 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 35 Il
صالح : لالا يا وليدي متخافش .. الحياة حياتك منقدرش ندخل روحي فيه .. قررت برك نتلاقا بباها نخبرو بلي رجعت للقصر هاكا ميقولش انو راح يسكن بنتي معا العيلة ..
هيثم : ايه عمي فهمتك .. خلاص معليش .. ايا مالا اومبعد كي ترجع نهدرو ..
صالح : ان شاء الله ..
قصو الاتصال و دار هيثم راجع للقصر .. طلع لغرفتو .. جهز حوايجو لي يلبسهم و مرة على مرة تجي فبالو حسناء اما قاعد يحاول يتجاهل تخمامو فيها ..
كمل جهز كلش و حبط ..
لقاهم مجتمعين فصالون راح قعد معاهم .. نسا يهدرو هدرتهم و هو راح قعد معا عمو كريم ..
كريم : واش وليدي وشراك عندنا مدة مقعنددناش كيفكيف ..
هيثم : ولله يا عمي غسر الخدمة راك تعرف ..
كريم : معليش وليدي .. اما حبيت نسقسيك ..
هيثم : اتفضل ..
كريم : آل ضافر كي قتلو معاد راح تسكتلهم !! ( بون كاستيون ، ذكي هادا كريم ههههه )
هيثم عدل قعدتو .. عدا يدو على شعرو .. مكانش يسنا فسؤالو هادا ..
هيثم : اا فالحقيقة علاجال العرس لي اجلت لحكاية .. محبيتش عشيرة وحدوخرا تدخل بين المشاكل .. خلي يتعدا العرس بخير بعدا نتحاسب معاهم واحد بواحد ..
كريم : متسكتش على حق خوك .. متخليش دمو يروح هكاك .. ( محبيتوش هادا كريم باين تاع مشاكل قتشاااي كي داير ) ..
هيثم : عارف يا عمي عارف ..
تعدا وقت طويل و هوما قاعدين هكاك يهدرو فامور الخدمة و العشيرة .. حتا قطعت عليهم الهدرة زهرة ..
زهرة : الوقت نجهزو روحنا هاداك هو باش نوصلو فالوقت منتأخروش عليهم ..
هيثم : يما مزال الحال ..
زهرة : يالله هيثم ممزالش الحال ، الوقت ..
هيثم : خلاص كيما تحبي ..
ناضو كامل كل واحد راح يجهز روحو .. ناض هيثم يمشي بعقلو ..
قلبو قاعد يقولو متروحش .. اما عقلو قاعد يقولو روح .. رجع كل تخمامو حسناء .. مش متحمل فكرة انو راح تكون معاه مرا وحدوخرا رغم انا حيزية خطبها من عام و حسناء مدة قصيرة .. تملكاتو و تملكت قلبو ..
و فالاخير عقلو لي ربح .. طلع لغرفتو لبس كوستيم كحل .. عدل شعرو .. حط بارفانو و حبط .. لقاهم مزال مجهزوش روحهم .. قعد يسناهم فصالون ..
نروحو عند حسناء لي كانت قاعدة تجرب فالغوب بلونش .. غير لبستها و شافت روحها فالمرايا تخايلت هيثم قدامها ..
غمضت عينها بلا متحس .. تبسمة تبسيمة خفيفة و تخايلت عينيه .. تفكرت كي قاللها عينيك عشق ، و تفكرت زادة كي قاللها و ختا شواربك عشق ، رعشة خفيفة سرات فبدنها .. اما قطعت عليها سمر ..
سمر : العشق و الغرام .. و ضحكت عليها ..
فاقت حسناء على روحها .. فتحت عينها و حمحمت و هدرت ..
حسناء : لا عشق لا غرام ، سرحت فاحلامي الوردية برك ..
و قاعدة تتهرب بعينها باش متفيقلهاش سمر .. و راحت نحاتها و رجعت لشغلها ..
نروحو عند هيثم .. بعد ما كملو جهزو روحهم .. حبطو كامل للتحت .. و كل واحد توجه لسيارتو .. ركب هيثم و ركبت معاه يماه ..
و قلعو متوجهين لدار حيزية .. كان هيثم هو فالمقدمة .. و كانو يجرو لانو طريق شوية طويلة .. و هو هكاك لمح اسماعيل هاز فيدو قرعة شراب و يمشي هايم ..
قلبو نغزو .. جات حسناء بين عينيه .. اما مابين والو قدام يماه .. رفد التيليفون رايح يكتب ميساج نطقت يماه ..
زهرة : يا وليدي راك تسوق حط تيليفون ..
هيثم : امر ضروري يما ..
بعت ريالة لواحد من رجالو و كتبلو فيها انو يجيبلو رقم حسناء ضروري ..
وحد الربع ساعة و وصلو الرقم .. تبسم على جنب .. و كمل طريقو ..
وصلو لدار حيزية بعد ساعتين .. كانت الحالة مزينة .. و معمرة ورد .. توجهو للباب و دقدقو .. اما هيثم بعد عليهم شوية و عيط فتيليفون ..
ريبونداو عليه ..
حسناء : الو ..
هيثم : الو حسناء ..
حسناء : شكون معايا ..
هيثم : انا هيثم ..
قلبها دق .. من وين حاب رقمها .. بعدت تيليفون عليها خزرت فالرقم باستغراب و رجعت هدرت ..
حسناء : من وين جبت رقمي ..
هيثم : مايهمش .. اسمعيني ردي بالك من اسماعيل و اتجنبيه ليوم ..
حسناء : واش دخلك ..
هيثم : ر** متهبلينش متخلينيش نجي ليك ..
حسناء : هيه خلاص هادامكان ..
هيثم : ايه ..
حسناء : صاحا .. و قصت عليه لابال ..
زير على قبضت يدو و هدر بصوت مسموع ..
هيثم : راح تهبلني .. ملخقش يكمل هدرتو حتا سمع صوت من وراه يعرفو ..
حيزية : هيثم ....
#ليلوشة
—————————————————
اوبالاتي 💙
فرايكم اسماعيل كاش ما يدير لحسناء ولا لالا ؟ و حيزية زعما تكون سمعت هيثم كي كان يهدر فتيليفون ، الا سمعاتو راح تتخلط .. خلولي توقعاتكم طوااال عراض كي نزيد نحط نجمجملكم على تعليقاتكم
#ليلوشة