👑 حسناء الآغا 👑

|| الحلقة 90 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 90 Il
رجع خطوة للور .. رعشة قوية سرات فبدنو .. دمعتو لي كانت محبوسة خدات طريقها على خدو ..
جابر حط وجهو بين يديه .. هدية عنقت سمر تبكي .. و سمر بادلتها تعنيقة و تخزر فالفراغ مصدومة ..
زهرة و حيزية تبسمو معا بعض .. حيزية فرحت انها راح تتخلص منها و يمكن متفيقش منها كامل .. و زهرة فرحت لانو بسبة عايلتها ماتو ولادها فيزوج سعيد و معاد ..
عم الهدوء هاديك الدقيقة .. ولا واحد فيهم هدر كلمة يخزرو فالطبيب و ساكتين .. رجع هدر يحاول يطمنهم و يفهمهم حالتها ..
طبيب : غيبوبتها مؤقتة يعني باذن الله تفطن اما يمكن سمانة يمكن شهر يمكن شهرين كلش بيد ربي .. الضربة فراسها جات واعرة دارتلها نزيف داخلي حاد بقدرة ربي لي قدرنا نوقفو و الا فهاد الحالات مالفين نخسرو مرضانا معنتها تفائلوا و عاونوها بدعواتكم ..
هيثم كان يسمع و ساكت .. لسانو خانو .. مقدر يخرج حتا كلمة .. رجع للور .. و قعد فكرسيه حيلو مهدود ..
خزر فعايلتها لي كانو كلهم مصدومين .. معرفش الا يستشفا فيهم لانو حرموه من خاوتو فيزوج ولا يتعذب معاهم لانو لي لداخل راهي مالكة قلبو ..
تعدا الوقت و هوما تما و بداو يروحو بشوية .. حتا تفاهمو انو هيثم هو لي يقعد معاها .. محبوش يناقشوه لانو كان ممكن يرتكب جريمة فحالتو هاديك ..
راح كلهم و خرجو حسناء مالعناية المركزة لغرفة عادية .. اما جسمها كلو مربوط بآلات .. حتا تنفسها تتحكم فيه الآلات ..
كان قاعد حاط راسو بين يديه يخمم فيها حتا قطع على تخمامو الطبيب ..
طبيب : ميسيو رانا خرجنا المدام لغرفتها تقدر تقعد معاها دوك ..
وقف بسرعة .. عينيه لمعو بالفرحة .. هدر بسرعة ..
هيثم : وين اديني ..
راح الطبيب متوجه لغرفة حسناء و موراه هيثم يمشي و يزرب ..
وصلو للغرفة لي كانت فيها حسناء ..
طبيب : هايليك اتفضل ..
و راح و خلاه .. بقا لمدة معتبرة يخزر فالباب .. خايف يرمي يدو يفتحها و ميتحملش المنظر لي راح يشوفو .. قلبو قاعد يدق بالقاوي شي مالخوف يشوفو حبيبتو بين لحياة و الموت و شي من حماسو انو يشوفها حية ولو انها تكون تحت الالات ..
رما يدو للباب و فتحها بلعقل .. خذا نفس عميق و دخل .. بانتلو عشقو .. تبسم و عينيه مليانين بالدموع ..
غلق الباب و قرب ليها بلعقل .. كانت صفرة كأنو مافيهاش دم .. جرحات خفاف فوجها .. راسها ملفوف بسبة للعملية .. لاسقين فصدرها خيوط و ففمها جهاز الاكسجين ..
حط يدو على يدها حسها باردة زاد شدها باليد الثانية يحاول يدفي فيها ..
قعد فالكرسي لي قدامها و قاعد يخزر فيها لدرجة انو مرمشش .. قاعدة يراقب فيها كيفاش تتنفس ..
قاعد يثبت فتفاصيلها ..
هيثم : حسناء .. علابالي راكي تسمعي فيا .. سامحيني ..
حبط راسو حس بغصة فقلبو وقت لي يتفكر انو ضربها .. رجع خدا نفس عميق و طلع راسو و هدر ..
هيثم : ماشي عارف وقتاش ولا كيفاش اما يا حسناء وليت نتنفس عشقك .. عشقت تفاصيلك عشقت عينيه لي سحروني لي نشوف الكون فيهم .. عشقت تبسيمتك لي تخلي دقات قلبي يتساعرو و منقدرش نتحكم فروحي .. عشقت براءتك عشقتك انتي كامل .. ارحعيلي برك .. اقسم برب الكعبة غير نعوضك على ليفات ..
حط راسو على يدها .. يمكن يرتاح شوية .. اما لا .. غير حط راسو على يدها كانها فيقاتو على روحو .. كانها جات هدرت فوذنو و فيقاتو من ضعفو ..
طلع راسو خزر فيها و هدر ..
هيثم : اما شكون لي عمل فيك هاكا ....
#ليلوشة
—————————————————
اوبالاتي 💜
الذكاء متوارث من عندي لهيثم هههه دماغو شغالة مش بتنام .. حطولي تشو توقعاتكم الا يفيق لحيزية ولا نن .. و فرايكم حيزية راح تخلي حسناء ولا لالا ..
حطولي توقعاتكم و سوطو للحلقة لي موراها
#ليلوشة