👑 حسناء الآغا 👑

|| الحلقة 88 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 88 Il
غير دخلو الرصاصات فظهرها حبست فبلاصتها .. النفس تقطع فيها .. صوت الرصاص خلا سمر و حسناء يعيطو .. خلا جابر و هدية ينوضو بسرعة مبلاصتهم يخرحو يشوفو لي صرا خاصة بعد العيطة تاع سمر ..
بقات قمر لمدة واقفة بدون حركة .. نفس مقدرتش ترجعو .. طاحت عينها فعين سمر مليانين دموع .. تبسمت فوجها ..
و طاحت على ركبتها .. دخلوها سكرات الموت .. رجع صدرها يطلع و يحبط بقوة ..
طاحت فلرض على كرشها ..
خرجت هدية و جابر و شافو هاداك المنظر و سلمان موراها هاز سلاحو ..
هدية طاحت ديراكت فلرض .. راحت حسناء و سمر يجرو ليها .. و حابر تخدر فبلاصتو .. مقدرش يتحرك .. بدا دم يتعمر فالبلاصة لي طاحت فيها ..
كانت مزالها حية .. تخزر فالفراغ و دموعها يطيحو .. تتنفس بصعوبة .. تبسمت تبسيمة خفيفة .. و هدرت بصوت خافت و يدها على كرشها ..
قمر : سامحني يا ماما مقدرتش نحميك ..
قرب ليها جابر خطوة و زوج .. حتا تسارعوا خطواتو و لحق ليها .. قلبها بسرعة و هزها بين يديه معنقها و يبكي ..
جابر : قمر ابقاي معايا .. شوفيني هاني .. متروحيش اخزري فيا متغمضيش عينك ..
كانت تخزر فسما و متبسمة .. و نفس الجملة تكرر فيها ..
قمر : محميتكش يا ماما .. سامحني ..
قد ما حاول يخليها فاطنة مقدرش .. تغمضو عينها و ترخات بيه يديه و طلعت روحها عند مولاها .. او روحين .. روحعا و روح الجنين لي فكرشها ..
عنقها على قد ما يقدر .. هزلها صبعها يشهدلها و يعيط باعلى صوتو ..
جابر : اشهد ان لا اله الا الله .. اشهد ان لا اله الا الله .. فكل مرة يعاودها يقوى صوتو لي كانت الشهقة غالبة عليه ( انا علاه راني نبكي 🥺 ) ..
سمر مصدقتش لي قاعدة تسمع فيه .. قمر .. حبيبتها و رفيقتها و ثحبتها و ختها لي ماجبتهاش يماها ماتت .. ماتت و هي تشوف فيها ..
خلات هدية و خلات حسناء و طارت تجري ليها .. دموعها شلال .. مقدرتش تحبسهم ..
قعدت على ركبتها قدامها .. مدت يدها لي كانت ترعش .. هزت يد قمر تتحس فنبضها اما مكاش ..
سمر : م م ماتت جابر .. ماتت ..
خزر فيها جابر بعينيه حمورة مالبكا .. مقدرتش يهدر .. عينيه كانو يهدرو .. دور وجهو يخزر فباباه لي قتلها ..
عض على لسانو ..زير على قبضة يدو .. عروق رقبتو و يديه برزو .. وقف بسرعة و راح متوجه ليه كثور ..
وقف مقابلو وجها لوجه و عيط فوجهو على قد ما يقدر ..
جابر : علاااااه قتلتها .. علاااااه ..
رجعلو سلمان بكل برود و هو يخزر فيها جثة هامدة بين يدين سمر ..
سلمان : زانية ..
تصدم من هدرتو جابر .. اما الكلمة هادي مطفاتش نارو .. حتا و زانية ميقتلهاش ..
جابر : قتلتها كي زاانية .. بواشمن حق ..
سلمان : العادات و تقاليد يقولو هاكا و هي تعرفهم مليح ..
جابر : مخفتش على بنتك قتلتها بدم بارد .. راهي هي من دمك ماشي العادات و تقاليد .. مراحش تتهنا حياتك كامل لوكان تكون ظلمتها ..
سلمان : سمعتها بوذني معا هاداك الرخيس .. اما قتلتو قبل ما نقتلها ..
ملقاش واش يهدر جابر .. لسانو تربط .. الكلمات خلاصولو .. دموعو زادو قواو اكثر .. بعد عليهم معصب علخر ..
هز تيليفون و عيط لعشيرو و صاحبو هيثم ( جابر و هيثم كانو اعز صحاب .. )
هدر بصوت تاع بكا ..
جابر : الو هيثم ..
هيثم : الو جابر ..
جابر : هيثم قمر ختي تقتلت .. ماتت هيثم ..
ملحقش يحزن عليها حتا سمع خبر من عند هيثم لي خلاه يتصدم اكثر ....
#ليلوشة
—————————————————
اوبالاتي 💜
فرايكم شكون لي قتلو سلمان .. فرايكم قمر صح زنات !! و واش سمع جابر من عند هيثم .. حطوولي توقعاتكم و اجروو للحقلة لي موراها
#ليلوشة