👑 حسناء الآغا 👑

|| الحلقة 48 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 48 Il
حسناء حست النفس ضاق فيها .. تبسمت على جنب باستهزاء .. كأنو ماشي مثدقة واش راهي تشوف .. خزرت فهيثم تمتم و هدرت بلا متحس .. رعشتها كان يحس بيها لانو يدها كانت بين يديه ..
حسناء : هيثم شكون هادي ..
غمض عينو بالقاوي و خذا نفس عميق .. وصل للحظة لي كان خايف منها و ماشي حابها ..
خايف يدور يخزر فعينها .. منعرف كيفاش و وقتاش اما عشق عينها لدرجة انو يفهم عليهم بلا متهدر ..
فتح عينيه .. دار و خزر فيها و يا ليتو مخزرش .. معبيين بدموع .. وجها صفرر حتا الماكياج و مغطاش صدمتها .. شواربها يرعشو بدون ارادتها .. خايفة تسمع منو الرد .. خايفة تكون هي الشخص الثاني .. خايفة تكون هي الزوجة ثانية ..
هيثم : حسناء ..
بحركة خفيفة نحات يدها من يدو .. قبل ما يلحق يهدر حيزية بدات تعيط ..
حيزية : هيثم شكون هادي .. هيثم شكووووون .. جبتلي ضرة هيثم .. ضرة .. ( تغيض صراحة 🥺 )
تهدر و متوجهة ليه .. تبكي .. صوتها غالبة عليه الشهقة .. تقدم هو تان لعند حيزية محبهاش توصل عند حسناء .. وقف مقابلها يشوف فيها و هي تهدر ..
حيزية : ضرة فنص عرسي .. ضرة ياا هيثم .. هادي هي اخرتها معاك ..
و طرطقت بالبكا .. يماها و زهرة راحو يجرو ليها يعنقو فيها .. زهرة مصدومة اكثر .. هدرت بلعقل كانو ماشي قادرة تعلي صوتها ..
زهرة : علاه يا هيثم .. واش درنالك .. و شكون عيلة آل ضافر ..
بابات حيزية جا مور هيثم و هدر ..
باباها : وين راه وعدك يا آغا .. وين راه وعدك ..
دار ليه هيثم بسرعة .. قرب منو و هدر بلعقل ..
هيثم : يا عمي نعرفك صاحب حكمة .. اسمعني برك اومبعد احكم عليا .. خلينا برك نفريها هنا ..
حاول يتمالك روحو باباها و هزلو براسو بمعنى ايه ..
دار هيثم لعندهم كامل .. قوى روحو و هدر بصوت عالي خلا كل كبير و صغير و مرا و راجل يسمعولو ..
هيثم : حسناء ال ضافر مرتي كيفها كيف حيزية .. نظن حياتي الشخصية واحد ميدخل فيها اما كوني اغا و لازم نشرح لنسابي راح نفهمهم .. انو عندي ظروفي لي خلاتني ندير هاكا .. و ظروف اقوى مني خلاتني نتزوج من عايلة ال ضافر .. راح تبقا حيزية زوجتي لولة .. و حسناء زوجتي الثانية .. ( وجعني قلبي ولله العظيم حسنااء بنتي سمحيلي .. )
حشمت لاقثى درجة .. تحس فقلبها راح يخرج من بلاصتو .. دموعها طاحو .. كلمة ظروف خلاتني نتزوج بحسناء و حسناء زوجتي الثانية قاعدة تتكرر فوذنها ..
تبسمت بين دموعها و هدرت معا روحها بصوت خفيف ..
حسناء : توجع اكثر من وجعني خوه .. ههه عينيا عشق و انا صدقت ..
حديثو اشعل نارها و نفس الوقت كالما حيزية شوبة وقت سمعت اسم العايلة .. و انو الظروف جبراتو اما بقات تحرق فقلبها و خاصة بعد ما تفكرت اسم حسناء ..
تقدمت سمر و هدية لحسناء .. سمر حطت يدها على كتف حسناء تواسي فيها و هدية مالصدمة ملقاتش واش تهدر ..
سمر : حسناء نقدرو نرجعو ..
بصوت بكا هدرت حسناء : سمر الله يسترك عيطي لهيثم ..
عيطت سمر لهيثم .. رجع هيثم هدر
هيثم : تقدرو ترجعو تكملو وين حبستو ..
رجع كل واحد لبلاصتو .. و كل واحد واش كان يهمس و يهدر .. حيزية راسها فلرض ملقاتش واش دير تبهدلت و رجعو كلهم يستشفاو فيها .. طفاو لغنا و رجعت الحالة كالم تتسمع غير الهدرة ..
راح هيثم عند حسناء و قلبو يخبط .. عارف انو هي تظلمت و تظلمت اكثر من حيزية لانو حست بنفس شعورها و فنفس الوقت بين لناس بلي هي والو عندو .. اما مضطر يدير هكاك و مضطر يمثل هاد السهرية بلي هي والو عندو ..
وقف مقابلها و هي محبطة راسها باش ميشوفهاش تبكي .. اما صدرها لي كان يطلع مالشهقة فضحها ..
حسناء : بطلت محبيتش نتزوج .. رجعني ..
خذا نفس عميق .. و هدر بقسوة على عكس واش كاين فقلبو ..
هيثم : ماشي مشكل نرجعك و خوك نقتلو هنا ..
طلعت راسها بسرعة مصدومة .. راسها تحسو راح يطرطق .. عينيها حمورة مالبكا ..
شافها هكاك للحظة كان راح يعنقها و يقوللها بلي واش راهو يخرج من فمو ماشي اشكاين فقلبو ..
حسناء : ربي وكيلك ..
هزلها براسو و هدر بدون ملامح محاول انو يحكم روحو لاقصى درجة ..
هيثم : تبعيني نكتبو كتابنا و بعدها احكمي غرفة ليك وين حبيتي و متزيديش تشوفيني ..
توجه لطابلة تاع كتب لكتاب .. قعد هو و قعدت هي ..
الكاتب : هيثم شعابني هل تقبل بحسناء ال ضافر زوجة لك ..
هيثم : اقبل ..
الكاتب : حسناء ال ضافر هل تقبلين بهيثم شعابني زوجا لك ..
حسناء : اقبل ..
قالتها سينيات و وقفت باش تروح .. رفدت غوب بلونش تاعها بين يدها و رايحة تمشي و هي ماشي جايبة خبر كامل .. تبعها هيثم و تبعوها الباقي ..
وصل اسماعيل .. و شاف واش مكانش حاب يشوفو .. و سمع واش مكانش حاب يسمع ..
شاف حسناء كي راحت و موراها هيثم .. دخل يجري .. جبد سلاحو و عيط باعلى صوتو .. خلى الناس كامل خزر فيه ..
اسماعيل : هييييييثم ..
هيثم غير دار ليه .. خرجت رصاصة من مسدس اسماعيل و تقطع النفس ..
#ليلوشة
—————————————————
اوبالاتي 🤍
هههههه قلتلهم منحبش الفرحة بزااااف .. فرايكم الرصاصة راح تقيس كاش واحد ولا نن اتفكرو بلتلكم كاين لي راااح يمووووت فالحلقة الججاااية .. حطولي توقعاتكم طوال عراض.. و دوك نزيد نكتب و نحط لي نعسووويرقدو بسك انا نطول كي نكتب الحلقة شغل نحب نكتب بالطبع و نرتب الاحداث
#ليلوشة