👑 حسناء الآغا 👑

|| الحلقة 43 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 43 Il
نروحو عند حسناء .. بعد ما خرجت مالدوش .. لبست روبة خفيفة .. نشفت شعرها شوية .. و هي هكاك جات سمر لعندها .. كانت لاسة غوب بوغدو تهبل .. و دايرة شعرها اوندولي .. و ماكياج سامبل و حاطة فوق شعرها تاج تاع ورد .. كانت تبان بوبية ..
حسناء : يااا عمري على مرت خويا الزلة ..
سمر : ههههه حشمتيني .. كامل وجدنا .. مزال لعروسة برك ..
حسناء : معليش دوك نوجد روحي تمتم ..
سمر : لالا غير بعقلك جيت نقولك بلي عمي صالح .. عم هيثم لي جا معاهم خطرة لي فاتت عيط لجابر و قالو حتا لعشية باش نجو ندوها .. نظن راح يديرو سهرة ..
حسناء : مزية مالا نريح شوية .. و نروح ناكل جعت .. و نتي تقعدي هاكا حتا لعشية ..
سمر : لالا سخانة دوك نحي و كي تكوني قريب توجدي روحك نلبس و نلبس لياسمين ..
حسناء : اوك معليش و ماما وين راهي ...
سمر : ههههه ملي ناضت و هي توجد فالحلوة لي راح ندو معانا .. قالت ندير كلش بالطبع منخليلهمش الفرصة يهدرو علينا كامل ..
حسناء : اهيييه لي يسمع يقول تموت عليهم .. ضحكو فيزوج .. و حبطو للتحت .. سمر راحت تبدل و حسناء راحت تاكل و تكمل ترفد دوزانها لي بقاولها لبارح لانو جهازها راح تديه معاها ليوم ..
تعدات ساعة من الوقت .. و رجعت الساعة جوايه 12 .. فقصر عشيرة شعابني ..
كانو كلهم ملمومين فالساحة .. نسا لابسين خماراتهم .. رجال يجهزو فطونوبيلات باش يقلعو .. كل واحد ركب فطونوبيلتو و قلع الكورتاج متوجهين لدار حيزية .. بعد مدة وصلو للقرية تاعهم .. بدا صوت الزرنة و البارود يعلى .. صوت الطونوبيلات يصونيو .. و نسا يزغرتو ..
حيزية : جاو .. ولله جاو راني نسمع فيهم ..
سليمة : هايا بنتي نوضي البسي الحايك ..
ناضت حيزية .. لبسولها الحايك .. و وقفت عند التاقة تشوف فيهم جايين مالبعيد و قلبها يخبط ..
كل ما يقربوا للقصر كل ما يزيد صوت البارود و صوت الزرنة ..
وصلو للقصر .. و علاو الزغاريت من طونوبيلات لعريس و من دار حيزية .. ناس القرية واقفين من بعيد و يتفرجو .. كلهم مخلوعين فالسيارات و الغاشي لي جا ..
حبط هيثم من سيارتو بكل وهرة .. حبطت موراه يماه .. هزت البرنوس و حطتهولو على كتافو .. زاد فيه النص .. رحع يهبل ( يا ربي كيفاه راني نتخايل .. قولولي راكم تتخايلو نتوما تان .. )
دارولو الرجال دوايرة فوسط ساحة القصر .. دخلو فيها الزرنة و زادو علاو فطبيلهم .. دخل هيثم فالوسط و بابات حيزية و بداو يشطحو كيفكيف ..
كان هيثم متبسم و يشطح من قلبو .. مشعارف علاه اما ليوم كان فرحان .. كانو الرجال تما يسفقولو و يعيطو باسم الاغا .. و كل ما يتحرك برنوسو يتحرك معاه ..
جبد سلاحو و بدا يتيري فسما .. و هو يتيري علاو صوت الزغاريت مرة وحدوخرا و علا صوت الرجال و هوما يعيطو ..
كي يقوص فالسما عندهم معنتها يجيبولو عروستو .. ( هادي اخترعتها من راسي ههههه اقراو و اتخايلو نورمال ياودي .. ) ..
سلم على باباها .. و هدر معا باباها و هو شادلو يدو ..
باباها : يا وليدي بنتي راهي امانة عندك .. متزعفهاليش راهي عاشت معززة مكرمة فدار باباها ..
قلبو وجعو على هدرت باباها .. للحظة كان راح يعترفلو بكلش .. ضميرو انبوا لاقصى درجة بقى بين نارين ..
هيثم : نوعدك عمي ..
باباها : ان شاء الله تكون قد وعدك .. ( غاضني يا زحزوح راح نبكي .. ) ..
توجه بابات حيزية لباب القصر وين كانت واقف دة حيزية تسنى فيه يجي .. عينيه تغر٥روا بالدموع .. بنتو و صغرونتو كبرت و رجعت عروسة و مرت اكبر الآغوات فالبلد ..
تبسمتلو حيزية .. وصل عندها .. حط يدو على الباب و خرجت من دار باباها تحت جناحو .. تحت زغاريت النسا .. ( صح منحبش حيزية بصح تأثرت فهاد المشهد .. )
#ليلوشة
————————————————
اوبالاتي 🤍
اللقاء الاسطوري و المنتظر قاااادم .. غاضني بابات حيزية .. فرايكم هيثم كيفاه راح يلاقيهم .. حطولي توقعاتكم ..
و اجرووو للحلقة لي موراها ..
#ليلوشة