👑 حسناء الآغا 👑

|| الحلقة 45 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 45 Il
سمر : ماما ارواحي تشوفي حسناء ..
هدية : خير وشبيها ..
سمر : اطلعي ارواحي ..
رجعت سمر تجري لغرفة حسناء .. و دخلت تسنا فهدية تجي و تشوف بنتها ..
دخلت هدية لغرفة بنتها مخلوعة .. دارت فبالها حاجة ماشي مليحة صرات لحسناء .. اما غير دخلت و شفتها فهاداك المنظر عينها تعباو بالدموع ..
قدمت ليها و عنقتها و هدرت ..
هدية : ماشاء الله على بنتي .. خمسة و خموس ..
حسناء : يسلمك ماما ..
بقاو هكاك يقصرو و يضحكو بين بعضهم .. بعدها هدرت سمر ..
سمر : هايا نتحاوزو نخلو لعروسة تلبس الغوب بلونش .. راني شفتها ياادرا منين جابتها اما تهبل .. و غمرت لحسناء ملتحت للتحت ..
حسناء : جابوهالي ..
سمر : هييه جابوهالك ... ( تحلبتلها هههههه ) ..
خرجو كلهم .. و خلاو حسناء فغرفتها وحدها .. رفدت تيليفون باش تبعت ميساج لهيثم اما ترددت ..
حسناء : نبعثلو ولا لالا .. مافيها والو من حقي نعرف بلي راهو جاي منلبسش مالدوك و نقعد نسنا كي الروبو ..
رفدت تيليفون و كتبتلو ميساج .. " كي تكون جاي ابعتلي ميساج .. " ..
و بقات دور فغرفتها و تسترجع ذكرياتها فيها .. اما هيثم .. كانو هاداك وين وصلو للقصر .. معا صوت الزرنة و البارود مسمعش صوت الميساج كي وصل ..
حبط من طونوبيلتو و حبطت موراه يماه .. راح من جيهة حيزية و عاونها تحبط و هي التبسيمة ماشي مفارقتها ..
بداو يتمشاو كيفكيف على طوول الطابي لي كانو حاطينو متوجه للحديقة لي راح يديرو فيها العرس ..
هيثم كان تخمامو فبلاصة وحدوخرا ( راكم عارفينها .. )
اما حيزية كانت تخزر فالبنات لي حاضرين تما و تفسر نظرتهم ليها على اساس انهم غايرين منها .. كانت تمشي و رافعة راسها و متبسمة بغرور ..
وصلو للبلاصة لي راح يديرو فيها العرس .. كانو راح يقعدو شوية و يشطحو و بعدها يكتبو كتابهم .. اما هيثم هدر ..
هيثم : نفضل نكتبو كتابنا قبل بعدها نريحو ...
حيزية : اوك مكاش مشكل راني موافقة انا تان ..
و هدرت بينها و بين روحها ..
حيزية : ههههه مقدرش يصبر عليا .. ( هيا لنبزق مع بعض ..)
خبروهم بقرارهم .. و قعدو على الطابلة و جا الكاتب ..
عمللهم محاضرة عن الاخلاق و حب الوطن ههه نقصر قصدي عن الزواج و المودة و الرحمة بين الزوج و الزوجة .. و بعدها وصل للسؤال الاهم ..
الكاتب : حيزية ***** هل تقبلين هيثم شعابني زوجا لك على سنة الله و رسوله و دون اي ضغط و تهديد ..
حيزية بابتسامة عريضة : اقبل ..
و علاو الزغاريت .. و الناس الكل تسفق و هي زادة فغرورها ( قريب ناضت قاتلهم موتشوووو نتوما هادرين هادرين .. )
الكاتب : هيثم شعابني .. هل تقبل بحيزية ****** زوجة لك على سنة الله و رسوله و دون اي تهديد او ضغط ..
بقا سارح فيه .. باجابتو هادي راح يدخل فحرب .. حرب كبيرة .. حرب الحب .. حرب العشق و الغيرة و التعدد .. غمض عينو بقوة .. نفض الافكار هادي من راسو و هدر ..
هيثم : اقبل ..
و رجع صوت زغاريت و البارود داير حالة .. و بدا صوت لغنا و الحالة تقلبت .. بعد مدة قصيرة ناضت حيزية تشطح ..
هو استغل الفرصة و ناض بدون ما يلفت الانتباه .. راح عند عمو صالح و هدر فذنو ..
هيثم : عمي راني رايح نجيبها .. حاول تغطي عليا ..
صالح : روح يا وليدي ربي يجيب الخير ..
راح هيثم متوجه لسيارتو .. اما شافو عصام يدو اليمين .. راح يجري عندو ..
عصام : آغا كاش ما تسحق ..
هيثم : لالا عصام والو .. اما كي نبعتلك ميساج نلقااك هنا معا الزرنة نوصل قوللهم يبداو ..
هدر بينو و بين روحو .. هيثم : مدام راح نتزوج زوج يعني نعدل بينهم فكلش حتا فالعرس .. ( اححح راح يقلبها اااا لحبيبة ) ..
عصام : حاضر آغا ..
هيثم : و ما تقول لحتا واحد بلي شفتني رايح ..
و راح متوجه لطونوبيلتو .. طلع .. شعل الطونوبيل .. هز تيليفونو باش يعيط لجابر اما لقا ميساج من عند حسناء.. تبسم على جنب.. و هدر ..
هيثم : تطور ملحوظ ..
دخل فالميساج و قراه و ضحك بالصوت .. و هدر ..
هيثم : هههه وقيل مقلقة باش تشوفني ..
كتبلها ميساج و بعتهولها .. " توحشتيني وقيل .. راني فطريقي راني جاي .. "
حط التيليفون و قلع ..
كانت رافدة تصاورها و هي صغيرها فيدها وقت صونا تيليفون و لحقها ميساج .. رفداتو و قراتو ..
وجها رجع حمرر .. و قلبها رجع يدق بالقاااوي .. ( و هااا دلالي و دلاالي و دلالي .. الحلقة الجاية هيثم يسموه ايسكريم ههههه ) ..
#ليلوشة
—————————————————
اوبالاتي 🤍
هادا واش قدرت نكتب نعسسست .. لوكان نزيد نكتب نخسرها غدوة نوض اونفورم و نقلش كبدوووشاتي..
احكووولي احكوووولي هيثم كيفاه راح يكووون .. و حيزية المكلوووبة كيفاه راح تولي و أكدوولي على هيثم واش قال لعصام قليع قلبي ناوي يديرلها عرس مطبطب ..
#ليلوشة