👑 حسناء الآغا 👑

|| الحلقة 53 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 53 Il
رجعت يدها ترجف .. تحس فيدو باردة بين يديها .. طاحت دمعة و زوج و رجعو شلال ..
قعدت فالكرسي لي قدام سريرو و هي شادة يدو مطلقتهاش ..
بقات غير تخزر فيه .. الكلمات خانوها .. لسانها خانها .. مقدرتش تهدر .. اكتفات برك بنظراتها ليها و مسكة يدها ليه ..
جاز الوقت تاع زيارتها ليه كلو و هي تخزر .. فيقها من سرحتها طبيب كي فتح الباب و هدر ..
طبيب : مدام خلاص الوقت ..
حسناء : هاداوين دخلت .. تعيش شوية ..
طبيب : يا مدام مراكيش معقمة مليح قادرة تضريه و تزيدي من فضلك ..
حزتلو براسها بمعنى ايه و هدرت بصوت يرجف ..
حسناء : خلاص دوك نخرج ..
وقفت و هي شادة يدو .. حطتها بلعقل فوق السرير .. قابلت وجها معا وجهو .. و بين دومها و بكيتها تبسمت تبسيمة خفيفة .. و قربت لوذنو و همستلو ..
حسناء : و شكون بعشق فعيني كي تروح !! راني نسناك .. ( راني حاسة روحي بيدون انا ولله ) ..
بعدت على وذنو .. باستو من جبهتو بوسة خفيفة و خرجت مالغرفة و قلبها قعدت تما ..
خرجت نحات لاتونو هاديك و رماتها ( لي ميعرفوش ليتونو هادوك يتلبسو مرة وحدة و يترماو ) ..
رجعت للكولوار لي كانت قاعدة فيه .. و قعدت تسنا فجابر يجي ..
بعد ما تفاهم معا المدير على كلش و خلصو فكلش .. خرج من مكتب تاع المدير متبسم .. حبط لتحت .. قابلاتو قاعدة فالكرسي وقفت و هدرت بحماس ..
حسناء : هااه خبرني واش قالك ..
جابر : وافق طبعا ..
حسناء : حمدلله مالا نروحو نوجدوه ..
جابر : ايه مي كيفاه راهو ..
حسناء : مزال كيما قالنا الطبيب مكاش والو جديد .. اما وجهو كان صفر بزااف .. نزيفو كان حاد سور .. حمدلله بصح ..
جابر : حمدلله .. هايا نروحو نجهزوه ..
راحو عند الطبيب و هدرو معاه .. عيط للمرضة قعدت معا حسناء تشرحلها فالدوا وقتاش يشربو و واش لازم ديرلو .. و كيفاش تقعدو و كيفاش تمشيه .. المهم تقريبا علمتها كلش ( الورقة رابحة تاع حسناء باش تريح معاه هههه غير هي لي تعرف تسما تغلب حيزية 😎) ..
و جابر و الطبيب راحو جهزوا الماتريال .. و جهزولو نقالة لي ينقلوه فيها للاسعاف .. و بعدها جهزولهم سيارة اسعاف لي توصلهم ..
بعد شي ساعة و نص تقريلا كانو واجدين ..
خرجو هيثم مالغرفة هاديك و مشاو بيه متوجهين للاسعاف و هوما يطبعو فهاديك النقالة ..
طلعوه فالاسعاف .. طلعت معاه حسناء .. و جابر راح فسيارتو ..
طول طريق و هي شادتلو يدو و تقرا فالقرآن و عينها منحتهاش عليه .. كي قريب يوصل للاسعاف للقصر شعلو لاصونات تاعو باش يعرفو بلي جاو ..
فتحو باب القصر لكبيرة .. دخلو للساحة .. كانو هاداك الوقت كامل خرجو يشوفو فسيارة الاسعاف داخلة و موراها سيارة جابر ..
وقفت حيزية فالمقدمة كالعادة .. تسنا باب الاسعاف يتفتح ..
تفتح الباب و حطبو ليزاجون باش يحبطو منو هيثم .. فتحو النقالة و حبطوه و حبطت معاه حسناء و هي شادة يدو .. غير طلعت راسها و للمرة الثانية طيح عينها فعين حيزية ..
حيزية حبت تقتلها هاديك الدقيقة .. عينيها يطايرو بالشر ..
حبط جابر و تقدم عندهم .. و راح عند سمر .. حيزية بقات تخزر هكاك فحسناء و تقدم عندها و حسناء كانت قوية و محبطتش عينها بالعكس كانت تخزر بنظرة تحدي ..
وصلت حيزية عند حسناء .. رمات يدها ليها و طبعتها .... ( اوووبا بدات الحرب )
#ليلوشة
—————————————————
اوبالاتي 🤍
وصلنا للحرب العالمية الثالثة ههههه حطوولي تشوو توقعاتكم شكون لي راح تقعد معا هيثم و متنسااوش الورقة الرابحة تاع حسناااء و هل حيزية راح تخليها طرونكيل ولا لالا .. و وشمن نوع تاع مشاكل راح ديرلها ..
نحتاااج توقعاااتكم انشطوا شوية اجماااعة ..
انا خلاص عييت نروح نشرب الدوا تحبس كرشي و نضربها بسبات تاع الكوالا ههههه غدوة ان شاء الله تصبحو بخير حبوباتي
#ليلوشة