👑 حسناء الآغا 👑

|| الحلقة 50 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 50 Il
الطبيب : للاسف الاصابة جاتو قريبة للكبد .. حمدلله مقاستوش اما المريض نزف بزااف و نسحقو دم باش نكملو العملية فاسرع وقت ممكن ..
حسناء هاديك الدقيقة الدنيا لعبت بيها .. كأنو تعب الفترة هاديك كلوو جا فجيهة و اصابة هيثم فجيهة .. متوقعتش انها ممكن تخاف عليه هاكا .. هدرت بسرعة ..
حسناء : قولي وشنو الزمرة انا نتبرعلو ..
طبيب : A- ..
حسناء : عندي AB- منقدرش نمدلو !!
طبيب : مع الاسف لالا لازم نفس الزمرة ..
خبطت اللرض برجلها و عدات يدها على شعرها .. تخمم شكون عندو نفس زمرة هيثم .. تحلوو عينها على وسعهم وقت تفكرت ..
حسناء : جاابر جااابر ..
دارت بسرعة عند الطبيب و هدرت معاه بترجي ..
حسناء : تعيش سلفلي تيليفونك نعيط لخويا يتبرعلو عندهم نفس الزمرة ..
مدلها تيليفون .. كتبت النيميرو تاع خوها و عيطتلو ..
فقصر عشيرة شعابني .. العرس حبس .. المعازيم راحو .. كانو كلهم مجتمعين داخل القصر حتا عشيرة ال ضافر كانو تما معاهم .. مالحادثة لي صرات فالماضي و خلات بيناتهم عداوة مدخلوش لهاد لقصر ..
زهرة مكسلينها على الفوتاي و الخدامات يديرولها فالمولونيا و يحاولوا يفيقوها ..
حيزية قاعدة تما تبكي و مرة على مرة ترمي نظرة شر لهدية و لسمر ..
حيزية : وين راهم يا ربي .. و راحت معاه هاديك اللفعة ..
وقفت سمر و هدرت بعصب ..
سمر : شششش اي واش .. شكون اللفعة .. اللفعة الوحيدة هنا هي نتي حسناء كيفها كيفك ماشي عارفة بلي صرا سقسي راجلك مجرابة .. متخلينيش نخرج زعافي فيك سمعتي .. ( بردتلي قلبي بن عمي احيانا هرمونات الحمل ينفعو هههه )..
وقف جابر بسرعة و قعدها و هدر ..
جابر : سمر هدي روحك ديجا الحالة راهي متوترة متزيديش نتي ..
خزرت فيه مستغربة .. و هدرت و هي شاداتو فيدو ..
سمر : وشبيك صفر هاكا جابر راك خايف ..
جابر : شيي لالا .. عييت برك ..
سمر : متلعبهاليش ليا متخافش صاحبك قوي ميصرالو والو .. مفهمتش علاش كي مزال احساس بصداقتو مسيطر عليك متفروهاش ..
جابر : سمر ماشي وقتها ..
سكتو كامل .. كل واحد فعالمو يسناو خبر صغير .. حتا صونا صوت تيليفون تاع جابر .. رفد ركزو كامل معاه ..
جابر : الو وي شكون ..
حسناء : الو جابر انا حسناء ..
جابر : هااه حسناء طمنينا خير ..
ناضو كامل و وقفو يسناو يسمعو لخبر و هوما شادين فقلبهم ..
حاولت تقوي روحها اما مقدرتش .. طرطقت بالبكا ..
هو غير سمع هكاك مقدرش يحمل قعد ديراكت .. رجع صفر .. حط يدو على راسو يحاول يخبي الدموع لي تجمعو فعينيه ..
وقت شافتو سمر هكاك حطت يدها على فمها و تحلو عينها على وسعهم .. حيزية مالصدمة ولات تضحك و تبكي ..
صالح مسكين حط وجهو بين يديه يخبي فدموعو .. كلهم كانو هكاك .. حتا نطقت حسناء .. ( دارتلهم دراما بنت لحرام هههههه)
حسناء : دبر راسك كيفاه تلحق تمتم لازملو دم و مكاش لي عندو نفس دم من غيرك .. اجري الله يسترك باش يكملولو العملية وضعو حرج شوية ..
وقف بسرعة مبلاصتو .. و هدر ..
جابر : راني جااي ..
كوبا عليها و طار يجري و قبل ما يخرج هدر باش يطمنهم ..
جابر : راهو حي .. خصو دم برك ..
توجه يجري لسيارتوو .. طلع فيها و شعلها و قلع .. بين هادوك الدموع لي متجمعين فعينو تبسم تبسيمة خفيفة و هدر ..
جابر : مزال باش تموت و شكون يولي عدوي يا هيثم آغا .. و زاد فسرعتو مخلي الغبرة موراه .... ( حبيييت لوكان يرجعو اصدقاء كيما كانو مهم احداث الماضي يتكشفو فالحلقات الجايييين مزاال بزاف اسرار.. ) ...
#ليلوشة
—————————————————
اوبالاتي 💙
حطووولي توقعاتكم على حالة حسناء فالقصر كي ترجع .. و فرايكم هيثم كي يسمع بلي جابر تبرعلو يمكن تنقص عداوتهم ؟؟ زعماا واش صرا فالماضي باش خلاهم اعداء ..
حطووولي توقعاتكم طوال عراض و راااني نكتب كيما علابالكم انا سامطة فالحلقة نطول معاها تسما مزال نزيد نحط تماااام
#ليلوشة