👑 حسناء الآغا 👑

|| الحلقة 17 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 17 Il
بعد مدة قصيرة .. وصل هيثم و صالح لقصر عشيرة آل ضافر .. قبل ما يدهلوا مالباب وقفو رجال جابر برا هازين سلاحهم و موجهينو لسيارتهم ..
وقف سماعيل فوسط طريق و قبل الرجال كامل موجه سلاحو لهيثم داخل سيارة .. و هدر بصوت عالي ..
سماعيل : وااش تحوس .. من الاحسن تروح قبل ما نقوص ..
نفخ هيثم بسخرية .. حبط من سيارتو بكل هيبة .. حاط نواضر .. دخل يديه داخل جيبو و قاعد يمشي بلعقل متوجه لعند سماعيل ..
كلهم جهزوا اسلحتهم باش يقوصو و هو يخزر فيهم و متبسم باستهزاء .. وصل عند سماعيل ..
طلع نواضرو .. و هدر ..
هيثم : خبر الآغا ديالك بلي جيت .. ظهرتو متعرفوش ترحبوا بنسابكم .. ضحك على جنب و غمزلو .. ( اتخاايلو المنظر 🥺 يا ليتني كنت سماعيل ) ..
استغرب سماعيل .. واش قصدو بنسابكم .. دار متوجه لعند جابر و متأكد انو راح يحاوزو ..
وصل لعندو كان قاعد فبيروه بعد ما كمل خرج غضبو ..
سماعيل : آغا .. هيثم راهو برا .. راهو يقول ..
مخلاهش يكمل هدرتو .. ناض من كرسيه و خرج .. تبعو سماعيل .. و هو يهدر ..
سماعيل : آغا واش كاين علاه جا ..
جابر مرجعلوش و كمل يمشي ..
سماعيل حبس عند الدخلة تاع ساحة القصر .. اما جابر كمل حتا عند سيارة هيثم ..
شافو هيثم جاي خرج من سيارتو و طلع نواضرو ..
وقف جابر مقابلو و عينهم مركزين فعين بعض .. ثنيناتهم فعينهم غضب .. تقابلو الاغوات تقابل غضب كل واحد فيهم ..
هيثم : اهلا آغا جابر ..
جابر : واش جيت دير ..
هيثم : جيت نخطب لي بسبتها مات خويا ..
جابر : مكاش بنت نمدوهالكم .. ارجع منين جيت ..
هيثم : تفاهمت معا باباك ..
هدر جابر بصوت عالي و بعصب ..
جابر : انا الآغا هنا ماشي بابا سمعت ..
هدر هيثم بهدوء عكش الاعصار لي داخلو ..
هيثم : مالا مضطر نقتل لي قتل خويا ..
جابر : مكاش مشكل ..
و بحركة خفيفة خرج هيثم السلاح و وجهو لراس جابر ..
رجعو الرجال وجهو سلاحهم لهيثم و هدر سماعيل بصوت عالي ..
سماعيل : حبط سلاحك ..
هيثم : كي يكونو لكبار يهدرو الصغار يسكتو يا سي سماعيل ( قصفو قصفة محصلتش حبيبتي يا هيثومي ) ..
دار هيثم لعند جابر و هدر ..
هيثم : و انا قررت نقتل لي قتل خويا دوك ..
قعدو مدة قصيرة هكاك يخزرو فبعضاهم بغضب .. حتا خرج صوت جابر ..
جابر : حبطو سلاحكم و بعدو على الباب خلوهم يدخلو ..
سماعيل : بصح آغا ..
جابر بصوت عالي : سماااعيل منعاودش ..
تبسم هيثم تبسيمة انتصار حبط سلاحو و رجعو لبلاصتو و هدر معاه بطريقة مستفزة ..
هيثم : هاكا نتفاهموا نسيبي ..
قحرلو جابر .. و دار يمشي متوجه للقصر ..
رجال بعدو من الطريق و خلاو هيثم يجوز .. غير لحق عند سماعيل غمزلو و جاز عليه بطونوبيل ( اتخايلولي هاد لقطة بالضبط يا ليتني كنت سماعيل للمرة الثانية ) خلاه ياكل فروحو بالعصب ..
طلع جابر لعند حسناء ديراكت .. طبطب لباب بقوة خلاه تتنفض من بلاصتها .. ناضت تجري للباب و فتحت ..
حسناء : خير خير واش صرا ..
جابر : جهزي روحك حاو يخطبوك ..
حسناء : كيييييفاه .....
#ليلوشة
—————————————————
اوبالاتي 🔥
انا بديت نعشق فهيثم و تصرفاتو خلاص .. طحت فالغمزة تاعو ههههه جهزولي روحكم لشوية رومنسية قااادمة هههههه مدولي تشو توقعاتكم على الرومنسية لي راح نديرها نشوف الا تخمو كيفي ولا نن .. و سماااعيل كي يعرف بلي راح يخطبوها واش يصرااا
خلولي توقعاتكم طوااال عراض .. و خلو تعليق غير نحط نجمجملكم
#ليلوشة