👑 حسناء الآغا 👑

|| الحلقة 86 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 86 Il
جابر : وشمن حقيقة .. واش كاين سمر اهدري كاش ما تعرفي ..
نزلو دموعها و هدرت ..
سمر : ادينا ليها تعيش ..
و دارت عند هدية تحاول تفطن فيها و بعد معاناة كبيرة فطنت و طارو لسبيطار ..
اما حيزية بعد ما سمعتهم راحو ملقاتش واش دير .. حبطت تجري للكوزينة .. رفدت موس و جرحت روحها ..
و خرجت للجادان .. رفدت فيدها حديد كبيرة .. انفاسها تسارعو و هي تشوف فيها .. هدرت بينها و بين روحها ..
حيزية : لازم تعمليها لازم ..
رفدت طرف قماش عضاتو .. و طلعت لحديدة للسما قد ما تقدر و خبطت بيها رجلها تكسرت .. خرجت منها عيطة تهد لجبال ..
بدات تبكي بالصوت .. مقدرتش تمشي عليها ولا ترفد روحها من شدة الالم ..
تمشي و شادة فالحيط .. و بصعوبة طلعت لغرفتها بلا متشوفها حتا خدامة ..
دخلت لغرفتها كسرت الزجاج تاع تاقة تاعها ..
هرجت الغرفة .. خرجت حوايج من بلاصتهم و رماتهم فلرض .. رفدت صندوق تاع مجوهراتها .. رفدتهم خباتهم و رمات الصندوقفارغ فلرض على اساس انو تعرضت للسرقة .. و انو السارق كي كان هارب قابلاتو حسناء فدروج و طيحها .. ( تزيد تقولي وحدة غاضتني نربحلها العيب ههه ) ..
بعد ما كملت واش دارت كامل .. راحت عند زهرة .. لي مسمتعت بوالو ..
دخلت عندها هكاك .. ناضت زهرة من بلاصتها مفزوعة ..
زهرة : خير بنتي واش صرا ..
طرطقت بالبكا و حكاتلها كلش واش دارت من الاول للخر ..
حطت زهرة يدها على صدرها و هدرت ..
زهرة : ماتت !!
حيزية : معلاباليش داوها لسبيطار ماما اشهدي معايا تعيشي ولله يقتلني .. ماشي قصدي نديرلها هكاك الغيرة عماتني ..
عنقتها زهرة .. عدات يدها على راسها و هدرت ..
زهرة : متخافيش .. دوك لازم نروحو سبيطار و يشوفك كيفاه راكي باش يصدق ..
خرجو .. و طلبو مالرجال تما يدوهم للسبيطار ..
فهاداك الوقت هيثم دخل لغرفة فارغة .. حط السجادة و صلى زوج ركعات .. دموعو نقدرش يحكمهم .. كل ما يتفكر كيفاش ضربها يتقسم قلبو ..
طلع راسو لسما .. طلع يديه و بدا يدعي ..
هيثم : يا رب احفضهالي .. نديرها بين عينيا .. يا رب رجعهالي سالمة ..
ناض بعد ما حس الباب تفتح .. دار موراه لقاه صالح ..
صالح : راك مليح وليدي ..
هيثم : حمدلله ..
صالح : خبرت جابر و راهو جاي على ما اظن ..
هزلو براسو بمعنى ايه .. و ناض خرج مالغرفة .. هو غير خرج شاف جابر جاي يزرب و موراه سمر و هدية ..
وصل عندهم .. خزر فيهم يحاول يقرا ملامح وجهم مقدرش .. هدر بتردد ..
جابر : وين راهي ..
صالح : متخافش مزال مخرجتش مغرفة العمليات ..
سطتو كلهم .. كل واحد وين قعد .. هيثم كان محطم لدرجة كبيرة حتا جابر و لاحظو ..
جابر : سمر وشمن حقيقة هدرتي عليها مقبيل ..
سمر : وعدتها منهدرش الا رجعتلنا هي تحكيلكم .. و متحاولش معايا ..
ناضت و خلاتو و راحت عند هدية .. بعد مدة قصيرة دخلت زهرة و شادة معاها حيزية لي كانت تمشي و تعرج .. بصدفة شافها هيثم .. رجع ميضوييش ..
شاف وجها برك .. ماشاف رجلها ماشاف يدها ماشاف حالتها .. توجه ليها كي المهبول .. لدرجة خلا صالح و جابر ينوضو موراه يشدوه اما ملحقوهش ..
شافتو جاي ليها و ملامحو متبشرش بالخير .. غير وصل عندها خبطها بكف لدرجة انها غابت عن الوعي بثواني .. سمع راحلها .. رؤيتها تضببت ..
ناس كلهم بقاو يخزرو فيها .. كان راح يزيدلها اما حكموه جابر و صالح .. رجع يعيط بهيستيريا ..
هيثم : اطلقوووني .. اطلق قسامي .. اطلقني ليوم نقتلها ..
زهرة رجع لونها صفر .. سمر و هدية مافاهمين والو ..
هيثم : تتفاهمي معا طبيب باش تقوقولي حسناء حامل .. ليوم نقتلك .. الا مقتلتكش منتسماش اغا ..
كلهم تصدموا من هدرتو .. حتا هي خزرة فيه بصدمة كيفاش عرف ..
حبس فبلاصتو .. خزر فيها باشمئزاز و هدر ..
هيثم : راكي طالق .... ( استقبل اول تزغريتة .. ) ..
#ليلوشة
—————————————————
اوبالاتي راني درتلكم حلقة طويلة 🥺 علابالكم مقدرتش نكتب ياك مي قلت نحط هادي نصبركم بيها .. مهم حطوولي توقعاتكم زعما راح تتطلق خلاص ولا نن .. و سمر تقوللهم واش صرا لحسناء زعما ..
ملاحظة : كرونيك هادي انا كاتبتها ليلوش .. كاين بزاف راهم يحوسو عليها كاملة .. مكاش كاملة انا راني نكتب فيها و اوبالات هوما لولين راهم يقراوها تسما متقعدوش تحوسو بسك متلقاوهاش
نلتقي غداااا ادعو لماما 💔
#ليلوشة