👑 حسناء الآغا 👑

|| الحلقة 130 و الاخيرة ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 130 الاخيرة Il
يخزر فيها مصدوم .. دموعو طاحو .. و فجأة و بدون سابق انذاار ناض يعيط باعلى صوتو ..
هيثم : راح نولي اب .. رااااااح نولي ااااااب ..
و رفدت تريكو تاع البيبي هاداك و قاعد يبوس فيه و يجري و فاتح يديه كي ليجوار كي يماركيو ..
حسناء تشوف فيه شااابعة ضحك و فنفس الوقت دموع الفرحة نازلين من عينها ..
رجع ليها يجري .. قعد على ركبتو مقابلها و هي قاعدة على طرف سرير .. هز يديها فيزوج و باسهم و خزر فيها و هدر ..
هيثم : نتي احسن حاجة صراتلي فحياتي حسناء .. نتي حسناء الآغا .. نتي ديالي وحدي برك ..
حسناء : علابالي هههه و بلا منعاودلك سيناريو انا تان ..
هيثم : علابالي و عنقها على قد ما يقدر ...
و سمعو العايلة كاامل لخبر .. فرحولها و حتا انو هيثم من فرحتو دار وعدة كبيرة و خرج صدقة ..
وقف معا حسناء فوحامها .. لي تطلبو يحضر .. هبلاتو و هبلها .. كملت فترة حملها و تعدااو تسعة شهور فلمح البصر ..
كانو فطونوبيل راكبين متوجهين لقصر عايلتها بعد ما عرضوهم للانيفارسار تاع ياسمين ..
كانت كرشها لاحقة لنيفها .. و هيثم كان يمشي بلعقل خايفة عليه ..
حسناء : هيثم علاه راك تمشي هاكا راك تقلق فيا ..
هيثم : هييه باش منضركش نسيتي واش قاتلك طبيبة ..
حسناء : روح برك هايا عييت مطونوبيل ..
قعد يهبل معاها و شرد على طريق حتا جاز على حفرة صغيرة .. هو غير جاز عليها و حسناء عيطت ..
حسناء : اغععععع ..
دار ليها مفزوع و هدر ..
هيثم : خير وشبيك ..
حسناء : الما ..
هيثم : خلعتيني لما هاوليك دوك نمدلك تشربي ..
حسناء : يااااو لما لماااا ..
و شدت كرشها بيديها فيزوج .. السطر بداها .. خزر تحتها لقا الما ترعب .. حبس طونوبيل ضربة وحدة ..
هيثم : شهيييق زفيير .. شهييق زفيير ..
و بقا يتنفس وحدو و هي تخزر فيها .. حتا فيقاتو وقت لي جاها مغص قوي و هدرت ..
حسناء : هييييثثثثممممم اديني لسبيطااار ..
و بدات تخبط فيه على كتافو و تتنفس بقوة .. و هو يتنفس معاها حاس قلبو راح يحبس من خوفو عليها ..
حط يدو على كرشها و يد يسوق بيها طاير لسبيطار .. و هدر ..
هيثم : وليدي بلعقل على ماماك .. بلعقل ..
حسناء : اجري تعيييييش ..
قوا عليها السطر و رجعت متقدرش تحملو و بدا صوتها يعلى و معا كل عيطة قلبو يخرج ..
وصل لسبيطاار .. حبس الطونوبيل بقوة حتا عملت حس و حبط يجري يعيط للطبة .. خاف يرفدها هو يضرها ..
حبطوها مالطونوبيل و حطوها فالكرسي المتحرك و هي تعيط و تتنفس بقوة و دخلوها ديراكت لغرفة لولادة ..
بقا هو برا يسنا رايح جاي ..يدعي فربي يرجعلو مرتو و وليدو سالمين غانمين ..
عيط لجابر و خبرو و جاابر جابهم كامل و جاو يسناو فيها ..
وقف جابر معا هيثم و هدر ..
جابر : متخافش مريت عليها مرتين و باذن الله ترجعلنا بصحتها هي و البيبي .. حسناء قوية ..
هيثم : امييين ان شاء الله ..
و هو هكاك تفتح الباب و خرج صوت بيبي يبكي فيد الممرضة ...
قدم ليه بخطوات متثاقلين .. حس روحو فحلم .. هزو بين يديه بلعقل .. كان خفيف كريشة .. يبكي و يفرفط بين يديه .. طاحو دموعو .. يعني هو رجع اب .. راه رافد ثمرة عشقو بين يديه .. راه راقد قطعة منو بين يديه ..
قدم فمو لوذن البيبي و بدا يأذنلو ..
هيثم : الله اكبر الله اكبر ...
كمل اذنلو و بقاو كامل يخزرو فيه فرحانين .. طلع راسو هيثم و خزر فالممرضة و هدر ..
هيثم : مرتي مرتي كيفاه راهي ..
الممرضة : راهي هاايلة ..
هيثم : الحمدلله ..
الممرضة : واش تسموه ..
هيثم : ياسر سعيد ...
و تعدااو اليامات و خرجت حسنااء مالسبيطااار .. و كملت حياتها معا هيثم كعادتهم .. اكيد ماشي خالية من المشاكل اما ملياااانة عشق و كل شخصية و دات لي تستهلو..و رجعوا العلاقات كيف ما كانو من قبل و احسن اتحدوا العشيرتين بعد ما ظلموا عشااق حكايتهم بقات على كل لسان .. حكاية قمر و سعيد .. يضربوها بيها لمثل فالوفاء .. اما حكاية حسناء الآغا رجعت حكاية عشق فالعشيرة .. حكاية عشق خلااات المحبة و الخير يغلبو على الثأر و الانتقام ..
-- النهاية --
—————————————————
-- ناقلين من فضلكم الجزء هادا ينقل مع لكرونيك --
اوبالاتي 💙
و هنا تكون لحقت اللحظة لي نودعكم فيها و نودع ابطالنا .. الحمدلله كملتهالكم و وفيت بوعدي .. صدقوووني فرختووني كي لحقو الحلقات ل 1k جام .. فرحتوني بتفاعلكم و تشجيعكم ليا .. حبييتكم و والفتكم والفت نسهركم و نجرجركم و نشوقكم و نحمسكم .. راح نعتزل مؤقتااا مي اكييد نرجع و تعرفووني كيي نرجع ههههه
عرفت اوبالات جدد مراحش ندكر اسموات لانو راكم بزاااف مي صدقوووني غير عشقتكم وحدة وحدة
نتلاقااو فساعة الخير ان شاء الله و معا كرونيك جديدة مستقبلا من تأليفي انا ليلوشة ..
نحبكممممممم يا افضل حاجة صرات فحياتي 👑
دمتم في رعاية الله و حفظه
-- تمت --
#ليلوشة