👑 حسناء الآغا 👑

|| الحلقة 11 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 11 Il
دخل لوسط الساحة .. ملقاش دم .. و صوت لعياط قاعد غير يزيد .. راح تبع صوت حتا وصل لعند باب الاسطبل .. خزر فيه و هدر ..
جابر : حسناء ..
تقدم ليه يجري و قاعد يضرب فيه بقوة اما محبوش يفتحولو و ما سمع حتا رد من غير صوت عياط حسناء و صوت الضرب ..
بعد على الباب شوية و خبطو برحلو .. تكسر ..
غير تفتح الباب قابلاتو سمر طايحة فلرض و شعرها كامل طايح على وجها .. بلا ميخمم مرتين .. راح يجري ليها ..
جابر : سمر .. سمر .. و قاعد يخبط بيدو على وجها ..
مفطنتش .. هزها بسرعة خرجها مالاسطبل و رجع دخل .. راح ديراكت عند سلمان ..
شدلو يدو قبل ما يزيد يضربها .. و هدر ..
جابر : يا تقتلها .. يا تخليها .. مكاش حاجة كيما هادي بابا .. و معا كل كلمة يزير على هدرتو ..
سلمان : بسبتها اضطريت نوافق على حاجة مستحيل كنت نوافق عليها من قبل ..
جابر : و لي هي ..
سلمان : راح يتزوجها حيث مقابل روح خوه ..
صدماتو الهدرة هادي .. اكيد هدفو وحدوخر .. علاه يتزوجها و هو ميعرفهاش .. واش قصتوو .. كل الافكار هادي كانت دور فراسو اما تمتم فاق لروحو و رجع هدر ..
جابر : انا لي قتلت معاد ماشي هي علاه تقولي بسبتها ..
ملقاش سلمان واش يهدر .. خزر فيه مالفوق للتحت و خرج ..
خرج موراه جابر محملش يشوف حالة حسناء هكاك .. عيط للخادمة راحت ليها .. و هو راح رفد سمر و طلعها لبيتو ..
قاعد يفيق فيها .. حتا فاقت ..
جابر : سمر يا روحي شكون عمل فيك هاكا ..
حطت يدها على راسهاةمن قوة الالم و هدرت ..
سمر : منعرفهمش ..
جابر : سمر اهدري متخبيش ..
سمر : ولله جابر .. خلاص شتت راسي راح يطرطق ..
جابر : خلاص خلاص ريحي .. نروح نشوف حسناء و نجي ..
حكماتو من يدو و هدرت بسرعة ..
سمر : حسناء مزالها حية .. وين راهي .. اديني نشوفها ..
جابر : مزالها حية ايه .. اومبعد نديك ريحي دوك سمر ..
هزتلو راسها بمعنى ايه .. عدلت روحها على مخدتها و غمضت عينها تحاول ترقد ..
خرج جابر مالغرفة و راح متوجه لعند حسناء ...
نروحو عند هيثم لي كان فهاداك الوقت وصل .. راح ديراكت عند يماه .. كانت قاعدة فغرفتها ..
دخل لقاها قاعدة على الكرسي تاعها و مقابلة تاقة و غايسة فيها و عينيها مغرغرين بالدموع .. ماشي ساهلة يموت وليدك و قطعة منك .. هدر معاها بصوت خافت ..
هيثم : يما ..
فاقت من سرحتها و مسحت دموعها تمتم و رسمت تبسيمة و دارت ليه ..
زهرة : انعم وليدي ..
هيثم : بما عارف ماشي وقتو اما لازم نهدرو فهاد الموضوع ..
فهمت عليه واش يقصد و هزتلو براسها باش يتقدم و يريح قدامها ..
قعد فالكرسي لي مقابلها .. شدلها يدها و هدر ..
هيثم : يما كيما علابالك عرسي كان مقرر نهار الجمعة و مدينا للناس كلمة و ماشي آغا عشيرة شعابني لي يدور فكلمتو .. مضطرين نخلو العرس بالجمعة ..
زهرة : عارفة يا وليدي .. معاد خلاص راح .. ماراح يتغير والو خلي كلش فوقتو و جيب عروستك لهنا نتهنا عليك ..
هيثم : ان شاء الله يما ..
و وقف خارج مالباب و هدر بينو و بين روحو ..
هيثم : اما منظنش عروسة وحدة ....
#ليلوشة
—————————————————
اوبالاتي 🔥
ركزوووولي على اخر كلمة قالها هيثم يااا جدكم .. ركزو عليها مليح مليح .. راح تتخلط الحالة اكثر و اكثر .. المهم جهزولي روحكم عندنا عرس بالجمعة هههه انا نلبس كاراكو احمم .. بالمناسبة فرايكم حسناء راح تقبل تتزوج بلا متعمل مشاكل ؟؟
خلولي توقعااتكم طوااال عراااض و خلو كومنتار هنا غير نزيد نحط نجمجملكم عليه
#ليلوشة