👑 حسناء الآغا 👑

|| الحلقة 38 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 38 Il
غير وصلو لتما كانت الصدمة ليهم .. حسناء بقات تخزر يمين و يسار كأنها تحوس على كاش شخص..
فيقها جابر وقت هدر بصوت عالي ..
جابر : وين راه حسناء مكاين حتا واحد هنا .. وين رااه ...
دارت تخزر فيه و هي تبكي و تهدر ..
حسناء : ولله .. ولله كان هنا .. ولله ما راني نكذب ..
عدا يدو على وجهو بعصب و بقا يخزر فحالتها .. مراهيش عاجباتو وصلت تشوف اوهام و تعمل حاجات مكاش منهم ..
فهاد الدقيقة وصلت ليهم سمر ..
سمر : حسناء خير واش كاين واش صرا علاه عيطتي ..
دارت لعندها حسناء عنقتها و هي تبكي بلا متهدر حتا كلمة ..
خزرت سمر فجابر و عملتو بوجها حركة تقصد بيها وشبيها .. خزر فيها جابر معصب و هدر ..
جابر : سمر طلعيها لغرفتها و اقعدي معاها راني جاي ..
سمر : حاضر .. هايا حسناء امشي معايا ..
راحت حسناء معا سمر .. طلعتها لغرفتها و بقا جابر يتلفت فالبلاصة و يخزر بعينيه قلبو قاعد يقولو حسناء مراهيش تكذب .. و عقلو قاعد يقولو انو راهي تتوهم بعد الشي لي صرالها .. طبعا قلبو لي غلب بعد ما شاف بقع دم فلرض ..
عقد حواجبو و قرب ليهم .. قاعد يخزر فيهم و هدر ..
جابر : زعما متكونش حسناء تجرحت ..
غير طلع راسو طاحت عينو فشجرة .. اما مش اي شجرة ..
شجرة عليها دم .. قرب ليها و خزر .. لقاها يد تحطت على الشجرة .. و هنا تأكد من هدرت حسناء .. اما متأكدش انو لي عملها اسماعيل ..
نروحو عند اسماعيل لي كان يمشي فالغابة بسرعة بنص وعيو .. و راسو ينزف شادو بيدو .. و يتمتم بينو و بين روحو و عينيه حمر راح يطرطقو ..
اسماعيل : نقتلكم .. نقتلكم ..
يمشي و يردد فيها حتا اختفى عن الانظار .. اما سمر بعد ما طلعت حسناء لغرفتها و حكاتلها لي صرا .. بقات سمر تهدي فيها و تحاول تنقص عليها حتا رقدت حسناء على حجرها .. تما دخل جابر باش يهدر معا حسناء اما لقاها راقدة .. هدر معا سمر بصوت خفيف باش ميفيقهاش..
جابر : سمر اقعدي معاها متخليهاش وحدها ..
سمر : اكيد عارفة .. اما صح لي صرا ..
جابر : ايه صح اما مزال متأكدتش بلي لي عملها اسماعيل .. يدي اليمين مزال مصدقتش انو طلع ط*** و ماشي راجل .. اما الا طلع هو نشرب من دمو ..
سمر : هدي روحك جابر و رد بالك على روحك تعيش ..
جابر : متخافيش .. انا دوك راني رايح عندي شغل .. كاش ما كان عيطيلي فتيليفون ..
سمر : طريق السلامة ..
خرج جابر من عندها متوجه لمكتبو يشوف كيفاه يدير معا لي صرا .. و سمر بقات معا حسناء ...
نروحو لعند هيثم لي كان قاعد معاهم و كاره حياتو .. تخمامو كامل فاسماعيل و خسناء .. من لي شافو فالطريق قلبو ماشي مطمنوا و حتا باش يعيطلها مقدرش ..
و هو هكاك قصت عليه يماه و وقت هدرت ..
زهرة : وليدي نوض شطح مرتك على زرنة شوية نوض..
هيثم : يما خلينا منها .. ملحقش يكمل هدرتو لقاها متوجهة ليه .. محبش يحشمها قدامهم ناض هو تان ..
دارولهم الزرنة و بقاو يشطحو كيفكيف .. و هو نرة على مرة يتبسم فوجها .. اما مش ليها .. كان يتبسم معا واش قاعد يتخايل.. انو يشطح هو و حسناء .. و انهم تزوجوا عن حب .. و كلهم فرحانين بيهم ..
قطع على تخمامو صوت حيزية وقت لي هدرت ..
حيزية : راك تتبسم بزاف هههه علاه ..
هيثم و هو شبه غايب عن الوعي : حسناء ...
—————————————————
اوبالاتي 💙
الله الله ياا الله يا موولانا هههههه زاد نطق اسم حسناء قدامها .. تهلطت خلاص راني نشوف فيها راح تعرف قبل العرس .. و اسماعيل واش راح يدير و اكدولي على واش كاين يقوول فالغابة .. و جابر كيفاه راح يدير معاه .. و هيثم كي يسمع تقوم الحرب العالمية الثالثة هههه
#ليلوشة