👑 حسناء الآغا 👑

|| الحلقة 80 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 80 Il
كان واقف مقابل لمراية يخزر فالجرح .. كان بدا يبرا شوية ماشي كيما كان .. تذكر كي كانت حسناء بالفوطة .. منظرها مغري .. البوسة كي باسها .. تذكرهم كلهم و هو يخزر فالمراية ..
فيقو من سرحتو وقت تحطت يد حيزية على كتفو ..
بعدها داورت يدها على كرشو و عنقاتو من ظهرو و هدرت ..
حيزية : علابالك نحبك هيثم .. و ليلتنا مجوزنهاش ليلة عرسنا .. واش رايك نجوزوها ليوم ..
دارت ليها يحاول يسايرها .. يحاول ينحي حسناء من راسو ..
حط يديه على خصرها تبسمت .. طلعت يدها لخدو ..
بدا يقرب ليها و هي تقرب ليه .. غير وصل باش يبوسها و هو مغمض عينيه جات فراسو صورة حسناء و هي تبكي ..
بعد تمتم عليها .. قعدت هي فنفس الوضعية .. طلقها من خصرها و عدا يدو على وجهو .. مقدرش يتخطاها .. فتحت عينها .. عقدت حواجبها و هدرت ..
حيزية : وشبيك ..
تردد .. ملقاش واش يهدر .. ميقدرش يستعرفلها ولا يستعرف لروحو بلي رجع اسير فعشق حسناء .. محبش يعترف لروحو بلي حبها و عشقها و ادمن عليها و رجع يتنفسها .. رجع الحاجة لي يدير تحضر بين عينيه ..
هيثم : الجرح قاعد يوجع فيا ..
و دار عطاها بظهر متوجه لسرير .. اما هي نفخت بالفور .. و راحت موراه للسرير و هي تهدر بينها و بين روحها ..
حيزية : مش مصدقة وقتاش نحمل منك .. بعدها تحب تروح لحسناء روح ..
تبسمت و تكسلت قدامو .. حطت راسها على صدرو .. اما هو تجينا منها و من تصرفاتها الجريئة .. اما مقدرش يبعدها ولا يهدر .. بقا يخزر لسقف كي عادتو ..
اما حسناء .. دخلت عملت دوش خفيف .. خرجت لبست شورت و تريكو خفيف و تكسلت فبلاصتها .. حطت يدها على كرشها وبقات تهدر ..
حسناء : يمكن راح تجي غصبا عني .. يمكن باباك شخص سيء اما نوعدك راح نحبك .. ( طززز تحبي الشعر كرشك راهي فارغة هههه ) ..
و بقات هكاك تخمم فلي جاي حتا هزها النوم .. و حيزية زادة هزها النوم .. غير رقدت بعدها هيثم عليه .. راح يشرب لما ملقاش ..
ناض من بلاصتو حبط للكوزينة و جاب معاه قرعة ما و رجع للغرفة .. اما قبل ما يدخل ضربتلو فمخو يتفقد حسناء .. كأنها بنتو يتفقدها وقت لي ترقد ..
دخل حط القرعة تاع الما و رجع خرج متوجه لغرفة حسناء ..
راح ليها .. فتح لباب و دخل راسو برك .. شافها راقدة .. معا لول مركزش لواش لابسة .. اما بعدها شافها .. عينيه رجعو قلوبة .. مقدرش يسيطر على روحو .. مقبيل كانت قدامو حيزية تتعوج و تتمايل و محركت فيه والو .. و حسناء راقدة بطرف شورت تاع اطفال رجعاتو كالمهبول .. كان داخل .. كان راح يستسلم انا تفكر كلمة " حامل " ....
#ليلوشة
—————————————————
اوبالاتي 💜
احممم غدوة راح يكون نهااار شبااااب بزاااااااف هههه غدوة اليوم الموعووود .. حطووولي توقعاتكم وااش راني نقصد مثلا ههههه منعرف علاه راني حاسة النهاية بدات تقرب و بديت نزعف هههه
#ليلوشة