👑 حسناء الآغا 👑

|| الحلقة 99 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 99 Il
هيثم : نقبل ايه ..
تبسمت حيزية اكثر .. حست الروح رجعتلها .. قوتها رجعتلها .. رجعت مرت الآغا للمرة الثانية ..
تنفست زهرة براحة بعد ما سمعت قبول هيثم..
الامام : نقراو الفاتحة على بركة الله ..
هزو يدهم و قراو الفاتحة .. بعدها سلمو .. هدر الامام و هو يخزر فهيثم ..
الامام : يا وليدي الطلاق ماشي ساهل .. طول بالك .. و ساعف مرتك.. بيناتكم مودة و رحمة و راح تبقى باذن الله ..
هدر هيثم بينو و بين روحو و هو يخزر فحيزية بنظرة حادة ..
هيثم : حتا التحريض على جريمة و الكذب واعر ..
الامام : انعم ..
فاق على روحو هيثم .. رجع خزر فالامام تبسم معاه و هدر ..
هيثم : عارف شيخنا عارف ..
تبسم معاه الامام .. حط يدو و هدر ..
الامام : هادا هو الاغا لي نعرفو .. انا دوك نروح راني مشغول .. ربي يباركلكم و يرزقكم بالذرية الصالحة ..
نطقت حيزية تمتم بحماس ..
حيزية : امين شيخنا امين ..
ناض الامام .. و ناض موراه هيثم يوصلو للباب .. خرحو كيفكيف ..
دارت حيزية عند زهرة و عنقتها ..
حيزية : يعطيك الصحة ماما ..
زهرة : واجبي اما اشطاري حابة حفيد يعمر عليا الدار ..
حيزية : هههه ان شاء الله منا على شهرين تسمعيني بالحمل ..
زهرة : ان شاء الله ..
قطع عليهم هيثم كي دخل .. مخزرش فيهم و مهدرش معاهم .. طلع لغرفتو باش يغير حوايجو .. هو غير ظخل و غلق الباب موراه ..
فتحت حيزية الباب و دخلت .. دار ليها معقد حواجبو و هدر ..
هيثم : شكون قالك ادخلي ..
حيزية : هيثم سمحلي ..
هي غير قالت سمعلي و هو شعل فيها بالعياط ..
هيثم : ر** واش نسمحلك بسبتك قريب قتلتها .. منسمحش .. متستهليش و روحي بوسي راس يما كل بسبتها لي رجعتك ولا راكي فدار باباك دوك .. و دوك عارفة عندمن راني رايح .. راني رايح عند حسناء لي تستهل نكون قدامها .. رايح رايح عند مرتي تاع صح .. و دوك اخرجي ..
عصبت هي تان من هدرتو .. فكل مرة توقف حسناء فوجها حتا و هي فغيبوبة ..
حيزية : مفهمتش علاه راك دير هاكا علاجالها ..
رجع دار يعيط فوجها ..
هيثم : خاطرش نحبها .. ايه نحبها و نموت عليها فهمتيييي ..
رجعت خطوة للور .. رجعت متشوفش من قوة العصب .. كرهها لحسناء عمالها عينها .. هدرت و ياليتها مهدرت ..
حيزية : تحب وحدة رخيسة و قح** كيفها ..
قرب ليها كيف الثور .. خبطها بكف ثماني الابعاد .. خلاها طيح فلرض .. حبط لمستواها و حكمها من شعرها بقوة لدرجة قريب طيرهولها .. ( كما تدين تدان نفس اللقطة لي صرات لحسناء صراتلها ..)
و هدر و عينيه راح يخرجو مالعصب .. مزير على كل كلمة يقولها ..
هيثم : اياك تجبدي سيرتها على فمك لموسخ .. اشرف منك و من غيرك .. و رماها فلرض هكاك ..
هز تريكو فيدو بدل تمتم و هلاها تبكي هكاك و خرج و خبط لباب فبقوة ..
هبط يجري فدروج .. اما وقفو صوت تيليفون .. رفدو خزر فالرقم معرفوش ..
هز عليه و هدر ..
هيثم : الو ..
الممرضة : الو ميسيو هيثم شعابني هاكا ..
هيثم : ايه شكون معايا ..
الممرضة : ممرضة من مستشفى ******
حس الدم نشف فيه .. رعشة سرات فبدنو .. النفس تقطعلو .. بدنو ترخف .. خرجت كلمة وحدة من فمو ..
هيثم : حسناء ...
الممرضة : .....
#ليلوشة
—————————————————
اوبالاتي 💜
بردتلكم قلبكم فحيزية اه هههههه مزال الخير للقدام .. فرايكم واش صرا لحسناء .. واش راح تقولو الممرضة .. زعما فاقت !!
حطووولي توقعاتكم طواااال عراااض .. انا خلاص نحبس بسك راح يطفا تيليفون كي تجي تريسيتي نحطو يتشارجا و نزيدنكتب شكلي مراحش نشوف الماتش محبتش تجي كتر من 7 سوايع مكاش 🙂
#ليلوشة