👑 حسناء الآغا 👑

|| الحلقة 6 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
-----------------
lI الحلقة 6 Il
طاح معاد فوق جسد حسناء بعد ما هي فقدت الوعي ..
هيثم قاعد يخزر فجابر مرة و فمعاد لي مرمي بدموماتو مرة وحدوخرا ..
سماعيل جا يجري هو تان و شاف هداك المنظر ..
جابر واقف هاز السلاح فيدو و يخزر فوجه حسناء .. كان غايب على الدنيا وجه حسناء برك لي بين عينيه ..
رجال هيثم جاو يجرو للمكان لي سمعو منو طلق ناري .. اما قبل ما يدخلو خرج هيثم قابلهم .. يهدر و صوتو يخرج بسيف ..
هيثم : ارجعو للقصر ..
هدر واحد من رجالو : اما آغا سمعنا طلق ناري .. قبل ما يكمل هدرتو قطع عليه هيثم يهدر بالعياط و بعصب ..
هيثم : قلت لربكم ارجعو للقصر ..
خافو منو .. و رجعو للقصر بلا ما يزيدو يناقشوه ..
رجع دخل بين هادوك الصخرات .. هاز سلاحو و توجه ديراكت عند جابر .. و وجه سلاحو لوجهو ..
هيثم : نقتلك و نشرب من دمك لوكان كاش ما يصرالو ..
جابر متهزش قعد بنفس وضعيتو و عينيه مركزين فبلاصة وحدة برك ..
دخل بيناتهم سماعيل و وجه سلاحو لراس هيثم ..
سماعيل : اووب اوب .. جرب و تشوف النتيجة ..
خزر فيه هيثم بنص عين .. حبط سلاحو و راح عند خوه ..
حط يدو على شرايين يدين معاد يتحسس بالنبض .. كان عايش اما نبضو خفيف ..
رفدو بسرعة على ظهرو .. و دار عند جابر و هدر معاه ..
هيثم : مراحش ننساهالك يا جابر آغا وراح نتواجهو ..
طار بخوه حطو فوق حصانو و راح بيه للقصر .. اما سماعيل دور وجهو لانو حسناء صدرها كان مكشوف .. قدم ليها جابر بلعقل و عينيه مغرغرين بالدموع ،، يحاول يحبسهم قد ما يقدر .. هز طرف قماش كان مرمي بجنبها و غطاها بيه ..
دار عند سماعيل بهدوء و هدر ..
جابر : سماعيل ارجع للقصر جيبلي طونوبيل و متهدر لحتا حد على لي شفتو ..
سماعيل : حاضر اغا ..
رجع سماعيل للقصر باش يجيب طونوبيل .. اما جابر قعد فوق صخرة تما شاد راسو بيديه .. يخمم على ختو و كيفاه يدير معاها .. خانتو و خانت شرفو ..
فهاداك الوقت هيثم كان وصل لقصرو بعد ما عيطلهم يجهزولو غرفة طبية فالقصر بلا ميديه للمستشفى ..
حطوه على السرير .. ربطوه بجهاز نبضات القلب .. علقولو سيروم فيدو .. دارولو الاكسجين لانو نبضو كان بزاااف هابط .. كشف عليه طبيب و مع الاسف اصابتو خطيرة و لازملو عملية و احتمال كبير يدخل غيبوبة .. حضرو سيارة الاسعاف و نقلوه ديراكت للمستشفى .. بعد ما وصلو دخلوه لغرفة العمليات و قعد هيثم يسنا تما .. بعد مدة وصلو عايلتو .. دخلت يماه تبكي ( زهرة ) .. باباه ميت .. و دخلو مجموعة من عمومو تما ..
زهرة : هيثم وشبييه وليدي .. وشبيه ..
هيثم : يما متخافيش ماشي حاجة كبيرة هدي روحك ..
حاول يهديها قدر المستطاع .. كي مقدرش عيط للممرضات ( تحيااا صديقاتي فالعمل هههه راني ممرضة بالاكو تغلطو ) يحقنوها بمهدئ .. و بالفعل حقنوها و حطوها فغرفة وحدها .. و بقاو يسناو عملية معاد تكمل ..
وصل سماعيل عند جابر بعد ما جابلو طونوبيل .. خلاها عند الدخلة تاع المكان هاداك لانو فيه دخلة ضيقة طونوبيل متدخلش ..
و راح عند جابر ..
سماعيل : اغا راني جبت طونوبيل ..
فاق جابر من سرحتو و افكارو لي كان فيهم ..
و تقدم لعند حسناء .. رفدها بين يدو و بدا يمشي بيها متوجه لسيارة لي جابها سماعيل .. و سماعيل يمشي موراه ..
سقساه بتردد و هو خايف من اجابتو ..
سماعيل : آغا كيفاه راح دير معاها ..
نطق جابر بملامح بااردة عكس حالتو الداخلية ..
جابر : عادتنا و تقاليدنا يقولو لي يخون الشرف يقتل .. و هادا لي راح يطبق .....
#ليلوشة
-----------------
اوبالاتي 🔥
غنو لاي لاي لحسناء ههههه راحت عليها يا جدكم .. فرايكم واش راح يصرا باش تمنع من قرار خوها .. ولا زعما يلين قلبو عليها .. و معاد واش راح يصرا فيه .. و المواجهة بين الاغا هيثم و الآغا جابر كيفاه راح تكون زعما .. راح طيح الروح مرة وحدوخرا ؟؟
خلووولي توقعاااتكم طواااال عراض .. الحلقات بالنسبة لليوم خلاص .. نتلاقاو غدوة ان شاء الله فحلقات جدد و احداث جدد و طبعا متنسااوش تهلو تعليق هنا باش نديرلكم جادوغ .. غير تشوفو جادوغ تاعي اعرفو بلي حطيت ❤
#ليلوشة