👑 حسناء الآغا 👑

|| الحلقة 59 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 59 Il
ضحكت بالصوت غير سمعت واش قاللها .. مسحت دموعها باش ميشوفهمش و خذات نفس عميق و هدرت بصوت كلوو رعشة .. و منو كانت تبان بلي لبكا غالبها ..
حسناء : حتا انا مانيش قاتلة روحي على واحد كيما نتا .. نسخة طبق الاصل على خوك .. حتا انا قبلت بيك بسيف خاطرش لوكان جيت راجل متهددنيش بخويا ..
معا كلمة نتا ماشي راجل ولا عبد وحدوخر .. زاد تحول .. نحا السيروم من يدو بقوة .. و ناض من بلاصتو متوجه ليها و عينيه ظلمة ..
شافتو نايض ليها هكاك ولات تشهد .. الرعشة سرات فبدنها .. عينيها تغرغرو بدموع فوق ارادتها .. تفكرت مشهد باباها و هو يضرب فيها ..
غير وصل عندها تبسمت بضعف تسنا فيه يضربها ..
راح عندها معول يضربها على هدرتها .. غير وصل عندها و شاف ابتسامتها و نظرتها لي تقطع القلب .. و رعشة شواربها خبط الحيط لي كان موراها .. غطات وجها بيدها ..
نظرتها كانت كالمخدر ليه .. بين ثانية و ثانية رجع كيما كان ..
نحات يدها من وجها و طلعت راسها خزرت فيه بعينيها لي كانو حمووورة و معمرين دموع .. نيفها كان حمر و شواربها يرعشو .. نظرتها فسرتلو كمية الظلم لي قاعدة تتعرضلها .. فسرتلو خيبتها و المها ..
فهاديك دقيقة رجع هيثم لي يحبها .. فاق على روحو واش هدر معاها و واش قاللها .. قلبو وجعو .. كره روحو .. عينيها و نظرتها قتلوه ..
كان راح يعنقها اما رجعتلو نفس الحركة لي دارهالها .. ضربتلو يدو بيدها .. عقدت حواجبها و رفدت صبعها تهدد فيه رغم ضعفها و خوفها اما تبقى شخصيتها قوية ..
حسناء : رد بالك تمسني .. ياك انا لخم** تاع خوك و نتا الطاهر الشريف .. روح عند مرتك مادام هادي بيتي عندي حرية التصرف فيها ..
و جازت عليه متوجهة للبالكون و خبطاتو فكتفو .. خرجت اه من فمو .. وجعاتو .. حبست كانت راح دور ليه تشوف جرحو .. اما رجعت كملت طريقها للبالكون و تجاهلاتو ..
عدا يدو على وجهو بندم .. ماشي عارف واش صرالو اما فكرة انو مسها واحد قبلو مهبلاتو و خاصة كي ماشي فاهم لحكاية .. صرااع بين قلبو و عقلو .. و فالاخير ربح عقلو و ربحت فكرة انو حسناء كانت عشيقة خوه و هو تزوجها برك باش يستر عارهم و متوليش سيرة معاد فلسان العشيرة .. اقنع روحو بلي هي اغراتو و بلي ميحبهاش و ميتأثرش بيها .. اقنع روحو بلي حيزية هي مرتو و هي لي راح تكون يمات ولادو و حسناء زيادة فحياتو ( اكدولي على يمات ولادو 💔 راح تتخلط حزن شديييد قادم .. )
رجع لبلاصتو بلعقل لانو جرحو وجعو بعد ما خبطاتو حسناء ..
تكسل ففراشو بلعقل و حط راسو على لمخدة .. اما حسناء بعد ما خرجت للبالكون كان البرد يقتل و هي كانت لابسة غير بيجامة خفيفة .. اما هكاك و قعدت تما ..
قعدت فوق كرسي تما .. دموعها غلبوها قاعدة تبكي و تحاول تكتم فشهقتها .. طلعت راسها تخزر فالنجوم .. تحسهم يفهموها .. اما ترتاح نفسيا و هي تشوف فيهم .. توجعت بزاااف و عيات من الناس عيات من عايلتها كامل و عيات من هيثم و عيات مالدنيا .. حابة تروح بلاصة مافيها حتا واحد .. هي برك .. كل هاد الافكار قاعدين يدورو فراسها ..
استغفرت .. مسحت دموعها و بقات تخزر فالفراغ هكاك و تتفكر بزاااف مواقف جازو عليها فحياتها تظلمت فيهم و مزالت تتظلم ...
نرجعو عند هيثم لي كان يخزر فالسقف .. صورتها تحت معاد محبتش تروح من بالو .. ترسخت فذهنو .. و هو هكاك دخلت حيزية .. خزر لجيهة لباب لقاها هي .. هدرت ..
حيزية : نقدر ندخل ..
هزلها براسو بمعنى ايه .. قرر انو يعاملها مليح و يحاول يحبها كيما تحبو ..
دخلت تتلفت براسها تحوس على حسناء ملقاتهاش .. رجعت خزرت فهيثم و هدرت ..
حيزية : سمعت عياط و خبيط حبيت نجي نطمن عليك ..
هيثم : راني مليح .. عاونيني نروح معاك للغرفة ديالك ..
عينيها لمعو بفرحة .. مفهمتش واش صرا اما متأكدة لي صرا لصالحها .. بقا برك تحاول كيفاش تحمل منو بولي العهد و يورث كلش عليه و ترجع هي سيدة العشيرة ( اييه هادا هو تخمامها ملول حبها للمال و التحكم كتر من حبها لهيثم ) .. دارت روحها انها راهي تخمم عليه ..
حيزية : و سيروم و دوا ..
هيثم : معليش اديني .. كي كاش ما نسحق تجي هي للهيك دير واش لازم و ترجع تروح ..
راحت تجري ليه .. حاولت ترفدو مقدرتش .. تفكر حسناء كيفاه رفداتو و كيفاه عنقها .. اما تمتم نفض مخو من هاد الافكار ..
هيثم : عنقيني و ارفديني ..
حيزية : اوك .. عنقاتو باش ترفدو ..
و هوما هكاك دهلت حسناء تجيب حاجة تغطي بيها روحها لانو بردت ..... ( قلبي وجعني 💔 )
#ليلوشة
—————————————————
اوبالاتي 💙
قلتلكم الحزن قااادم .. فرايكم حيزية راح تقدر تحقق مخططها .. سورتو معا هيثم راهو يبعد على حسناء فرايكم راح يديرها .. و حسناء كيفاه راح تكمل تصبر .. نفسيتها تقدر تتحمل ولا راح تخرج فصحتها .. و قولولي الا ندخل المافيا و نزيد نطولها شوية ولا لالا ..
معلاباليش الا نزيد حلقة وحدوخرا نعست لبارح مرقدتش هههه مي الا قدرت منبخلكمش
#ليلوشة