👑 حسناء الآغا 👑

|| الحلقة 15 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 15 Il
وقف من بلاصتو مصدوم .. تعصب شوية اما هدا روحو و هدر معاه ..
صالح : راك تسمع واش راك تهدر .. هوما لي قتلو خووك هبلت ..
هيثم : لالا عمي مهبلتش نظن تعرفني ماندير حتا حاجة لوكان متكونش كاين سبة مقنعة ..
صالح : ماتقولي والو .. الخطبة هادي نحيها من بالك .. مكاين حتا سبة تقنعني بيها ..
و جا رايح متوجه للقصر .. اما حبسو صوت هيثم وقت لي هدر ..
هيثم : معاد اغتصبها على هاديك قتلوه .. ( كامل دايرين فبالهم بلي حسناء فقدت شرفها ) ..
معا حملتو هادي حبس فبلاصتو .. كأنو قاعد يستوعب لي قالو ..
دار ليها و هدر ..
صالح : ك كيفاه .. معاد اغتصبها .. مستحيل معاد يعمل هاكا ..
هيثم : يا عمي عملها و شفتو بعيني .. لوكان قالولي بالاك اما شفتو .. و انا لي هزيتو كي تيرا عليه جابر ..
صالح : مفهمتش اقعد احكيلي دوك كلش ..
رجع قعد صالح معا هيثم و بدا يحكيلو ..
هيثم : يا عمي هاداك النهار خرج معاد شارب .. خفت عليه .. ديت رجالي و رحت موراه .. وصلنا لبلاصة خالية و قليل لي يعرفها انا واحد مكنتش نعرفها ..
دخلت ليها و تبعت الاثر حتا وصلت لعند صخرات كبار تما .. سمعت الحس قلت بالاك معاد كاش ما راهم يديرولو .. دخلت بسرعة لقيت معاد فيقها و هي فاقدة الوعي و جابر موجه سلاحو لمعاد .. ملحقت ندير والو كان جابر ديجا تيرا عليه و فرغ سلاحو كامل فيه .. يعني لوكان نولو نشوفو معاد هو سبب فالحرب لي شعلت من جديد ..
صالح : و هو وين يعرفها .. و واش جابها لعندو .. كيفاه عرف راح تكون تما ..
للحظة سرح معا روحو .. قاعد يهدر بينو و بين روحو ..
هيثم : صح كيفاه غابتلي هادي من بالي .. من وين يعرفها معاد .. كيفاه حتا تلاقاو تما بالضبط و فنفس الوقت ..
فيقو من سرحتو صالح كي رجع هدر ..
صالح : جاوبني ..
هيثم : مرانيش عارف عمي .. واحد معلابالو الا هو و هي ..
صالح : و علاه قررت تتزوجها ..
هيثم : لانو كانو راح يقتلوها .. و هي ماعندها حتا ذنب ..
صالح : و من وقتاش نتا تخمم فبنات متعرفهمش .. و خاصة بنت عدوك .. واش دخلك فيهم ..
رجعو الافكار يدورو فراسو مرة وحدوخرا ..
هيثم : صح عمي عندو الحق و انا واش دخلني .. كيفاه خرجت مني كلمة نتزوجها بلا منحس .. فيمن كنت نخمم ..
نفخ بعصب .. عدا يدو على شعر و رجع هدر ..
هيثم : عمي تجي معايا ولا لالا ..
صالح : نتبعك و نشوفو واش يصرا .. نوض على بركة الله ..
ناضو ثنيناتهم .. ركبو فطونوبيل وحدة و راحو متوجهين لعشيرة آل ضافر ..
نروحو لعند عشيرة آل ضافر .. بعد ما فاقت .. عملت دوش خفيف .. لبست روبة بيضة طويلة لتحت الركبة .. هزت شعرها طوماطيشة و بقاو خصلات منو طايحين على طرف وجها ..
و راحت لمكانها المعتاد .. قاعد عند التاقة و تخزر لسما .. تحس براحة نفسية كي تشوفها .. تحس بلي رحمة ربي مراحش تنقطع عليها .. تحس بالحرية ..
سمعت صوت لباب القصر تحل .. لانو تاقتها فوق باب القصر سواسوا ..
خزرت بتخبية شكون لي خرج .. شافتو باباها ..
حتا سمعت تيليفونو صونا .. كانت راح تدخل اما حاجة منعتها و خلاتها تتصنت عليه ..
سلمان : الو ..
هيثم : اهلا نسيبي ..
سلمان : شكون معايا ..
هيثم : اهااه نسيبي عيب عليك معرفتش راجل بنتك ..
سلمان : هيثم .. واش تحوس ..
غير سمعت اسمو قلبو دق بالقاوي .. زادت ركزت معا الحديث اكثر ..
هيثم : راني جاي نخطب بنتك دوك .. عيطت باش نقولك .. عيب نجي بلا منخبرك ..
سلمان : تخطبهااا ...
و معا كلمتو الاخيرة شهقت .. شهقتها خلاتو يطلع راسو يشوف مصدر صوت .. اما تمتم تخبات .. حطت يدها على قلبها و هدرت ..
حسناء : ليوم نهرب .....
—————————————————
اوبالاتي 🥺
اعذروني على تأخري ولله راني مريضة حتا تيليفون مرانيش نرفدو بزااف و مام فلقروب مرانيش نحط بزاف الله غالب نرتاح شوية و نرجع نحطلكم بزااف ..
المهم فرايكم واش راح يصرا فالحلقات الجايين حسناء تهرب ولا لالا .. و الا هربت شكون يصيدها هههه وجدو روحكم نسيبكم راحو جاي يخطبها وجدولنا حلوة شابة 😂
خلولي تعليق هنا غير نزيد نحط نجمجملكم عليه
#ليلوشة