👑 حسناء الآغا 👑

|| الحلقة 78 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 78 Il
هيثم : تدخلي ديري ليزاناليز بلا حس .. متخلينيش نضرب ر** هنا ..
خزرت فيه بتحدي و هدرت ..
حسناء : ياك انا امانة خوك معندكش الحق تمسني ..
هيثم : راح تهبليني علابالك ..
حسناء : مليح .. اطلقني ..
و بقات تفرفط بين يديه .. كبس عليها لحضنو اكثر و مشا بيها للغرفة .. حطها فوق الكرسي .. و بعد عليها ..
جات ليها الممرضة .. و بدات تنحيلها فالدم .. قعد هيثم تما يراقب فيها و هي كانت تتجنب تخزر فيه ولا طيح عينها فعينو ..
كملت نحاتلها الدم .. و قاتلهم بعد خمس ايام يرجعو يدوهم ..
راح هيثم بلا ميهدر رجع رفدها بين يديه .. حاولت تبعد مقدرتش ..
حسناء : حبطني نعرف نمشي ..
هيثم : طبيب قال لازملك راحة .. و زدتي نحيتي الدم دوخي ..
حسناء : هههه لي يسمعك يقول راك خايف عليا ..
هيثم : لالا مرانيش خايف عليك راني خايف على وليد خويا ..
و زير على كلمة وليد خويا ..
رجعت سكتت و بقات تراقب فالناس لي كانو يجوزو عليهم و يخزرو فيهم .. للحظة حشمت .. للحظة سرحت فتفكيرها انو راهم خارجين فرحانين و انها حامل من هيثم ماشي من معاد ..
تبسمت بلا متحس .. اما تمتم فاقت على روحها .. نفضت راسها مالافكار لي قاعدة تحيها و هدرت معا روحها بصوت مسموع ..
حسناء : يهديك ربي يا حسناء ..
خزر فيها مستغرب .. عقد حواجبو و هدر و هو يخزر فيها ..
هيثم : وشبيك .. كاش ما راهو يوجعك ..
حسناء : والو كنت نهدر معا روحي و معندك ما دخلك فيا ..
نفخ بالقاوي و هدر بينو و بين روحو ..
هيثم : يا ربي صبرني عليها ..
وصلو لطونوبيل ..حطها معاه مالقدام .. و ركب هو تان و بقاو تما يسناو حيزية ..
حسناء : مزال طول ..
هيثم : راهي جات ..
خرجت حيزية مالسبيطار بسرعة و توجهت للطونوبيل .. لقات حسناء راكبة مالقدام ..
عقدت حواجبها و عصبت .. طلعت ملور و هدرت ..
حيزية : خطرة الجاية اركبي ملور تما بلاصتي ..
كانت راح تهدر حسناء اما قطع عليها هيثم وقت دار متبسم لحيزية و هدر ..
هيثم : سمحيلي حبيبتي انا غلطت حطيتها هنا ..
خزرت فيه حسناء مصدومة من كلمة حبيبتي .. اما حيزية السعادة قريب دارتلها سكتة قلبية ..
فتحت الباب حسناء و حبطت .. خزر فيها هيثم و هدر ..
هيثم : وين رايحة ..
هدرت بلا متخزر فيه ..
حسناء : راجعة لبلاصتي .. و فتخحت الباب تاع لور و ركبت .. متوقعش انها تحبط .. هدر هكاك باش يقلقها خاصة انو قرر يتعامل معا حيزية على اساس انها مرتو ..
حبطت حيزية .. ركبت مالقدام و قلعو .. بقات حسناء تخزر مالكارو و هيثم يخزر فيها فالمرايا ...
حتا نطقت حيزية ..
حيزية : هيثم شفتهم هادوك ليبيبي شحال يهبلو .. لعاقبة لينا انا وياك ان شاء الله ..
هيثم : عن قريب ان شاء الله..
طلعت راسها بصدمة و طاحت عينها فعينو فالمراية ....
#ليلوشة
—————————————————
اوبالاتي 👑
شكلها حسناء راح تولي تحااارب وحدهااا .. منا للنهار تحاليل راااح تتخلط بيناتهم 🤣
حطووولي توقعاتكم طوااال عراض هنا نروح نكتب لي موراها و نجي بديت بكري كتعويض على لبارح
#ليلوشة