👑 حسناء الآغا 👑

|| الحلقة 108 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 108 Il
بحركة خفيفة تيرا محمد على هيثم و حتا هيثم تيرا فنفس الوقت .. رصاصة هيثم قاست فطونوبيل .. اما رصاصة محمد كانت متوجهة لهيثم .. اما قفز فوجها عصام و جات فيه .. خلاتو يطيح فلرض .. محمد طلع فطونوبيل و طار بيها .. و هيثم مهتمش بمحمد قد ما خاف على عصام ..
راح يجري ليه .. ركع على رجليه و حبط ليه .. حط يدو فبلاصة الرصاصة يضغط عليه باش مينزفش بزاف .. و بدا يهدر معا عصام ..
هيثم : عصام متغمضش عينك ابقا معايا متخافش ..
كان يتنفس بصعوبة .. قطعتلو النفس .. جات الرصاصة قريبة لصدرو .. و كان ينزف بقوة ..
هيثم : ابقا معايا عصام ..
خاف عليه .. عصام ماشي مجرد شخص يخدم عند هيثم و خلاص .. رجع خوه و صاحبو .. يحكيلو كلش واش يدير .. ثقتو فيه كبيرة و يشوفو كأخ ماشي كخادم ..
تجمعو رجال هيثم تما مقلقين على عصام .. بعد ما عيطو لسيارة الاسعاف لانو اصابتو كانت شوية خطيرة ..
لحق الاسعاف و زهرة و حيزية واقفين عند الباب يخزرو ..
طلعو عصام فسيارة الاسعاف و طارو بيه للسبيطار ( كتر السبيطار فاليامات لخرين احمودة ههه ) ..
طلع هيثم فالطونوبيل و طار موراهم هو تان .. و نسا كامل حكاية محمد .. تخمامو كامل رجع فحسناء و عصام ..
وصلو للسبيطار و دخلو عصام باش ينحولو الرصاصة و يعقمولو جرحو .. كان مزال فاطن شي لي خلا هيثم يرتاح شوية ..
الوقت لي كان فيه عصام داخل العملية .. هيثم راح لعند حسناء ..
نرجعو للقصر عند حيزية لي كانت فغرفتها تهز فاغراضها باش ترجع لدار باباها ..
كانت حاط فاليزات تعمر فيهم بحوايجها .. نظرتها نظرة شر .. الدوزان قاعدة تخبط فيهم على قد ما تقدر ..
قاعدة تمتم بين شواربها كي المهبولة ..
حيزية : الا ممتيش يا حسناء انا لي نقتلك .. لوكان ماشي نتي لوكان دوك مزالني مرت الاغا و راني حامل بالوريث الشرعي ليه .. اما تندمي عليها .. راح نرجع لي ديتيهولي .. و الا مقتلكتش منتسماش حيزية ****** ..
كانت معصبة علخر .. الحقد و الطمع عماولها عينها .. محمدتش ربي على واش عندها .. محاولتش تكسب راجلها بالتي هي احسن .. سواءا حبت ولا كرهت تبقى حسناء مرتو و ربي شرعلو يتزوج زوج و ثلاثة و ربعة .. يمكن هي خذاها علاجال يماه و هي خذاتو علاجال الجاه المال و الاملاك .. اما هو خذا حسناء عن حب ..
بعد مدة كملت رفدت دوزانها .. عيطت للخدامات حبطوهم للتحت ..
حبطت هي تان قابلتها زهرة لتحت .. كانت قاعدة فالصالون تخمم فهدرت هيثم ..
قاعدة تتعاود فراسها .. فهاديك اللحظة بدا ضميرها يأنبها على لي عملاتو فوليدها و غصباتو يتزوج بوحدة ميحبهاش و من فوقها لي يحبها ظلمتها و قهرتها و راهي دوك بين لحياة و الموت ..
فيقها من سرحتها حيزية كي هدرت ..
حيزية : راني رايحة ..
خزرت فيها بلا مترجعلها ملقات تعصب عليها ملقات تعصب على روحها كي تبعتها ..
رجعت حبطت راسها .. اما حيزية رجعت هدرت بعصب و بالعياط ..
حيزية : خلاص سمحتي فيا .. ولا تكون غضاتك هاديك الخ**** .. كي نتي كي وليدك سلعة وحدة .. ( بدات تربح فالعيب )
ناضت ليها زهرة .. توجهت ليها ساكتة .. و غير وصلت ليها خبطتها بكف بلا متحس و هدرت بكل قهرة ..
زهرة : الانتقام و الحقد عمالي عيني .. و نتي باش تفيقيني لالا استغليتيني و خليتيني نولي شريكة فالجريمة على كبري .. الطفلة صغيرة و معندها حتا دخل فلي صرا .. ربي يغفرلي و يغفرلك و تسمحلنا .. دعوة المظلوم واعرة .. فيقي على روحك قبل ما تندمي كيفي .. يمكن فقت روطار يمكن خسرت ولدي اما انا يماه يجي وقت و يسمحلي و نتي راح يسمحلك !! راح تسمحلك حسناء ..
حيزية : منسحقش يسمحولي .. و راح يندمو على فعلتهم سمعتي ..
و خرجت و خبطت الباب بقوة ....
#ليلوشة
—————————————————
اوبالاتي 💙
تعرفووني بلا نفرحكم بصح موور الفرح وااش يجي ههههه .. ليوم لانيفاغساغ تاعي بالاك منديرلكمش بظاف حزن هههه مهم حطوولي توقعاتكم حيزية و محمد واش راح يديرو كتلة من الشر فوق الارض ..
جمجمو هاادي نروح نكتب لي مورااو نجي نحطها ..
#ليلوشة