👑 حسناء الآغا 👑

|| الحلقة 14 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 14 Il
صالح : انعم وليدي واش قلت ..
هيثم : والو كنت راح نقول اسمها سبقتني يما ..
صالح : ايه مبقاش و نتعرفو عليها .. المهم وليدي انا و عمك كريم حبينا نسقسوكم فموضوع ..
هيثم : انعم اتفضل عمي ..
صالح : تفاهمنا باش ننقلو لهنا للقصر و نكملو نعيشو هنا باش ميفرغش و ترجع لمتنا كيما كانت طبعا الا ماعندكش مانع ..
هيثم كان راح يرفض لانو علابالو كل ما كثرو الغتشي فالدار المشاكل يكثرو اما قبل ما يهدر نطقت زهرة ..
زهرة : ولله يا صالح مادابيا تعمرو عليا دار و منحسش بالفراغ احسن ما عملتو ياك صح هيثم ..
حطاتو تحت الامر الواقع و بعد ما شاف حماسها و فرحتها مقدرش يرفضلها طلبها ..
هيثم : اكيد مرحبا بيكم فاي وقنت .. الدار داركم ..
صالح : مالا على بركة الله من غدوة ان شاء الله نبداو النقل ..
هيثم : ان شاء الله ..
و هوما هكاك بدا صوت الزرنة برا .. و الرجال يسفقو ..
صالح : يلاه وليدر وقت حنتك ..
ناضو الرجال خرجو برا .. و نسا يطلو عليهم لانو عندهم ممنوع الاختلاط ..
غير خرج هيثم مالباب لابس برنوسو تقلبت الحالة بصوت الرصاص و لعياط و صوت الزرنة زاد قوا ( اتخايلو المنظر يا عمري 🥺 تخايلتو زوجي قرة عيني الذي يأخد بيدي الى الجنة هههه ) ..
قعد فكرسي مقابلاتو طابلة فوسط الساحة و رجال دايرين عليها و صوت الرصاص محبش يحبس ..
بعدها حبس صوت الرصاص ..
بدا عمو صالح يهدر شوية عليه و شوية على الزواج ... الخ .. بعدها قعد قدامو و هز الحنة و دارلو فصبعو .. و انطلق الرصاص و انطلقوا صوت زغاريت ..
ناض هيثم يشطح على حصانو .. و هاز فيدو موكحلة ( بندقية ) و مرة على مرة يتيري منها ..
رغم انو كان يشطح و متبسم الا انو مقدرش يمسك روحو و ميحزنش على خوه .. قدما حاول مقدرش ..
كملو السهرية بين قصرة و شطيح و فرحة بالآغا لي راح يتزوج بعد ما دارو فبالهم انو ماشي ناوي يتزوج لانو وصل عمرو 35 سنة و عندهم فالعشيرة يزوجوهم صغار فالعمر ..
تعدات السهرية و كل واحد راح لغرفتو .. دخل عمل دوش نحا بيه تعب ..
لبس شورت تاعو بلا ميلبس تريكو و تكسل على فراشو ..
المور تخلطت عليه اكثر .. ماشي عارف واش راح يدير .. لحد الآن ماشي عارف علاه قرر يتزوج بحسناء .. ميعرفها متعرفو .. اول مرة تلقاو وقت لي كانت تحت خوه مغمى عليها .. يكمن عرف بمصيرها الشي لي خلا ضميرو يأنبو لاول مرة و يسلكها مالموت ولا يمكن تأثر لدرجة كبيرة بلي صرا من قبل لدرجة قرر يتزوج بنت عدو و ميخليهش يتكرر مرة وحدوخرا .. و حيزية كيفاه راح تكون ردة فعلها كي يجيبلها ضرة .. كيفاه راح يقنعها ..
افكار كلها تجي لمخو و يحاول يتخلص منها اما مقدرش .. غمض عينو باش يرقد جات صورة حسناء قدامو .. صورتها و هي تخزر فيه .. عندها حسر خااص .. نظرتها كي المغناطيس تجذبك .. رغم انو ما بدر منها حتا فعل يخليه يخمم فيها اما هو فكل مرة تجي فبالو و هو شايفها مرتين فحياتو لا اكثر لا اقل ..
قعد هكاك كل مرة يتفكر و يتقلب فبلاصتو حتا رقد ..
حسناء مقدرتش ترقد .. خرجت للبالكون و قعد تشوف فالنجوم ..
حسناء : يا ربي مرانيش حابة نتزوج .. محبيتش يصرا هاكا .. علاه واحد ماحب يفهمني علاه محاولوش يسقسوني واش صرا ..
تغرغرو عينها بالدموع .. اما مسحتهم قبل ما يطيحو و وعدت روحها مطيحش دموعها ماليوم و تكون قوية لانو لي راح ديرو يتطلب انها تكون قوية و متخافش ( ايا نضحكو معلابالهاش واش راهو جايها اضحك اضحك 😂 )
رجعت لفراشها و و قاعدة تحاول ترقد حتا رقدت ..
جازت هاديك الليلة بهدوء .. و وصل النهار ..
ضربت الشمس فوجهو .. فتح عين و عين غالقها .. شعرو داخل فبعضاه .. راقد على كرشو ..
رما يدو لتيليفون و شاف ساعة .. كانت العشرة .. عندو شحال مرقدش لهاد الوقت .. قام مبلاصتو .. عمل دوش خفيف و خرج .. لبس لبستو الكحلة كالعادة سروال كحل .. شوميز كحلة .. نواضر كحولة و خرج ..
حبط للتحت لقا صالح قاعد فالطابلة لي فالجنينة ..
راح قعد قدامو ..
هيثم : صباح الخير عمي ..
صالح : صباح الخير عريسنا ..
تبسم معاه فوق القلب .. الكلمة هادي تلعبلو على المورال ..
صالح : اتفضل وليدي اشرب قهوة ..
هيثم : لالا صحا عمي .. عندي موضوع مهم حاب نهدر فيه معاك و نتمنى يبقا بيناتنا ..
صالح : خير وليدي ..
هيثم : بدون لف و دوران حابك تجي معايا نخطب ..
صالح : تخطب ؟؟ علاه مزال مخطبتهاش ..
هيثم : حيزية خطبتها ايه ..
صالح : مالا شكون تخطب ..
هيثم : حسناء آل ضافر .....
#ليلوشة
————————————————
اوبالاتي 🔥
اولا راني نكتب مزال كاين حلبات نزيد نحطهم اصبرو عليا شوية ..
ثاانيا فرايكم واش راح تكون ردة فعل صالح .. راح يوقف معاه ولا يكون شخصية شريرة .. و حسناء راح تفوت الخطبة عادي ولا نن ..
كيفاه راح يكون اللقاء فالخطبة .. حطوولي توقعاتكم طوااال عراض و خلولي تعليق هنا غير نزيد نكتب نحطلكم جمجموم عليه باش تعرفو بلي حطيت ..
#ليلوشة