👑 حسناء الآغا 👑

|| الحلقة 30 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 30 Il
جابر : حسنااااء .. ر** نوضي ..
ناضت مفجوعة .. و تخزر يمين و يسار ..
حسناء : بسم الله واش صرا ولله مادرت والو .. هو ولله هو يا جابر ..
خزر فيها مستغرب من هدرتها و هدر ..
جابر : شكون هو و واش دار ..
بلعت ريقها بهدوء وقت لي مشافتش هيثم .. و هدرت ..
حسناء : والو انسا ..
جابر : واش كنتي ديري معا هيثم ..
طلعت راسها بصدمة ليه .. عينيها تحلو على وسعهم .. يعني شافو .. اما كيفاش مجاش يضربني .. اكيد مخبروش لوكان خبرو راهو قتلني دوك ..
حاولت تهدي روحها و هدرت معاه و هي محبطة راسها ..
حسناء : كيما حكالك ..
جابر : ايه و واش حبطك للجنان و علاش دختي ..
حسناء : تغميت حبطت نشم هوا هادامكان .. ( ظهرت ذكية الداندو ) ..
جابر : اوك ردي بالك ..
استغربت منو كيفاش قاعد يتعامل معاها برزانة .. اول مرة ميسبهاش ولا ميعيطش عليها بعد الحادثة .. خرج و غلق لباب موراه .. خزرت فالتاقة و هدرت مستغرب ..
حسناء : ياا درا واش صرا باس راهو انسان هادي ..
سكتت شوية اومبعد تمتم تفكرت هيثم و واش صرا معاه .. خدودها حماروا مالحشمة .. تفكرت كي عنقها .. تفتحو عينها على وسعهم .. حطت يدها على فمها متبسمة و هدرت ..
حسناء : قالي يا روحي ...
كانت راح تنوض تبدا تسوطي .. اما رجعت قعدت خبطت روحها بكفوف خفاف تصحي فروحها و هدرت معا نفسها ..
حسناء : افطني على روحك راح طيحي فنفس غلطت معاد .. وشبيك افطني .. نفس العقلية و نفس الدم يجري فيهم ..
رجعت شعرها للور حركة تعملها وقت لي تكون تخمم .. ناضت من بلاصتها و دخلت للدوش .. تعمل حمام باش تصحصح ..
نروحو عند هيثم لي هز حصان تاع حسناء و راح بيه طاير .. كان معصب لاقصى درجة و مش حاس بروحو .. وصل للقصر تاعهم .. و دخل للبيرو و خبط الباب موراه ..
قعد فكرسيه و حط يديه على راسو يخمم كيفاه راح يدير .. فكرة وحدة قاعدة دور فراسو .. ماشي من عادتو يخدع الناس و يحطهم تحت امر الواقع اما هاد المرة مضطر .. عارف بلي حيزية و حسناء فيزوج راح يزعفو اما حيزية اكثر لانو من صغرها تحبو و امو هي لي خطبتهالو و هو اضطر يوافق و ميقدرش يرجع فكلمتو لي عطاها .. راح يفقد هيبتو داخل عشيرتو و خارجها ..
قعد مدة و هو يفكر .. اما معا لخر قرر يغطس فاوراق خدمتو و يحاول ينسا الواقع .. بعد مدة قصيرة كانت حسناء خرجت مالدوش .. لبست حوايجها .. روب زرقة فيها ياسمينات لونهم بيض .. و شعرها نشفاتو و حطت عليه سيغتات .. كانت تبان طفلة صغيرة لي يشوفها ميقولش فعمرها 24 سنة ..
حطت شوية من بارفانها .. حتا سمعت صوت حس لتحت و صوت حركة .. فتحت باب غرفتها و سمعت صوتها .. ايه صوتها .. توحشااااتووووو ..
حسناء : ماماااا ..
و حبطت تجري .. الفرحة مش سايعتها اول مرة تتوحشها لهاد الدرجة رغم انهم ماشي قراب بزاف لبعض ..
وصلت ليها و عنقتها على قد ما تقدر ..
هدية : خيير حسناء واشبيك ..
طلعت راسها و خزرت فيها ببراءة و عينها يلمعو ..
حسناء : توحشتك برك .. طولتي بزاف ..
بعدت عليها بلعقل و هدرت و هي تخزر مور يماها تحوس على جدتها..
حسناء : و ماني وينها ..
هدية : خليتها تما عجبها الحال ..
حسناء : اااا خسارة توحشتها ..
كانت راح تسقسيها هدية اما قطع عليها صوت جابر و هو حابط فالدروج معا سمر و هوما فرحانين ..
جابر : اووو رجعت البركة للدار ..
و راح ليها عنقها و باسها من راسها ..
تقدمت ليها سمر و عنقتها هي تان و هدرت ..
سمر : توحشناك ماما هادي غيبة .. ( الا مفهمتوش عجوزتها تعيطلها ماما ) ..
هدية : الله لا يغيبك بنتي .. اما راكي صفرة و شينتي خير ان شاء الله ..
خزرت هي و جابر فبعضاهم و تبسموا .. غمضتلو عينها و رجعت فتحتهم بمعنى انو نتا خبرها ..
خزر فيماه و الفرحة مش سايعاتو و هدر ..
جابر : راهي اونسانت بتوام يما ..
حسناء خزرت فسمر ميتة بسعادة و هدية طلقت تزغريتة العشيرة كامل سمعتها .. رجعت عنقت سمر و هدرت ..
هدية : مبرووك مبرووك عليكم بنتي .. حمدلله الفرحة رجعت فرحتين .. خطبت حسناء و حمل سمر ..
خزرت فيها حسناء مستغربة مكانتش علابالها بلي يماها عارفة بموضوع لخطبة .. و راهي قابلة تان .. لي تعرفو انو متحبش سيرة عايلتهم تتجبد فدار ..
حسناء : تسما راكي قابلة ماما ..
هدية : ايه و علاش لالا ..
تبسمت باستهزاء و هي مكسورة يعني حتا يماها سمحت فيها ..
حسناء : ماشي على اساس متحبيش اسم عشيرة شعابني يتجبد فالدار و دوك راكي موافقة بنتك تتزوج لعندهم و بيمن بالآغا هههه يعطيك الصحة ..
هدية : ك ك كيييييفااااه ...
#ليلوشة
—————————————————
اوبالاتي ❤
تخلطت ههههه وحدة فيكم تتطوع تقنع هدية تخليهم يتزوجو الواحد راهو ينتظر نهار العرس بخمسطاش عين ههههه حطوووولي توقعاتكم للحلقات الجايين و انتظروني غدوة فليل تان نحط ان شاء الله حطووو تعليق كي نحط نجمجملكم عليييه
#ليلوشة