👑 حسناء الآغا 👑

|| الحلقة 51 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 51 Il
كوبات حسناء مالتيليفون و دارت عند الطبيب و هدرت ..
حسناء : راهو جاي ميطولش يقدر يصبر ياك ..
طبيب : قد ما لحق ابكر قد ما كان مليح ..
هزتلو حسناء برايها بمعنى ايه .. خلاص فشلت مبقات ليها حتا قوة .. راح الطبيب رجع لغرفة للعمليات و هي قعدت فالكرسي تما ..
حالتها مبهدلة .. تخزر فيدها لي معمرين بدم .. صوت الرصاصة قاعد يتكرر فوذنها .. صورة هيثم بين عبنيها محبتش تفارقها .. ثورة اسماعيل و هو غارق فدمو محبتش تخرج من عقلها .. فيزوج معندهم حتا ذنب ..
هدرت بينها و بين روحها و هي تبكي ..
حسناء : انا سبة .. انا .. اسماعيل مات علاجالي .. مات ماعندو حتا ذنب مادار والو مسكين يمكن اسوء حاجة يكون دارها فحياتو انو حبني و هيثم لي بعدتو على مرتو .. يمكن يكون يحبها و تحبو و انا دخلت بيناتهم و كنت سبب فأنو يتصاوب ..
طلعت راسها لسما و تدعي فقلبها و هي مغمضة عينها ..
حسناء : يااا رب عاوني .. يا رب عارفة مراحش تحملني فوق طاقتي اما تعبت .. تعبت عييت ..
رجعت راسها للور و كسلاتو على الحيط و بقات تخزر فالسقف و تخمم .. تبسمت تبسيمة خفيفة وقت تفكرت واش قاللها هيثم و هو بين يدها .. وقتها مكانتش مركزة اما دوك استوعبت .. " هيثم : متخافيش منموتش و شكون لي يعشق فعينيك ..
حسناء : اكيد قالها و هو ماشي فوعيو .. ملحقتش تكمل هدرتها تفكرت خطابو معا اهل عشيرتو .. رسمت ابتسامة استهزاء و هدرت ..
حسناء : شحال تتخايلي يا حسناء .. جهزي روحك للمعاناة ..
و هي قاعدة هكاك دخل جابر يجري .. لمحاتو مالبعيد ٠اي ناضت تجري ليه .. اول مرة تشوف خوها مخلوع كامل هكاك .. و عليمن على اكبر عدو ليه .. اما تفكرت انو كان عندو صاحبو من هاد العشيرة و هي متعرفوش يمكن يكون هو هيثم ..
جابر : وين وين راهو ..
حسناء : دوك نعيط للممرضة تنحيلك الدم و تمدهولهم ..
راحت تجري جابت الممرضة .. دخل معاها جابر للغرفة .. قعد فوق الكرسي و حسناء تخزر فيه .. بدات تنحيلو فالدم حتا كملت .. خزر فيها و هدر ..
جابر : يكفي هاداك ؟؟ زيدي شوية ( حسبتلو شكارة حليب تحمس هههه ) ..
ضحكت الممرضة و هدرت معاه ..
الممرضة : لالا يكفي و يوفي هههه اكيد لي لداخل شخص عزيز عليك ..
جابر : لالا احم ..
خزرت الممرضة فحسناء مالفوق للتحت و هدرت ..
الممرضة : مدام اغسلي يدك الدم نشف فيهم و تحبي نمدلك كاش حاجة تلبسيها يمكن تكوني منزعجة بهاد الغوب بلونش .. ( هاد الممرضة جاية حنينة كيما انا هاكا فالسبيطار احمم ) ..
حسناء : ايه تعيشي ..
ناض جابر و راح قعد برا .. و حسناء راحت معا الممرضة تبدل حوايجها ..
رفد جابر التيليفون و عيط لسمر يطمنها ..
جابر : الو سمر ..
سمر : وي جابر ..
جابر : طمنيهم راني تبرعتلو و ان شاء الله ما يكون غير الخير ..
سمر : حمدلله و حسناء كيفاه راهي ..
جابر : حمدلله راحت تبدل حوايجها ..
سمر : ايا خلاص اومبعد نعاود نعيطلكم ..
كوبات سمر و طمنتهم .. كانت زهرة فطنت .. رجعت تبكي و تحمد فربي .. نطقت حيزية ..
حيزية : يا ربي منين جانا هاد البلا كنا عايشين غايا حتا دخلت السوسة فالوسط ..
نطقت زهرة و هدرت بلعقل ..
زهرة : حيزية ماشي وقتها بعدها نهدرو ..
دارت سمر عند هدية و هدرت بلعقل بيناتهم و هي مزيرة على سنيها ..
سمر : راح نوض نمرمردها الزرمومية هاديك ..
هدية : هدي روحك بنتي ماشي مليح ليك ..
رجع خيم السكوت .. يخزرو فبعضاهم لالتشناف لوكان يطلقوهم ياكلو بعضاهم خاصة زهرة و هدية ..
نرجعو للمستشفى .. حسناء خرجت لابسة جين و تريكو و طلقت شعرها و غسلت وجها رجعت عادية و باش تعبها اكثر كي نحات الماكياج..
راحت متوجهة لجابر حتا شافتو ناض يجري وقت لي خرج الطبيب من غرفة العمليات .. راحت ليهم تجري .. و هدرت ..
حسناء : طمنا دكتوور ..
الطبيب : ....... ( غدوة بربي تعرفو هههه )
#ليلوشة
—————————————————
اوبالاتي 💙
اولااا حطووولي توقعاتتكم لواش راح يقول طبيب ثانيااا كاين رومنسية خفيفة راهي جاية احكولي تشو مثلا كيييفاه ..
ثااانيا ليوم خلاص الحلقات حتا لغدوة ..
ثاالثا غدوة راح نحط اكثر من 5 حلقات بعد ما وصلتو لكرونيك ل 1k جام تستاهلو حلقات بزااافااات
حطووولي توقعاتكم و وجدوولي روحكم غدوة مور المغرب نبدا نحط
#ليلوشة