👑 حسناء الآغا 👑

|| الحلقة 98 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 98 Il
هيثم : واش لي قاعد يصرا هنا .. علاه جبتو الامام ..
خزت فيه زهرة و هي فاتحة عينها قد ما تقدر بمعنى انو نقص حسك ..
خزرت فالامام تحاول ترطب الجو و هدرت و هي متبسمة ..
زهرة : قتلك بلي مزالو معصب .. لحظة نهدر معاه و نرجع ..
فهاداك الوقت هيثم كان يخزر فحيزية خزرة ترعب .. لوكان لقا راهو شبعها طريحة .. نارو مزال مطفاتش منها .. بسبة كذبتها ضرب حسناء و قريب اغتاصبها ..
شداتو زهرة من يدو و هدر بينها و بينو ..
زهرة : امشي معايا لجاردان نهدرو ..
زخر فيها هي زادة بعصب .. و دار بقوة و سبقها لجاردان .. دارت هي غمزت لحيزية طمن فيها و هدرت ..
زهرة : دوك نرجعلكم ..
وصلو لجاردان و هيثم كان رايح جاي معصب علخر .. غير وصلت زهرة عندو وقف فوجها و هدر معصب ..
هيثم : علاه جبتي الامام ..
زهرة : باش يعاود يفتحلكم ..
هيثم : طلقتها و منرجعهاش خلاص .. مشفتييش واش دارت .. بسبتها قريب قتلت روح بريئة قريب اغتصبتها و تهمتها فشرفها و ملفوق ضربتها ..
حطت يدها على كتفو و هدرت ..
زهرة : اعذرها يا وليدي ماشي ساهلة تجيبلها ضرة و وقتاش ليلة عرسها ..
هيثم : اما يا يما قلت بلي اضطريت و نتي عارفة الوضع .. و مفرقتش بينهم علاه دير هكاك .. علاه كانت راح تخليني نندم طول حياتي .. راهي مليحة كنا فسبيطار و مضربتهاش صح ..
زهرة : هيثم اسمعني ..
هيثم : منسمع والو يما ..
و حا رايح راجع لسيارتو .. حبسو صوتها ..
زهرة : الا مرجعتش فتحت عليها منرضاش عليك لا دنيا لا اخرة و انسا انو عندك ام ..
دار ليها .. و هدر بترجي ..
هيثم : يما متعمليش هاكا ..
زهرة : انا هدرت لي عندي و راحت راجعة للقصر ..
تبعها بعينو حتا دخلت .. عدا يدو على شعرو و هدر ..
هيثم : اه يا عمي صالح لوكان راك هنا تعاوني ..
لانو عمومو اضطرو يرجعو لدارهم لانو صراو مشاكل و حاولوا يسرقوهالهم ..
دخلت زهرة و تعابير وجها متتفسرش .. راحت عند حيزية و هدرت بلعقل بلا ميسمع الامام ..
زهرة : مقدرتش نقنعو .. يمكن مراحش يجي ..
خزرت فيها حيزية مصدومة و هدرت ..
حيزية : كيفاش ماما يعني خلاص طلقني ..
هي غير كملت هدرتها تفتح الباب و رجع دخل هيثم بسيف عليه .. مهما كان تبقى امو و لازم يطيعها ..
دخل قعد قدام الامام و هدر ..
هيثم : ممكن نستعجلو شوية ..
الامام : مكاش مشكل وليدي ..
زهرة تبسمت بانتصار و حيزية قريب طارت بالفرحة .. عدلت روحها و هي مبتسمة تسنا الامام يبدا يهدر .. ( اسمعو معلاباليش كيفاش يديرو الفاتحة جامي حضرت راح نخلط برك ساعفوني .. )
الامام : حيزية ****** تقبلي هيثم شعابني زوجا لك على سنة الله و رسوله دون اي ضغط ..
هدرت بحماس و هي متبسمة ..
حيزية : اقبل ..
رجع الامام دار عند هيثم .. خزر فيه و هدر ..
الامام : و نتا هيثم شعابني .. تقبل بحيزية ******* زوجة لك على سنة الله و رسوله دون اي ضغط ....
شرد فيه للحظة .. بقا يخمم .. مقدرش يهدر .. مقدرش يقبل و مقدرش يرفض ..
هيثم : ......
#ليلوشة
—————————————————
اوبالاتي 👑
فرايكم راح يقبل ولا يرفض .. وااش راح يصرا بعدها .. راح يتعامل معاها عادي ولا راح تبدا معاناتها ولا يرجعها لدارهم..
حطووولي توقعاتكم و اجروو للحلقة لي موراها .. راني نكتب و مكاش تريسيتي هههه مكاش حاجة تلتيني راني شاطرة احممم فرحت كي شفت ماما ناضت تمشي حمدلله نفعت فيها تشكة هاديك
#ليلوشة