👑 حسناء الآغا 👑

|| الحلقة 31 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 31 Il
هدية : كييييفاه واش راني نسمع ..
و دارت خزرت فجابر تسنا فيه ينفي واش قالت حسناء .. اما حسناء كانت تخزر بإستغراب .. كانت دايرة فبالها انو امها علابالها بحكاية زواجها ..
جابر قعد ساكت و يخزر فيماه رجعت هدرت بصوت عالي ..
هدية : جااوبني جاابر ..
جابر : يما اقعدي فصالون دوك نجي نحكيلك و تفهمني كلش ..
و دار عند حسناء خزر فيها خزرة ترعب .. خلات الرعشة تسيطر على بدنها و هدر بنبرة حادة ..
جابر : و نتي اطلعي حسابي معاك اومبعد ..
معا كلمتو الاخيرة سمر رمات يدها ليدو كأنو تحاول تذكرو انو وعدها يحسن معاملتو معا حسناء ..
دارت حسناء و توجهت للدروج و عينها معبيين بالدموع .. تعبت و عيات ..
طلعت لغرفتها .. دخلت غلقت الباب موراها بالمفتاح و ترمات فوق سريرها عنقت مخدتها و اطلقت العنان لدموعها .. يمكن ينقصو عليها فلي قاعدة تحس فيه .. و النار لي شاعلة داخلة يمكن ينقصو منها ..
نرجعو عند جابر لي دا يماه للصالون .. قعدت مقابلاتو و رجعت هدرت ..
هدية : جابر علاه مقتليش شكون فتيليفون فهمني و كيفاه تقبلو تمدوها لعشيرة شعابني هبلتو نسيتو واش صرا من قبل ..
تنهد جابر .. كاين بعض الاسرار يماه متعرفهمش .. اسرار اندفنوا بينو و بين هيثم و سليمان برك .. طلع راسو .. خزر فيماه و هدر ..
جابر : هدي روحك و اسمعيني متخلعيش روحك كلش راهو فبلاصتو و عدلنا الحالة خلاص ..
هدية : خير راك تزيد تخلعني ..
جابر : حسناء اغتصبها معاد وليدهم الصغير كامل ..
خيطت صدرها بيدها و هدرت مصدومة .. و وجها صفر .. و قلبها يدق بالقاوي للحظة ظنت انو الناضي راح يكرر نفسو ..
هدية : يا ويلي بنتي ضاعت ..
سمر : ماما هدي روحك .. خلاص راح تفرا ..
جابر : و الآغا هيثم قرر يتزوج بيها باش يتستر عليها .. و فنفس الوقت باش متزيدش تقرا حكاية الثأر لانو قتلت معاد ..
هدية : يااا ربي واشنو هادا لي صراا فغيابي .. كيفاش وصل ليها .. كيفاش اغتصبها .. دخل هنا فالقصر و مفقتولوش ..
جابر : لالا بعيد شوية .. مزال مكملش هدرتو نطقت بعصب ..
هدية : يعني هي لي راحت ليه .. دوك نوريلها بنت لحرام ..
ناضت مبلاصتها طالعة ليها حبسها صوت سمر ..
سمر : ماما حسناء نفسيتها تعبانة .. ماشي ساهل لي راهي تعيش فيه دوك .. على الاقل اوقفوا معاها و ساندوها باش متحسش روحها وحدها .. الاغتصاب راهو فوق طاقتها ماشي بإرادتها هي .. هو راجل و هي مرا و هو اكثر منها قوة يعني اكيد راح يغلبها .. اوقفي معاها تعيشي .. ( ملقري معنديش خويا بصح اللهم زوجة اخ كيما هادي و منزيدش هههه ) ..
كلام سمر خلاها تفيق على روحها .. غضبها سيطر عليها اما كلام سمر رجعها للحقيقة .. لحقيقة انو الاغتصاب فوق طاقة لمرا .. و حتا جابر كلام مرتو مسو فاعماق قلبو .. ندم كي تعامل معاها هكاك .. قاعد يتخايل فخالتها كيفاه كانت و كيفاه راهي .. تذكر ختو صغرونتو كيفاه كان يفششها .. تصعبو و غشو و غلو عماولو عينيه و خلاوه نسخة مصغرة على باباه يخمم غير فالشرف و العادات ..
طاحو دموع هدية .. راحت عنقتها سمر و خزرت فجابر بمعنى انو روح راح نبقى انا معاها .. هزلها براسو ايه .. و خرج مالقصر متوجه للمزرعة باش يقول لباباه بلي يماه جات ..
نروحو عند هيثم لي كان غاطس فشغلو .. حتا صونا تيليفونو .. رما يدو يشوف شكون اما ظهر نيميرو جديد .. ريبوندا عليه و هدر ..
هيثم : الو ..
المرا : الو هيثم ..
هيثم : ايه شكون معايا ..
المرا : حيزية .....
#ليلوشة
—————————————————
اوبالاتي ❤
رحبواااا معانا بحيزية ههههه بلا منوصيكم اكرهوها مي ماشي من دك اعذروهاةحنا تان منقبلوش رجالنا يجيبو ضرة علينا هههه ، فرايكم هيثم كيفاه راح يدير نهار العرس معاهم فيزوج .. كيفاه راح يكون لقاء الضراير .. كيفاه راح تكون ردة فعل عايلة هيثم لانو مراهمش عارفين ..
خلولي توقعاتكم طواااال عراااض ، راهي ربعة تاع صباح رقدت و عاودت نضت نكتبلكم ههه بسك راني بلاقريب الفشلة قتلتني ..
كي نحط نجمحملكم
#ليلوشة