👑 حسناء الآغا 👑

|| الحلقة 54 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 54 Il
وصلت حيزية عند حسناء و طبعتها .. اما حسناء شدت روحها و بقات حاكمة فيد هيثم .. حتا هدر الاجون لي تما لي حبط معاهم هيثم ..
الاجون : مدام من فضلك بعديلنا خلينا ندخلوه ..
حيزية : بعدو هادي منا ..
الاجون : من فضلك نتي لي بعدي هادي راهي مرتو .. ( قصف ارض جو بر بحر كلش ههههه.. ) ..
حيزية : انا تان مر..
مكملتش الهدرة قاطعتها حسناء وقت مشات و طبعتها بكتفها و هدرت ..
حسناء : سمحلها خويا معلابالهاش واش راهي دير ..
و دارت خزرت فحيزية و تبسمت معاها تبسيمة انتصار .. ( هادي حسناء ولا راني نتخايل ) ..
كملو طريقهم متوجهين للغرفة لي جهزوهالو و حيزية موراهم تمشي و تخبط فرجلها بعصب .. زهرة تخزر فحسناء بكره .. بسبتها وليدها وصل لهاد الحالة ..
وصلو للغرفة .. عاونهم جابر باش حطوه فوق السرير .. و حسناء مزال مطلقاتوش .. بعدها بشوية طلقاتو جابتلو غطا و غطاتو و هادا تحت نظراتهم كامل .. كانو مخلوعين فيها كيفاه مهتمة بيه .. كيفاش لون وجها صفر .. لدرجة انو خلاتهم يشكو انو كانت بينها و بينو علاقة حب اما وقت لي يتفكرو حديثو فالساحة يتنحا التخمام هادا من راسهم ..
خبطت زهرة حيزية فكتفها و همستلها فوذنها بلعقل واحد ما سمعها ..
زهرة : و دوك تخليها هي دير كلش و تهتم بيه .. هاكا كنتي تهدري مقبيل ..
بقات حيزية تخزر فحسناء بغضب و كره كانت حابة تقتلها فهاديك الدقيقة .. حتا الغيرة كتنت قاتلتها لانو حسناء شابة عليها بالف مرة و حتا و هي فهاد الحالة و شعرها مجرد طمطومة صغيرة كانت تهبل ..
حيزية : مستحيل ..
تقدمت خيزية لوسط الغرفة و خزرت فيهم و هدرت ..
حيزية : معليش تخرجو و تخلوني نلتها براجلي راهو مريض و عيان لازملو راحة ..
و تبسمت تبسيمة فوق القلب باش تبان محترمة معاهم ..
دارت حسناء و خزرت فيها .. تبسمت على جنب .. قدمت ليها بلعقل و هدرت بصوت مسموع يسمعوه كامل ...
حسناء : حيزية هاكا اسمك ياك !! نسقسيك تعرفي تبدليلو الباسما ؟ تعرفي تقعديه ؟ تعرفي واش يشرب دوا و واش ميشربش ؟؟
خزرت فيها حيزية و وجها حمر لانو معرفتش واش تجاوب بقات مرة تخزر فالعايلة و مرة تخزر فحسناء .. حتا رجعتلها حسناء بلا متسنا جوابها ..
حسناء : وصلني جاوبك .. مالا من فضلك اتفضلي معاهم نتي تان برا لانو انا لي رحت معاه و انا لي علابالي واش ندير واش منديرش .. و غمزتلها مع تبسيمة خفيفة .. حركة تعلمتها من عند هيثم ..
نطق صالح باش يهدي الاجواء و هدر ..
صالح : ايه صح نخرجو نخلوه يرتاح ..
خرجت حيزية هي لولة و العصب ياكل فيها .. وجها حمر .. مزيرة على فمها و تهدر بينها و بين روحها ..
حيزية : انا لي ندمك بالق*** يا سراقة الرجال .. و دخلت لغرفتها و خبطت الباب بالقاوي ..
بعدها خرجو كامل .. عايلة ال ضافر خرجو و رجعو للقصر تاعهم ..
اما عايلة شعابني تلمو فالصالون كعادتهم .. معا عايلة حيزية .. نطق باباها ..
باباها : ممكن تفهموني واش صرا ..
زهرة : علمي علمك كلنا تفاجأنا واحد ما كان علابالو ..
صالح : انا كنت علابالي ..
دارو كامل ليه و خزرو فيه مخلوعين .. رجع هدر و هو مثبت نظرو فيهم ..
صالح : و انا لي رحت معاه باش خطبها ..
زهرة : كيييفاش ..
صالح : قصدني و مقدرتش نردو .. لانو خوه ..
هنا قصت عليه زهرة و مخلاتوش يكمل .. خافت يتفضح وليدها لي مات و يقول عليها معرفتش تربي.. هدرت بزربة ..
زهرة : من الافضل منهدروش فهاد الموضوع دوك ..
بابات حيزية : كي يفطن هيثم يبررلي هو وعدني ..
صالح : باذن الله ..
نرجعو للغرفة عند حسناء و هيثم .. قعدت فالكرسي لي قدامو .. و بدات تبدلو فالباسما .. و كل ما تحركها تخزر فتعبيرات وجهو الا توجع ولا لالا.. بعد ما بدلتهالو .. حقنتلو دواه .. و قعدت فالكرسي لي مقابلو تخزر فيه ..
بقات تخزر فيه هكاك حتا داتها عينها و رقدت فوق يدو ..
عم الهدوء فالقصر .. كلهم دخلو يرقدو .. حيزية مكانتش راقدة .. كانت دور فغرفتها و تخمم كيفاش تتهنا من حسناء ..
اما هيثم .. بدا يفتح فعينيه .. رؤيتو كانت مضببة .. راسو كان يوجع .. ريقو يحس فيه ناشف .. حتا يدو مقدرش يحركها حس انو فوقها حاجة ثقيلة .. اول كلمة خرجت من فمو هي اسمها ..
هيثم : ح ح حسناء ..
مسمعاتوش كانت فسابع نومة .. بعد مدة قصيرة رجع نضرو عادي .. دور راسو لجيهة يديه و قابلاتو راقدة بوجها الملائكي ..
تبسم تبسيمة خفيفة و هو يخزر فيها ....
#ليلوشة
—————————————————
اوبالاتي 💙
حطوووولي توقعاتكم واش راح ديير حيزية الداندوووو و زهرة لي راهي تخدم خدمة الشيطااان واش راح دير تان ..
راني كتبت هادي بسييييف ... غدوة ان شاء الله كاين تعويض لليوم يمكن 5 حلقات او اكثر انتظروووني بالمناسبة بدا العد التنازلي للنهاية هههههه وقيل نحبسها فالحلقة 100 قولولي رايكم فهادي تان
#ليلوشة