👑 حسناء الآغا 👑

|| الحلقة 52 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 52 Il
الطبيب : حمدلله قدرنا نخرجو رصاصة اما حاليا راهو فاقد وعيو على الاقل لازملو 24 ساعة .. و من الافضل يبقى هنا ..
تنهدت بطمأنينة .. بلا متحس دارت عنقت جابر و حتا هو عنقها .. قلبو رتاح .. خزر فالطبيب و هدر..
جابر : جهزلنا سيارة اسعاف ندوه للدار .. نجهزولو غرفة فيها كامل المستلزمات .. و الا ممكن تورولنا واش نديرولو و الا حاجة كبيرة ابعتو معاه ممرضة و حنا نتكلفو بالباقي ..
طبيب : اما مدير المشفى لي يحكم ماشي حنا ..
جابر : مكاش مشكل انا نفريها معا المدير ..
بعدت حسناء على جابر و خزرت فالطبيب و هدرت معاه و هي تحلل فيه ..
حسناء : دكتور نقدر ندخل نشوفو .. دقيقتين برك من فضلك ..
طبيب : دقيقتين لا اكثر لا اقل ..
حسناء : ايه ولله ..
طبيب : اوكي مالا اتفضلي ..
دارت حسناء عند جابر و هدرت متحمسة ..
حسناء : جابر راني رايحة عندو ..
جابر : طمنيني عليه و انا نروح عند المدير نهدر معاه و نطمنهم على هيثم ..
هزتلو براسها بمعنى ايه و دارت رايحة معا الطبيب و بابتسامتها لي وصلت حتا لوذنها .. اما جابر راح فالاتجاه المعاكس متوجه لمكتب المدير يهدر معاه .. و فطريقو رفد تيليفون و عيط لسمر ..
جابر : الو سمر ..
سمر : خير جابر طمني..
جابر : حمدلله .. راهو مليح دوك نطلع عند المدير تاع المشفى نهدر معاه باش نجيبو تما لدار .. جهزولو غرفة حطو فيها كلش و الماتريال نجيبوه معانا فلونبيلونس ..
سمر : اوك اوك دوك نقوللهم .. و حسناء وين راهي جوزهالي ..
جابر : مراهيش معايا دخلت عندو ..
سمر : اه معليش خلاص مالا كي تجو ساهل رانا نسناو ..
كوبا جابر عليها و كمل طريقو متوجه للبيرو تاع المدير .. اما سمر خبرتهم و اكيد ماتو بالفرحة .. و حيزية كانت مقنوطة لانو حسناء راهي معاه و خافت انو يفطن و يشوفها هي لولة ..
طارت تجري بدلت حوايجها و راحت معا الخدامات هي و زهرة يجهزولو الغرفة ..
دخلو ليها و بداو يوجدو .. جابو سرير تاع بلاصة وحدة .. حتا نطقت حيزية بغضب ..
حيزية : علاه جبتو سرير هاكا .. نسيتو بلي تزوج و عندو مرتو .. بدلوه دوك ..
خرجو يجرو لوكان زادو شوية تقتلهم عياطها كان يتسمع فكل الدار ..
زهرة : هدي روحك بنتي ..
حيزية : يا ماما فهميني كيفاه نهدي روحي هاديك الخام** راحت معاه و انا راني قاعدة هنا .. بصح معليش دوك يجيبوه ولله ما تعفسها عندو .. و انا لي نريح معاه هنا ..
زهرة : اكيد نتي تريحي معاه و مستحيل نخليها تدخل عندو .. وجه نحس علينا مكفاش انها من عايلة ال ضافر و زيد بسبتها وليدي راهو هاكا .. لوكان مجاتش ميصراش هاكا ..
حيزية : متخافيش انا نرجعها لدارهم .. الا مرجعتهاش منتسماش حيزية ..
و خبطت لمخدة بقوة .. و كملو يخدمو شغلهم و هي تخمم كيفاه ديرلها و بيمن تعذبها .. و حتا زهرة مكانتش اقل منها ..
وصلت للغرفة .. مدولها عند الدخلو تونو دو بلوك باش مدخلو حتا فيروس ولا اي حاجة قادرة تضر مناعتو ..
تفتحت الباب و معاها قلبها بدا يخبط .. رمات خطوة للغرفة .. و زادت الثانية ..
بانلها مكسل فسريرو .. صدرو عريان .. باسما مبيرة محطوطة فوق الجرح .. خيوط تاع ecg لاسقين فصدرو ( علابالي تطورت فالمعلومات الطبية هههههه معاكم ممرضة احممم ) ..
عينيها تغرغرو بالدموع .. قدمت ليه اكثر .. حتا رجعت قدامو .. تسمع فصوت الالة و صوت نفسو برك ..
شعرو كان داخل فبعضاه .. وجهو صفر .. رمات يدها فيزوج و شدت بيهم يدو ....
#ليلوشة
—————————————————
اوبالاتي 💙
الرومنسية و المشاااكل قادمة يااا جدعاان هههههه مشاكل الضراير جااايين .. حطووولي تشو توقعاتكم .. انا نروح نكتب الحلقة لي موراها ..
نلقا توقعاات طوااال عراااض تمام طلعولي شوية المورال نفسيتي راهي تحت الصفر بسنوات ضوئية ههههه
#ليلوشة