👑 حسناء الآغا 👑

|| الحلقة 103 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 103 Il
ركب فسيارتو .. و ركب معاه عصام .. بدا يجهز فأسلحتو و هيثم يسوق بسرعة و موراه سيارتين معمرة بالرجال ..
و هو فايت فالطريق لمح سيارة حابسة مور حشيش اما بانتلو .. عندو مدة و هو يشوف هاد السيارة و حتا لليوم باش فاق بلي ممكن يكون مراقب ..
دار هيثم عند عصام و هدر ..
هيثم : عصام انا نحبط هنا و نتوما كملو كأنو ما صرا شي كاين سيارة راهي تراقب فينا ..
نقص سرعة السيارة .. و بحركة خفيفة سوطا منها و تولى عصام السوقة ..
ناض و راح يجري مور الشجرة بلا ميشوفو الراجل لي قاعد يراقب فيه ..
غير بعدو شوية سيارات هيثم خرجت سيارة الراجل للطريق ..
هز هيثم سلاحو و وجهو للسيارة .. كانت بعيدة عليه .. بقا يسنا حتا وصلت ليه .. هي غير وصلت و تيرا رصاصة تركزت فراص الراجل مات فبلاصتو .. ( حوجي عينين الصقر ) ..
غير سمعو صوت الرصاص رجعو يجرو .. لقاو هيثم واقف ..
حبط عصام و راح ليه ..
عصام : ياك متأذيتش آغا ..
هيثم : لالا ..
توجه للطونوبيل .. فتحها و دخل يدو فجيب الراجل لي كان ميت و جبد تليونو و عيط فاخر رقم و خزر فعصام ..
هيثم : راح نعرفو شكون لي بعتو ..
بقا يسناو يردو .. حتا رد محمد و هدر ..
محمد : الو واش كاين ..
بقا هيثم ساكت .. مهدر حتا كلمة اكتفى برك بأنو يخزر فتيليفون و يتبسم ..
قص الاتصال و رما تيليفون و رجع لسيارتو و رجع معاه عصام و كملو توجهو لعشيرة محمد بأقصى سرعة ..
استغرب محمد مالاتصال تاع راجل اما دار فبالو انو غلط ولا قاسو و هو يسوق .. و ركب سيارتو راجع لقصرو بعد ما شحن السلاح و بعتو باش يبيعو ..
و هوما فالطريق هدر هيثم و نظرو متركز على الطريق ..
هيثم : اعرفلي وين راه ..
عصام : حاصر آغا ..
رفد عصام تيليفونو و دار مجموعة من الاتصالات و قدر يعرف مكان محمد ..
عصام : آغا كان يشحن السلاح بعدها غادر يمكن راهو راجع للقصر ..
هيثم : لازم نوصلو قبل ما يوصل .. بلا منروحو للقصر و نشعلو حرب .. ندوه فالسكات ..
و زاد فسرعتو .. وصلو للطريق طويلة لي تدي للقصر برك .. حطو سيارتهم فبلايص مخبية و حبطو و توزعو على طول الطريق مور الشجر و لحشيش ..
و ما كانت الا دقائق قليلة و بانت سيارة محمد جاية ..
هدر هيثم و مدلهم امرو ..
هيثم : واحد ما يتيري .. خلوني انا نتولى الامر و الا خرج خارج السيطرة قوصو عليه و متهتموش بيا فهمتو ..
عظلو روحهم اكثر ..
عدل هيثم روحو .. هز سلاحو .. ركز هدفو على عجلة سيارة محمد ..
رجع رجل للور و رجل خلاها للقدام .. خذا نفس عميق .. و غمض عينو .. غير فتحها ضغط على الزناد و خرجت رصاصة و تركزت فعجلة السيارة .. خلاتها تطرطق و تخرج على طريق ..
كان ماشي بهدوء حتا سمع صوت رصاص و سيارتو نحارفت على طريقها و مقدرش يتحكم فيها ..
محمد : واش راه يصرا ..
ورجع يعيط لانو مقدرش يتحكم فيها .. خرجت على الطريق و زدمت فشجرة .. خلاها يفقد وعيو لدقائق .. توجه هيثم لسيارة بحذر و هو هاز سلاحو .. فتح الباب الامامية و قابلو محمد مكسل راسو على الفولون و ينزف .. فتح عينو شوية و لمح هيثم ..
تبسم هيثم فوجهو بشر و هدر ..
هيثم : مرحبا بيك فجحيمك ... ( حوجي حوجي و كي عجبتني المقولة هههه )
#ليلوشة
—————————————————
اوبالاتي 💜
تخلطططططت .. احح زعما راح يستعرف محمد .. زعما راح يقتلو ولا تصرا حاااجة وحدوخرا متنسااوش قلتلكم بلي محمد راح يغير احدااثنا 360° اطلقو العنان لمخيلتكم ..
حطووولي ت قعاتكم و اسناوني نكتب الحلقة لي موراها و نجي نحطها
#ليلوشة