👑 حسناء الآغا 👑

|| الحلقة 63 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 63 Il
و هو واقف هكاك فجأة جات فبالو حيزية .. كأنو سمعها كي عيطتلو ..
رفد دوا كان محطوط تما و توجه خارج مالباب .. ماشي خوفا منها اما ماشي حاب يزيد المشاكل على حسناء عارف بلي يماه و حيزية مستحيل يخلوها براحتها ..
رما يدو باش يفتح الباب .. و فنفس الوقت حيزية رمات يدها باش تفتح الباب .. و تفتحت الباب و تقابلو ..
خزر فيها مالفوق للتحت كيفاش خرجت مالغرفة .. لمعري كتر مالمغطي .. اما هي بقات تخزر داخل الغرفة .. بانتلها حسناء راقدة ..
كي شافها تخزر داخل الغرفة خرج منها و غلق الباب .. كان رايح للغرفة ديالهم بلا ميقيمها اما فطريقو حبسو صوتها ..
حيزية : هيثم واش كنت دير هنا ..
دار ليها مستغرب .. حاجب طالع و حاجب هابط .. رفد يدو لي كان شاد بيها الدوا و روشلها بيها باش تشوفها ..
هيثم : مش من حقك تعرفي واش كنت ندير فغرفة مرتي اما رحت نجيب دوايا ..
حاولت ترطب الحالة .. تقدمت ليه تتزعبل و دورت يد وحدة مور ظهرو كأنها تعاون فيه باش يمشي و هدرت ..
حيزية : لالا سقسيتك برك تقلقت عليك كي نضت و ملقيتكش قدامي ..
هزلها براسو بمعنى ايه و كمل يمشي معاها فوق القلب .. لازم يتعود خاصة انو قرر يبعد على حسناء و يحاول يتغلب على حبو ليها .. ( راح نعرفو شكون يربح الماتش يا داندو ) ..
دخلو لغرفتهم .. دخل هو لدوش و حاول يطول قد ما يقدر باش ترقد حيزية اما كي خرج لقاها نايضة تسنى فيه ..
راح تكسل قدامها فبلاصتو .. كانت راح تعنقو اما سبقها و عطاها بظهر و غمض عينو يفكر فالبوسة هاديك حتا ظاه النوم .. و حيزية زادة رقدت تمتم .. تعدا ليل عليهم كل واحد يسبح فاحلامو .. منهم احلام زينة و منهم
لحق نهار جديد .. ناض هيثم و راسو يوجع .. و حتا جرحو يوجع .. دوا اثر عليه .. و حتا تخمام ليل اثر عليه ..
بقا نايض فبلاصتو و مغمض عينيه .. حس بيها تتحرك قدامو .. فتحت عينها و خزرت فيه .. باستو من خدو و ناضت .. مادار حتا حركة .. خمم بينو و بين روحو لقا بلي مهما كان قاعدة تتعامل معاه مليح .. تتستهل يتعامل معاها مليح و يمد لعلاقتهم فرصة ( يخوي جنابك يا وليدي ) ..
بعد ما ناضت حيزية مبلاصتها بدلت حوايجها .. لبست جبة خفيفة .. طلقت شعرها و حبطت لقاتهم كلهم نايضين .. بقات تخزر فنواحي الدار تحوس على حسناء اما ملقاتهاش .. راحت عند زهرة
حيزية : صباح لخير ماما ..
زهرة : صباح الخير بنتي صبحتي منورة و وجهك يضحك ..
حيزية : هههه ايه هيثم جا عندي لبارح فليل ..
زهرة : شفتي قتلك معندهاش اهمية عندو .. وشراه وليدي ..
حيزية : حمدلله راهو مليح مزال مناضش خليتو راقد .. وين راهي هاديك الحية ..
زهرة : مزال مناضتش خليها تموت فبيتها ان شاء الله متنوضش ..
حيزية : ماما علاه تزوجها ..
خزرت زهرة يمين و يسار و هدرت بهمس ..
زهرة : ارواحي معايا لهيه وين مكاين حتا واحد و نحكيلك ..
راحو مع بعض و حيزية متحمسة تعرف الظرف لي خلا هيثم يتزوج بحسناء ..
زهرة : .....
#ليلوشة
—————————————————
اوبالاتي 💜
زعمااا زهرة تخبر حيزية !! راح تتخلط الا خبرتها تتدمر حسناء .. نفسيتها متدمرة و يزيدولها هوما فرايكم راح تبقى حسناء بشخصيتها قوية ولا طيح ! راح يوقف معاها هيثم ولا يكون ضدها ..
حطوووولي توقعاااتكم طوال عراض .. راني حطيت واش كتبت بكري علاجال لي ميسهرووش باش يقراوهم و لي يسهرو على الوحدة نزيد نحط زوج حلقات راني نكتب فيهم دوك غير يطيبو نحطهم وعدتكم نحط 4
#ليلوشة