👑 حسناء الآغا 👑

|| الحلقة 37 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 37 Il
سمعها وقت لي خرج اسم هيثم من فمها .. تبسم على جنب .. عروقو برزو .. نظرتو رجعت تخوف اكثر .. حكا معاها بنبرة حادة و بنبرة غضب ..
اسماعيل : علاه هيثم .. علااه قلتي اسم هيثم ..
بقات تخزر فيه هكاك و مصدومة .. خايفة معرفتش واش دير .. حتا باش تعيط لهيثم فتيليفون متقدرش لانو يشوفها ..
رجع هدر بصوت عالي خلاها تقفز من بلاصتها ..
اسماعيل : ر** اهدري .. علااااه هيثم .. واش خصني انا ..
هدرت و هي ترجع للور .. بصوت خافت ..
حسناء : و وشنو نتا ..
ضحكلها ضحكة استهزاء و هدر و هو يقرب ليها ..
اسماعيل : حابة تقوليلي بلي منتبهتيش لاهتمامي بيك .. منتبهتيش لحبي ليك .. مشفتيش نهار اغتصباك الط*** هاداك كيفاه كنت .. قريب هبلت .. يمسك واحد غيري .. و دوك راح تروحي لخووه ..
تسمع فيه و هي مخلوعة .. من صغرها حاطة قدر بينو و بينها .. حتا انو متهدرش معاه كامل الا للضرورة ..
حسناء : و واش راك تهدر .. واش راك تخلط .. بعدني اسماعيل مراكش فوعيك مديرش حاجة تندم عليها ..
اسماعيل : مكاش حاجة راح نندم عليها كيما نندم الا ضيعتك من يدي دوك ..
الرعشة سرات فبدنها .. نفس السيناريو يتعاود معاها .. اما هاد المرة لازم تكون قوية .. متخليش نفس الحاجة تصرالها مرتين .. حاولت تعيط اما صوتها خانها من قوة خوفها .. تلفتت يمين و يسار .. لمعو عينها بخبث و فنفس بخوف ..
بعدت عليه على جنب و بقات تولي للور .. و هو يقدم ليها و يهدر ..
اسماعيل : ما عندك منين تروحي ..
زاد تسارع فخطواتو .. و وصل ليها .. هو غير وصل ليها .. هي حطت يدها على لعصا لي لمحتها .. رفدتها و خبطاتو لراسو .. طاح ديراكت مغمى عليه ..
رمات الحطبة من يدها خايفة .. رجعت للور اكثر و هي تهدر برجفة و خوف ..
حسناء : يا يما قتلتو .. يا يما قتلتو ..
تخزر فيه و تبكي مقدرتش تشد ولات تبكي بالصوت .. رجلها عادو ماشي حاملينها .. تمشات بسرعة قبل ما طيح للقصر .. و اخيرا صوتها خرج و عيطت على قد ما تقدر ..
حسناء : جااااااااااابر .. سممررررر .. جااااااابر .. تعيط و صوتها غالب عليه لبكا ..
سمعها جابر ناض مالطابلة يجري .. صوتها و عيطها مكانوش نورمال ..
غير شافتو جاي جيهتها زادت قوات فالبكية و طارت ليه عنقاتو على قد ما تقدر .. و بقات تهدر ..
حسناء : قتلتو .. قتلتو .. ولله ما بلعاني .. هو هو ..
يسمع فيها مستغرب و فنفس الوقت خايف عليها .. حط يدو على شعرها يمسح عليه و هدر ..
جابر : شكون .. و وين .. مفهمتكش ..
طلعت راسها بلعقل و هدرت ..
حسناء : اسماعيل ..
جابر : اسماعيل مكاشو حسناء .. دا اجازة ..
حسناء : لالا ولله راهو هنا ولله قتلتو انا قتلتو ..
جابر : واش راكي تهدري كيفاه قتلتيه .. راكي مليحة .. فهميني ..
بدات تحكي حسناء و هي تبكي بالشهقة .. عمرها غاضتها و فنفس الوقت خايفة خوها ميامنهاش ..
حسناء : كنت قاعدة وحدي لهيك و اشارتلو للبلاصة لي كانت قاعدة فيها .. و كملت هدرت ..
حسناء : حتا جا اسماعيل كان يتمايل و قاعد يهدر هدرة ماشي مفهومة بعدها بدا يقرب ليا و كان رااح يغ.. حبست مكملتش هدرتها حشمت منو ..
زير على قبضة يديه و هدر ..
جابر : وينو اديني ليه ..
راحت تمشي و هو موراها .. لحقت للمكان اما مكملتش اشارتلو بيدها و قاتلو ..
حسناء : لهيك ..
راح متوجه هو للتما و هي موراه مخبية .. و هنا كانت الصدمة ليهم .....
#ليلوشة
—————————————————
اوبالاتي 💙
لم يبقى الكثير على العرس ههههه ،راني فشلانة بلا منكتبلكم الاشهار تاع كل يوم راكم تعرفو واش ديرو 😂
راني نكتب بشوية بسك راني مريضة مع الاسف الشديد وقيل كورونا ، ندير تاست و نشوف الا هي ولا نن
#ليلوشة