👑 حسناء الآغا 👑

|| الحلقة 72 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 72 Il
هيثم حبس الحركة .. قعد يسمع فيه يهدر .. استغرب كيفاه يعرف اسمو .. هدر و هو عاطيه بظهرو ..
هيثم : شكون نتا ..
الراجل : اولا ارمي سلاحك ..
محبش يتزايد معاه فالهدرة .. رما هيثم سلاحو و رجع هدر ..
هيثم : مرميتوش كي خفتك لالا .. و انما خفت عليه ..
ضحك الراجل بقوة ..
الراجل : عندي شحال مسمعتش تهديد .. اكيد مواجهتك راح تكون ممتعة ..
هيثم : شكون نتا ..
الراجل : دور بلعقل تعرف شكون انا ...
بعد هيثم شوية للقدام و دار ليه .. قعد يثبت فوجهو .. خاس بلي يعرفو و شايفو اما متفكروش مليح ..
الراجل : متعرفنيش صح ..
هيثم : معرفتكش ..
الراجل : الآغا محمد.. آغا عشيرة سعدي .. و صاحب الصناديق لي قاعد تقلب فيهم بدون اذن ..
ضحك هيثم عليه بالصوت و هدر ..
هيثم : ههههه نظن نتوما لي حطيتو صناديقكم فأرضي بدون اذن .. و غمزلو على جنب ..
محمد : هههه ارضك .. هاد الخطرة راح نتغاضى عليها .. اما خطرة الجاية راح يصرا لي ميعجبكش ..
هيثم : من وين تعرفني ..
راح وجه هيثم الوان و جا الوان .. اما حاول ميبينش و بقا يخزر فيه بنظرة تحدي ..
محمد : ههه معروف فالبلد نتا ..
هيثم : ترفد لخماج تاعك و تق** منا احسن ما نتعامل معاك بطريقة وحدوخرا و نظن تعرفها مادام راني مشهور ..
محمد : راك تهددني هاكا !!
هيثم : يعجبوني لي يفهموها طايرة كيفك ..
محمد : نتقابلو يا اغا ..
رجع ركب فسيارتو و طاار لدارو و خلى هيثم واقف تما ..
هز سلاحو ملرض و بقا يقلب فلرض و يحاول يتذكر وين شاف الراجل هادا اما مقدرش يتفكر .. و خاصة كي عرفو تمتم حس بلي من وراه قصة كبيرة ( خممو مليح و حطولي توقعاتكم كوناناتي ) ..
رجع محمد للقصر .. وصل تما كانو كلهم مسلحين باقوى الاسئلة كيفاش لالا و هو رئيس المتاجرة بالسلاح غير قانوني فالبلاد ..
محمد اغا ديكتاتوري .. قاتل .. كل الصفات السيئة فيه .. حتا عشيرتو معيشهم فرعب .. مكاش لي يتجرأ يدخل روحو فيه لانو كل حرب دخلها خرج رابح منها و هاد الشي لي خلاه يطلع آغا على العشيرة لي راه فيها ..
دخل بعصب .. مزير على سنانو .. قابلاتو ختو فصالون ..
فلة : محمد تقلقت عليك خرجت معصب ..
محمد : مكاين والو خدمة برك ..
و تعدا طالع لمكتبو .. خلاها مستغربة .. عارفة اعمال خوها و تظل تنصح فيه و ملقاتش نتيجة غير انها تسكت ..
دهل للمكتب و خبط لباب موراه و قعد يمشي رايح جاي .. و يهدر معا روحو ..
محمد : نقتل دي* ب**** و يكون باعها.. و لمن باعها لآغا هيثم يعني سلكت مالمشاكل الخطرة لولة و راح نطيح فيهم الخطرة الثانية .. ( راني مديتلكم طرف خيط خمموا مليييح .. )
عيط لواحد مرجالو فتيليفون ..
محمد : اجبدلي ر** يا لوكان من تحت لرض و جيبو لعندي نتفاهم معاه كيفاه يبيعها بلا ميخبرنا ..
قص تيليفون معصب و هز كاس شراب .. حط فيه مخدر و شربو على دفعة وحدة ..
نرجعو لهيثم لي قعد تما حتا لليل .. بعدها رجع للقصر .. دخل كان هاادي .. كل واحد حاكم بيتو .. معرفش وين يروح .. حسناء ولا حيزية ..
هيثم : من الاحسن نشوف غرفة فارغة .. طلع للفوق و كانت غرفة فارغة مقابلة الغرفة تاع حسناء .. دخل فيها .. عدل فراشو .. و تكسل على ظهرو و يد تحت راسو كالعادة يخزر فالسقف ..
و كالعادة قلبو غلبو و حب يروح يتفقدها .. عارف بلي راح تكون راقدة ..
ناض من بلاصتو و راح لغرفتها و فتح لباب بلعقل .. غير فتحها تصدم .. طاح منو النص .. حسناء طايحة فلرض و الكاس قدامها مكسر .. للحظة تخدر جسمو و مقدرش يتحرك .. للحظة فكر انها ماتت .. للحظة تذكر قمر و خوه ( بداااو الاسرار يتكشفوو احمودة ) ...
#ليلوشة
—————————————————
اوبالاتي 💜
حلقة بداية اكتشاف الاسرار هههههه حطوووولي توقعاتكم بخصووص محمد .. و ركزووو ملييح و شكون قمر و خوه لي تذكرهم !! مدام تذكرهم كي شاف حسناء طايحة معنتها ماتو .. حطوولي توقعاتكم طوااال عراض نروح نكتب لي موراها و نجي
#ليلوشة