👑 حسناء الآغا 👑

|| الحلقة 39 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 39 Il
حبست حيزية فبلاصتها و خزرت فيه مصدومة و فنفس الوقت مستغربة .. و هدرت ..
حيزية : شكون حسناء هادي ..
هدرتها خلاتو يفيق على روحو .. قاعد يخزر فيها و يحوس واش يقول .. ماشي عارف كيفاه اسم حسناء خرج من فمو ..
هيثم : وحدة تخدم معانا و ماتت ..
حيزية : و واش فكرك فيها ..
تقدم ليها هيثم بلعقل .. بدا العصب يطلعلو .. يكره شخص يتحكم فحياتو ولا فتصرفاتو ..
وصل عندها .. تبسم فوجها باش ميبين للعايلة والو و هدر بصوت خفيف تسمعو هي برك ..
هيثم : نذكرك بلي مزال موليتيش مرتي باش دخلي روحك .. نذكرك تان بلي نكره لي يدخل روحو فيا ..
حيزية : لالا هيثم سمح...
مخلاهاش تكمل هدرتها .. دار و رجع قعد فبلاصتو .. قدم لعند عمو صالح و هدر ..
هيثم : عمي نزيدو نص ساعة و نروحو مرانيش مرتاح هنا و حاس انو راح تصرا مشكلة ..
صالح : مكاش مشكل وليدي اصلا هاداك هو الوقت باش نوصلو للدار بكري قبل ما طيح ظلمة ..
هزلو هيثم براسو بمعنى ايه و كملو يحكيو معا عايلة حيزية ..
نروحو عند حسناء لي بعد ما فاقت داتها سمر للصال دو بان .. غسلتلها وجها .. و هدرت ..
سمر : حسناء افطني مديريش فروحك هاكا ياك راكي شفتيه هرب معنتها مماتش ..
هزتلها حسناء براسها برك .. ماشي حابة تهدر ..
رجعو كيفكيف قعدو على طرف السرير .. و هوما هكاك طبطب الباك ..
حسناء : ادخل ..
تفتح الباب و دخلت لخدامة هازة فيدها باطة كبيرة ..
حطتها فوق السرير و هدرت ..
خدامة : مادموزال حسناء هادي لحقت مقبيل لدار منعرف من عندمن يمكن تلقاي بطاقة لداخل ..
حسناء : يعطيك الصحة ..
خرجت الخدامة .. و موراها وقفت سمر .. و هدرت معاها و هي حاكمة خدودها بيدها فيزوج ..
سمر : متبكيش يا حلو .. متوليش شابة كي تبكي .. انا دوك نروح نشوف ياسمين كاش ما تسحق و نتي ريحي شوية و اومبعد نرجعلك متنسايش غدوة عرسك..
غمزتلها و تبسمت معاها بمكر و خرجت و غلقت لباب موراها ..
حسناء : مريضة ولله ..
راحت حسناء رفدت لباطة بيدها و جابها تقيلة .. هدرت معا روحها ..
حسناء : شحال ثقيلة يااا درا واش فيها ..
فتحتها .. قابلتها عفسة مغلقة بقماش قري و فوقها كارطة .. رفدت الكارطة و قرات واش فيها ..
" و هادي لعروستي .. هيثم " ( حوجي اناااا على الرومنسية ) ..
تبسمت على جنب .. حطت لكارطة و نحات لقماش لقري و جبدتها ..
عينيها ولاو قلوبة .. غوب بلونش تهببببل .. يديها ترونسبارون فيهم فراشات بيوضة مالفوق .. ظهرها عريان .. صدرها معمر باللؤلؤ ..
حسناء : تهبببل .. يا عمري ..
بلا متحس قاعدة دور بيها كيما الدراري صغار كي يشرولهم حوايج جدد ..
اما تمتم فاقت على روحها .. حطتهاةفوق لبونك و بقات تخزر فيها و تهدر معا روحها ..
حسناء : لي يشوفك يقول راح تتزوجي لي تحبيه .. يخي حالة يخي ..
مكملتش هدرتها صونا تيليفونها .. راحت رفدت ديراكت ..
حسناء : الو وي شكون ..
هو : هيثم ..
و فاللحظة هادي قلبها دق ثلاث دقات .....
#ليلوشة
—————————————————
اوبالاتي 💙
علابالي مرانيش نحط بزاف كيما قاتلي وحدة راكي تحطي بالبرج هههههه بصح الله غالب علابالكم بحالتي مي على ما اظن غدوة فيها حلقات بزاااف بسك العرس احمودة لازم نوصفو بدون تقطع .. كل وحدة فيكم تحطلي جاماتها و توقعاتها و تروح تشد غونديفو عند الحوفافة 😂
#ليلوشة