👑 حسناء الآغا 👑

|| الحلقة 118 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 118 Il
طاح فلرض مغمى عليه .. خزرت حسناء فزهرة بنظرة انتصار .. تبسمت على جنب و حطت صبعها على فمها بمعنى متعمليش حس ..
حوست فوسطو و فجيابو اما ملقاتش سلاح .. ملقات والو ..
ناضت بلعقل و هدرت ما زهر بهمس ..
حسناء : نخرج نشوف الا مكاين حتا واحد و نرجع نروحو ..
جات رايحة حبستها زهة و هدرت ..
زهرة : ردي بالك على روحك .. هيثم يهبل بلا بيك ..
تبسمت معاها و غمضتلها عينها و رجعت فتحتهم طمن فيها ..
خرجت راسها ملباب هو الاول .. تلفتت يمين و يسار تحوس الا كاين كاش واحد اما ملقاتش ..
خرجت بلعقل على طراف صباعها متوجهة للكوزينة .. تبسمت بشر وقت لي ملقات حتا واحد تما .. دخلت بسرعة للكوزينة رايحة ترفد موس .. هي غير مدت يدها سمعت موراها زر امان تاع سلاح ..
حبست كيما راهي و متحركتش .. سمعت صوتو جاي من وراها ..
محمد : متوقعتش يخرج منك كامل هاكا ..
تلفت بلعقل هازة يدها فيزوج لسما و هدرت ..
حسناء : حتا انا متوقعتكش تكون رخيس هاكا ..
كلمتها لعبتلو على اعصابو .. قدم ليها معصب و شدها من شعرها و قرب لوجها حتا رجع نفسو يخبط فوجها ..
محمد : متخلينيش نقتل ر** هنا نحتاجك ..
استعملت ذكائها و سكتت .. حبست الحركة حتا طلقها .. راح من وراها .. حطلها سلاح فوق راسها و هدر..
محمد : امشي قدامي ..
بدات تمشي حتا طلعها لطابق الثاني .. دخلها داخل غرفة تما و غلق لباب عليها ..
تعدا نهار كامل و هوم هكاك مكتوفي الايدي .. هيثم كيما حاول ملقاش واش يدير و بدا يقتنع بفكرة انو يمدلو اراضيه .. حسناء طلة متاقة لقات لرض بعيد و كانت من جيهة الفناء الخلفي ماشي من جيهة الشرطة و هيثم و جابر ..
هيثم كان قاعد مقابل القصر يشوف فالرجال لي فيه كيفاه ضاع من بين يدو بسبب غباءو .. ملقا يخمم على يماه مالقا يخمم على حسناء .. مرقدش ليل كومبلي و هو يخمم عليهم و يحاول يلقا كيفاه يدخل ..
و هو هكاك صونا تيليفون عصام لي كان عندو .. رما يدو و هز ..
هيثم : الو ..
محمد : اهلا بالآغا شكلو الارواح لي داخل ماشي مهمة عندك ..
زير على قبضة يدو و هدر ..
هيثم : طلعت ماشي راجل .. مخبي و تواجه فيا ..
محمد : مدلي الاراضي نطلع و نرجعلك يماك و مرتك ..
هيثم : واش يضمنلي بلي راهم حيين م
لي نهدر معا يما ..
محمد : يماك لبارح هدرت معاها نظن .. و مرتك مزال حاصلة فغيبوبتها و انا لي نمد الاوامر ماشي نتا .. عندك ربعة و عشرين ساعة ميلحقنيش عقد الملكية ودعهم ..
و قص عليه الاتصال .. خلاه ياكل فروحو .. محمد تبسم اما انزعج وقت لي حسناء فطنت راح ديرلو مشاكل و اولهم لي دارتو لبارح ..
ناض هيثم من بلاصتو و راح عند جابر لي كان يوصي فرجالو كيفاه يتوزعو على القصر ..
هيثم : راح نمدلو عقد الملكية و يخرجهم ..
جابر : مزال نقدرو نخرجوهم بالاك تغلط راح ترجع مافيا هنا و يمكن نموتو كامل ..
هيثم : مدلي ربعة و عشرين ساعة ..
جابر : راح نحاولوا للمرة الاخيرة ..
و حط يدو على كتف هيثم يصبر فيه و يمدلو فالقوة عارف انو ماشي ساهلة يخطفو امك و مرتك ففرد مرة ...
كانت قاعدة فالغرفة تما محبوسة .. ملقاتش كيفاه تهرب .. حتا لمحت تما ليدرا تاع لفراش .. تبسمت بشر و خطرت على بالها فكرة ..رفدتهم و بدات تربط فيهم معا بعض ..
حسناء : راح نوريلك حسناء مرت الآغا واش دير ....
#ليلوشة
—————————————————
اوبالاتي 🦋
فرااايكم واش راح ديير حسناااء .. حطوولي توقعاتكم طوااال عراض عميراتي .. و فرايكم جابر راح ينجح فانو يدخل للقصر .. و هيثم كيفاه راح يعرف بلي حسناء فطنت ..
حطووولي توقعاااتكم و نورمالمون كي نوض للفجر نكتب حلقة ولا زوج زيادة و نحطهم الا منضتش نتلاقاو غدوة جوايه المغرب هكاك كبيداتي
#ليلوشة