👑 حسناء الآغا 👑

|| الحلقة 26 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 26 Il
قعد يخزر فيها هكاك .. عينيه ذبالو .. منضرها شهاه .. مفهمش الشعور لس يجيه كي يكون قدامها .. اما هي كانت خايفة .. كانت ترعش .. تشوف فيه معاد .. عينها معبيين دموع .. هدرت بصوت تاع بكا ..
حسناء : معاد الله يسترك خليني ولله العظيم غير نعاونك ولله نعاونك خليني برك ..
هيثم : حسناء انا هيثم ماشي معاد ..
نحا يدو من تحت راسها و حطها على خدها .. غير حست بيدو فوق خدها عيطت على قد ما تقدر .. الشي لي خلاه يحط يدو على فمها باش يمنع عياطها ..
و فهاديك الدقيقة تكرر سيناريو الحادثة لي صراتلها معا معاد ..
رجعت تبكي بلا حس .. نفسها مقطوع .. تخزر فالفراغ و تهدر ..
حسناء : نعاونك معاد .. خليني نروح .. اخرج من دارنا يشوفك جابر تعيش ..
يسمع فيها و مصدوم .. واش قاعدة تهدر .. غاضاتو علخر .. للدرجة هادي تأثرت بواش صرالها .. لحضتها كره خوه .. كره عملتو .. هي ماعندها حتا ذنب ..
ناض و قعد فلرض قدامها ..
قعدها هي زادة .. كانت فاتحة عينها اما غايبة عن الوعي تخزر فالفراغ و تهدر .. معرفش واش يدير معاها .. عنقها ..
عنقها على قد ما يقدر .. يحاول يخليها تحس بالامان باش تهدا .. قاعد يعدي فيديه على ظهرها بلعقل و يهدر من قلبو .. لانو دقيقتها قلبو كان هو سيد قراراتو..
هيثم : جازت يا روحي جازت .. ( اي اكدولي على يا روحي .. ) ..
حاطة راسها على كتفو و نفسها يخبط فرقبتو .. دموعها يسيلو و تعاود فكلمة وحدة ..
حسناء : متمسنيش تعيش ..
و بقاو هكاك فلرض و معنقها ..
نرجعو لعند جابر .. بقا فنفس وضعيتو لاكثر من ساعة .. حتا بحس يدها تتحرك .. طلع راسو و خزر فيها كانت بدات تحل فعينها تدريجيا .. حط يدو على جبهتها و هدر ..
جابر : سمر راكي تسمعي فيا ..
سمر : امممم ..
جابر : حمدلله .. كيفاش راكي تحسي روحك ..
سمر : كرشي راهي توجع علاه .. مام راسي ..
بعدها خزرت فالغرفة و استوعبت بلي مراهيش فدارها ..
سمر : جابر وين راني واش جابني هنا ..
جابر : والو برك تعبتي شوية تقلقت عليك جبتك هنا ..
سمر : اممم ياك قتلك راني مليحة شوية ريحة نفطن .. و ضحكت معاه ..
قلبو وجعو عليها .. مش عارفة واش كاين فجسمها .. قعطت على تفكيرو هدرتها ..
سمر : اهيه وااش قالك طبيب ..
جابر : شي .. قالي حبطتلها لاطونسيون ..
سمر : شفت مكاين والو .. هايا نروحو لدار ..
جابر : اصبري نخبر طبيب ..
خرج جابر لعند طبيب .. لقا سلمان برا .. هدر معاه متحير ..
سلمان : واش راهي ..
جابر : حمدلله بابا راهي مليحة .. طبيب وراه ..
سلمان : راح لمكتبو وليدي ..
راح جابر لمكتب الطبيب و طبطبلو ..
طبيب : ادخل ..
جابر : راهي فطنت سمر .. قاتلي بلي راهي حاسة بوجيعة فكرشها ما بينتلها والو .. و حتا قلتلها انو حبطتلها ااطونسيون برك من فضلك متخبرهاش ..
طبيب : اكيد ..
جابر : و دوك نقدر نخرجها .. حبت تروح لدار ..
طبيب : لالا مزال دوك نمدلك لادراس تاع طبيبة نساء و توليد .. ماشاء الله .. ديرلها ليكوغرافي و تما ييان كلش و ربي ما يجيب غير الخير .. متخافش ممكن يكونو شكوكي غالطين ..
جابر : يعطيك الصحة دوك نديها ..
شد عليها الورقة لي فيها العنوتن و راح لعند سمر .. دخل لقاها واقفة تعدل فروحها باش تخرج ..
جابر : سمر علاش وقفتي .. و راح يجري ليها ..
سمر : راني مليحة .. هايا نخرجو ..
جابر : ايه نروحو عند طبيبة ..
سمر : وشمن طبيبة ..
جابر : باش ديرلك ليكوغرافي و هاكا نتأكد بلي مكاين والو و نتهنا .. اسمعيلي خطرة فحياتك و متعارضينيش ..
هزتلو براسها بمعنى ايه لانو حطها تحت امر الواقع .. و خرجو معا بعض و معاهم سلمان ..
نرجعو عند هيثم و حسناء .. بقاو هكاك مدة معتبرة حتا حس بنفسها لي يضرب فرقبتو انتظم .. و حس برعشتها نقصت و حتا هدرتها حبست .. هدر معاها بصوت حنيييييين ..
هيثم : حسناء ..
حسناء : امم ..
هيثم : عاونيني نوقفك .. حاول يوقف و يوقفها معاه .. و بعد معاناة كبيرة قدر يوقف و يوقفها ..
اما غير وقفوو .. خزر فيها .. و اوووووب ترخا جسمها و طاحت بين يديه ...
—————————————————
اوبالاتي ❤ ..
الحلقة هادي بذاات طولت معاها باش كتبتها 😂 .. مهم خلووولي رااايكم زعما سموورة وشبيها .. راح يتأكد مرضها .. العاشق تاعنا راح يتنازل على زواجو من حيزية ولا نن .. و راح يستعرف بواش راهو يحس اتجاه حسناء ولا نن ..
خلولي توقعاتكم طوااااال عراااض و خلو تعليق هنا راني نكتب غير نحط نجمجملكم
#ليلوشة