👑 حسناء الآغا 👑

|| الحلقة 36 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 36 Il
حيزية : هيثم ..
سمع اسمو قلبو دق .. خاف انو يكون سمعو شي حد على واش كان يهدر و تتخلط الحالة و تخرج من سيطرتو ..
دار خزر فيها .. يخاول يشوف تعابير وجها يمكن يفهم الا سمعتو ولا لالا ..
ترسمو على وجها علامات الاستغراب و هدرت ..
حيزية : شكون لي راح تهبلك ..
زير على قبضة يدو .. يعني سمعاتو .. اما مسمعتش كلش .. عدا بدو على شعرو .. و خزر فيها نظرة حادة و هدر ..
هيثم : من وقتاش تتصنتي عليا ؟ من وقتاش تحاسبيني اصلا ..
رجع لون وجها صفر .. مكانتش تتوقع فاجابتو .. ( امنت بلي راح تولي مرتو و تحكم فيه ههههه اضحك اضحك احمودة .. اضحك ينعل اضحك هههه ) ..
حيزية : شي .. مكنتش نتنصت جيت نعيطلك برك ..
هيثم : و علاه حتا تعيطلي كي مدخلتش باينة بلي عندي شغل .. نكملو و ندخل ..
و جاز عليها بسرعة يحاول يتهرب من سؤالها ماشي لانو خاف منها اما كان مخطط للكلش و مش حاب يفسد واش موجد ..
قاعدة تخزر فيه مصدومة و هو جايز عليها .. عندو الحق مزال مايعرفها ما تعرفو و بدات دخل روحها فيه .. خبطت رجلها معا لرض بغضب و راحت من وراه داخلين للقصر ..
دخل هيثم راح قعد معا الرجال و حيزية راحت قعدت معا نسا ..
بقاو يقصرو هكاك .. حتا تعدا الوقت و لحق وقت لعشا .. ناضو كلهم قعدو على الطابلة .. قعد هيثم فالوسط راحت تجري حيزية قعدت قدامو و هدرت ..
حيزية : ااا صدفة قعدت فالبلاصة لي قدامي هههه ..
خزر فيها بطرف و قلب عينو منها . معجباتوش من لي شافها وهي ترمي فروحها عليه .. طيحت بقيمتها ..
هدرت بينها و بين روحها ..
حيزية : منخبسش حتا ترجع تحلل فيا .. حبيتك من صغري .. و راح تكون ليا دوك و منخليك لحتا وحدة مستحييل .. و عارفة انو كنت تهدر على طفلة اما بعد عرسنا راح نجبدها و نعرف شكون هي .. و الا ميكونش اسمي حيزية .. ( اضحك اضحك للمرة الثانية ههههه معلابالهاش بلي راح تتصدم نهار العرس اضحك هههه ) ..
بداو ياكلو و هي تخزر فيه ملتحت للتحت و هو مش معبرها اصلا ..
نروحو عند حسناء لي بعد ما كملت شغلها .. طلعت لبيتها .. و بدات توجد ففاليزاتها و دمعة على عينها .. راح تفارق دارهم .. و تفارق عايلتها رغم انهم ظلموها .. راح تتزوج خلاص و ترجع مرت الآغا .. غدوة راح تتسمى حسناء الآغا .. ( يا مملكة اوبال باركولي قدرت نوضف اسم لكرو بطريقة احترافية هههه ) ..
بدات تهدر معا روحها و هي تعمر فالفاليزات ..
حسناء : بالاكي ديري فبالك راح تتزوجي صح .. زواجك مصلحة بين العشيرتين برك .. متتحمسيش هو اكيد مراحش يكون شخص مليح .. اكيد راح يكون كيما خوه .. اوووف يا ربي علاه راني نخمم فيه .. علاه وليت نتفكرو بزااف .. علاه هدرتو راهي تجي فبالي .. لهاد الدرجة اثر فيا .. يا حسناااء افطني على روحك ..
بقات تتصارع معا افكارها هكاك لمدة طويلة و فالاخير قررت تخرج للجاردان و تريح تما بالاك تهدا ..
حبطت للجاردان .. و قعدت على اللرض و فوق لحشيش و بين الورد .. هزت وردة دارتها مور وذنها .. طلعت راسها باش تخزر لسما اما قابلها هو واقف .. واقف و عينيه حمورة .. عروق يديه بارزين .. نظرتو غريبة ..
حسناء : اسماعيل واشبيك ..
بدا يمشي اسماعيل و يميل .. تفكرت من مشيتو مشية معاد هاداك النهار .. وقفت بحركة خفيفة .. رجع لونها صفرررر .. الورد لي كان فيدها طاح..
اسماعيل : ارواحي متخافيش ..
و معا جملتو رجعت ترعش .. دقات قلبها قاعدين يتسمعو .. يديها بداو يرعشو .. دموع تغرغرو فعينها .. و خرجت من بين شواربها كلمة خفيفة .. كلمة من قلبها .. و بلا متحس ..
حسناء : هيثم .....
#ليلوشة
—————————————————
اوبالاتي 💙
وليد لحرام حكمها وحدها .. قلبي وجعني كي قالت هيثم يا عمري مسكينة تأثرت بأمانو .. زعما واش راح يدرلها داندو هاداك .. و هيثم يسلكها زعما ..
و حيزية من دوك معولا على الحرب اتخايلو تسمع بحسناء نهار العرس تتخلط .. انا نعست دوك راح نرقد و غدوة ان شاء الله نزيد نحط ...
خلو تعليق كي نزيد نحط نجمجملكم عليه .. اكرر و اعيد راني نحط فليل كااامل مانيش نحط فالصباح بسك عندي الكثير من الاشياء باذن الله نحكيلكم عليهم هههه
#ليلوشة