👑 حسناء الآغا 👑

|| الحلقة 107 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 107 Il
سمعت جملتو .. برودة كبيييرة سيطرت على جسمها .. خلاتها ترعش بلا متحس ..
تحلو عينها على وسعهم .. طلقها .. و طلقها بثلاث .. فاتت خرجت كلمتو .. و مكاش لعب فالدين .. رجعت محرمة عليه ..
خزرت فيه زهرة مصدومة .. فتحت فمها راح تهدر حتا نطق و قطعلها هدرتها قبل ما تهدر ..
هيثم : ولا كلمة يما .. اخر شي توقعتو انك تعاونيها .. رجعتي كيفها كانو نتي لي حاولتي تقتليها .. كيفاش طاوعك قلبك تخبي .. راهي بنت يا يما .. راهي روح .. الحقد و الانتقام عمالك عينك .. عارفة بلي ولدك معاد استدرجها باش يغتصبها ولا لالا .. عارفة بلي كانت تتلاقاه باش ميقتلش خوها .. تضحياتها كامل كانو علاجال عايلتها .. عارفة بلي ولدك معاد لي الحقد عمالك عينك علاجالو كان حاب يقتلني و يرجع الاغا اه .. عرفة بلي ماشي جابر لي قتل خويا سعيد ..
يهدر و بلا ميحس طاحو دموع من عينيه .. قلبو قد ما كان يوجعو قد ما كان صوتو يعلى .. بنت بريئة تضلمت بسبة حكاية الثأر .. ملكة قلبو بين لحياة و الموت بسبة حقدو و انتقامو هو و عايلتو .. و لوكان غير حقدو على الشخص صحيح حتا جابر ظهر مظلوم ..
تسمع فيه و تحرك براسها بمعنى لالا .. ماشي مستوعبة لي قاعد يقول فيه .. معاد وليدها و تربيتها يدير هكاك ..
حيزية زادة كانت تسمع و مصدومة .. اما هدرتو خلات نار الانتقام تزيد تشعل فقلبها .. يمكن نار زهرة بدات تطفا اما نار حيزية كأنو كبينا عليها بنزين .. على قد ما كانت تتوجع من الكف و من الطلاق على قد ما كانت تتحلف فحسناء ..
فهاداك الوقت لي كانو يحكو فيه .. محمد شاف الباب كس بقا مفتوح .. و حتا لمح المسدس مرمي فلرض .. بقا يسوطي بالكرسي يحاول يوصل ليه .. و بعد معاناة كبيرة وصل ليه .. رما روحو بكرسي .. توجع .. هدر و هو لاز على سنيه ..
محمد : جايك يا هيثم ..
وصل للمسدس و رجع بين يديه المربوطين .. وجهو للخيط لي مربوط فيه و قوص عليه ..
كانت زهرة راح تهدر حتا سمعو صوت رصاص .. زهرة حبطت على ركبتها و حيزية عيطت و خبات راسها .. اما هيثم بقا يخزر فالفراغ و هدر بصوت خفيف ..
هيثم : محمد ..
و دار يجري حابط .. لما يدو لوسطو يجبد مسدسو ملقاهش .. تذكر انو طاح من يدو بلا ميحس ..
رجع طلع يجري .. فتح الدرج تاعو .. جبد مسدسو .. عمرو بالرصاص و طار يجري حابط يحاول يلحق عليه ..
بعد ما تحل الرباط زاد فتح تاع رجليه و خرج يجري .. قابلوه زوج رجال .. بدم بارد تيرا عليهم طاحو ميتين فدقيقتهم ..
لمح طونوبيل .. طار يجري ليها و شاد يدو المجروحة و يتوجع ..
جا راح يطلع فطونوبيل حتا وقفو صوت هيثم من بعيد و هاز فوجهو الكابوس .. هدر معاه بصوت عالي ..
هيثم : ارجع و حط سلاحك ..
كان محبط راسو .. اما بعد ما كمل هدرتو .. طلع راسو بلعقل .. خزر فهيثم من بعيد و تبسم بسخرية على جنب و هدر ..
محمد : فاحلامك ..
و فجأة عقد حواجبو و وجه سلاحو لهيثم و تيييراااا ....
#ليلوشة
—————————————————
اوبالاتي 💜
تخللللطت .. فرايكم واش صرا ! هيثم تصاب ولا نن .. و محمد راح يهرب ولا يحكمو هيثم الا مقاسوش .. و حيزية واش معولة دير بعد ما راح تخرج مالقصر ..
حطوولي توقعاتكم و اسناوني نكتب لي موراها و نحطها
#ليلوشة