👑 حسناء الآغا 👑

|| الحلقة 121 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 121 Il
الهدوووء كان سيد الموقف بعد ما خرجو ثلث رصاصات .. ثلث رصاصات كانت كفيييلة باش تغير حياة شخصين ..
طاح محمد فلرض بعد ما ترخف جسمو ضربة وحدة .. الرصاصة اخترقت قلبو ديراكت كأنو لي تيراها قناص محترف .. اما لي تيراها كانت حيزية .. حيزية لي رصاصتها غلطت فطريق و قتلت محمد بالغلط فبلاصة حسناء ..
رصاصة جابر لي خرجت فالهوا بعد ما لحق يجري تيراها يحاول ينقص حدة الاجواء اما للاسف كان فات الوقت ..
رصاصة الثالثة لي خرجت من مسدس محمد جات فهيثم خلاتو يطيح فلرض من قوتها .. اما نطق اسم حسناء قبل ما تقيسو ..
هيثم : حسناااء ...
و طاح فلرض و هي تخزر فيه .. فهاديك اللحظة بالضبط يمكن حست جزء من واش كان يحس ..
حبط تجري ليه بسرعة .. رفدت راسو فوق حجرها و شداتو بيديها فيزوج لي كانو يرعشو ..
قلبها كان يدق بالقاوي .. تحس فيها راح يخرج من بلاصتها .. نفسهل متسارع علخر ..
تشوف فعينيه مغمضين .. تجمعو فعينيها دموع ..
خافت تحكي .. خافت تعيط باسمو و ميرجعلهاش.. حطت يدها فبلاصت الرصاصة .. اما استغربت .. مكاش دم ..
دققت النظر و لقات الرصاصة باينة و حاصلة فااذرع الواقي للرصاص لانو كان لابسو ..
طلعت نظرها لوجها و دموعها راح يطيحو خلاص .. لقاتو يخزر فيها و متبسم و عينيه ذبلانين علخر .. جبدها ليه بلعقل و هدر بهمس ..
هيثم : صرالي كثر من هاكا كي حرمتيني منك يا حسناء ...
تقعد فبلاصتو و جبدها اكثر و عنقها على قد ما يقدر .. لوكان لقا يخبيها عندو واحد ميشوفها .. و هي مكانتش من المعارضين و حاوطت يدها على ظهرو .. دخل راسو بين شعرها و رقبتها يروي عطشو بريحتها .. و هدر ببحة ..
هيثم : ريحتك عشق ..
و جبد عليها .. شدلها وجها بيديها لزوج و تاه فعينها .. نظرتها كانت تقتل .. عينيها كانو يقتلو .. لونهم و دموعهم و كلشي فيهم ميخلي فيه والو ..
هيثم : و حتا عينيك عشق ..
حمروا خدودها و تبسمت على جنب .. لي يشوفهم يقول ما هادو لي كانو فوسط رصاص قبل دقيقتين ..
قطعت عليهم سمر وقت لي جات تمشي بسرعة كيف البطريق عند حسناء ..
طلعت حسناء راسها لسمر و شافتها جاية .. ملامح الصدمة ترسموا على وجها .. كرشها كبرت و هي مكانتش حاضرة معاها .. زادت شافت اما مور سمر جاية ..
ناضت تجري ليهم .. وصلت عند سمر و عنقتها و دموعهم طاحو فيزوج .. سمر كانت تهدر برعشة ..
سمر : قريب رحتي و خليتيني كيما قمر ..
حسناء : راني هنا .. و يااا عمري كرشك كبرررت ...
زادت جات هدية و عنقتهم معا بعض ثنيناتهم و هي تبكي ..
منظرهم كان يفرح و يبكي فنفس الوقت .. بعد ما قعدو مدة و هوما هكاك .. دارو يخزرو لهيثم لي كان متوجه لعند جابر .. وصل ليه ..عدا يدو على لحيتو بتردد و هدر ..
هيثم : جيت نعتذر على لي صرا .. و نطلب صفحة جديدة ..
و مد يد المصافحة لجابر ..
جابر خزر فيه متبسم .. و فتح يدييه و عنقو و حتا هيثم زاد عنقو ... و تعانقوا الاغوات و كاان العناااق اعلان عن نهاية الثأر و الخلاف بين العشيرتين ....
#ليلوشة
—————————————————
اوبالاتي 💙
فرايكم حيزية واش راح يصرالها دوك بعد ما تخلصنا من محمد .. و هيثم و حسنااااء راااح تبدا رومنسيتهم ولا مزااال
جمجموووو و اسناوني نكتب الحلقة لي موراها و نجي و مرسي على 1k جام فالحلقة الاولى قد ما نشكركم منوفييش ولله نتوما اغلى ما املك
#ليلوشة