👑 حسناء الآغا 👑

|| الحلقة 8 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 8 Il
الطبيب : لاسف خسرنا لمريض .. صرالو نزيف حاد و مقدرناش نوقفوه .. عظم الله اجركم ..
كلهم وقفو مصدومين .. بين لحظة و لحظة فقدو معاد .. و هوما هكاك سمعو خبطة فلرض ..
زهرة داخت .. دار ليها هيثم يجري ...
هيثم : يما ..
لحقو الطبيب و جاو موراه زوج ممرضين .. هزوها و رجعوها لغرفتها و حاولوا يفطنوها ..
خرج هيثم و وقف عند باب المستشفى .. قد ما حاول يتماسك و ميطيحوش دموعو اما غلبوه .. لثااني مرة يحس بهاد الشعور .. لثاني مرة يخسر شخص عزيز عليه ..
مسح دموعو و هدر ..
هيثم : ندمك عليها يا جابر .. رجعت مسألة ثأر دوك ثأرين .. راح نتواجهو ..
تعدا هاداك النهار بين الجنازة فدار شعابني و بين تقرير الحكم فدار آل ضافر .. كل واحد مهموم فحياتو ..
حسناء لحد الآن مفطنتش و مخلاو حتا واحد يروح ليها و حطو حراس عند الاسطبل .. هيثم دفن خوه بيديه و كل ما يرمي تراب على قبرو يتوعد فجابر و بلي راح ينتقم منو اشد انتقام .. لثاني مرة عاش نفس التجربة بسبب عشيرة ال ضافر ..
جابر سمع بلي معاد مات .. و عرف بلي الصراع بيناتهم اشتد اكثر و هيثم مستحيل يسمحلو و يعرفو مليح مليح ..
لحق ليل و كلهم كانو راقدين .. هيثم كان قاعد فغرفة المكتب .. فتح القفالي لولين تاع شوميز تاعو .. مكسل فوق الفوتاي هاز فيدو سيجارة و يتكيف .. و هو هكاك جات بين عينيه حسناء ..
غاضاتو .. قلبو وجعو عليها مهما كان هي مرا و ماعندها ما دخلها فخدمة الرجال .. تفكر ملامحها .. تفكر دمعتها لي شافها على خدها .. نفض افكارو بسرعة و هدر معا روحو ..
هيثم : واش راك تخمم يا ر** .. بسبتها خوك مات .. و اكيد هي راح يقتلوها ..
ضحك على جنب و هدر ..
هيثم : ههه سلمان يعبد فالعادات و تقاليد .. راهو قتلها من قبل اكيد يقتل هادي تان بلا ميخمم ..
اما عند جابر كان فالبالكون تاع بيتو كالعادة .. واقف و عينيه مركزين فالاسطبل .. ختو راهي تما .. غايضاتو بزاااف .. كل ما يتفكر يتفكر واش صرا فالماضي يزيد يخاف عليها اكثر ...
هدر بينو و بين روحو ..
جابر : سمحيلي حسناء حاولت نخفف عليك اما الحكم تقرر .. حكمك نفس حكم لي قبلك .. راح يقتلوك يا حسناء .. علاه عملتي فينا هاكا علاه ..
و هو هكاك خرجت ليه سمر ..
سمر : جابر راهو لبررد ادخل نرقدو ..
جابر : راني جاي ..
و دخل لغرفتو و حط راسو يحاول يرقد حتا داه نوم ..
لحق نهار جديد .. نهار احداثو ناار .. نهار يتحدد فيه مصير حسناء ..
قام جابر من بلاصتو .. شاف سمر قدامو راقدة .. حط يدو عليها ينوضها ..
جابر : سمر نوضي نسحقك ..
سمر : اممم راني نعسانة خليني نزيد شوية ..
جابر : سمر الموضوع مهم ..
ناضت تتململ و هدرت معاه بتبسيمة على وجها ..
سمر : اممم واش كاين ..
جابر : حسناء ..
سمر : وشبيها حسناء .. ايه صح لبارح مبانتش كامل وين راهي كل ما نقول نسقسيك ننسا ..
جابر : راح يقتلوها ..
سمر مصدووووومة : كيييييفاه ..
جابر : وسخت شرف العائلة و بابا سمع بيها و قرر يقتلها ..
تهدر و هي مصدومة ..
سمر : ن نفس ح حكاية قم..
مخلاهاش تكمل هدرتها و هدر بالعياط ..
جابر : متزيديش تجبدي اسمها يااااا سمر ..
سمر : وين راهي حسناء خليني نروح ليها ..
جابر : ممنوع مخلاوناش ..
غرغرو عينها بالدموع ..
سمر : تعيش جابر اخر مرة ..
غاضاتو .. ناض و قاللها تبعيني و داها لعندها للاسطبل ..
عند قصر شعابني .. كان واقف فساحة قصرو .. الحزن مسيطر على مكان .. حتا شاف واحد من رجالو جاي ليه ..
راجل : آغا صباح لخير ..
هيثم : صباح لخير ..
راجل : آغا اسمحلي على سؤالي اما ناس راهم يسقسو حبيت نسقسيك ..
هيثم : خير ..
راجل : آغا عرسك يبقا يوم الجمعة ولا نأجلوه بعد ما مات خوك ....
#ليلوشة
—————————————————
اوبالاتي 🔥
حلقة هااادي حسيت فيها بزاااف حماس و بزاااف اسرار .. زعما وشمن اسم كانت راح تنطقو سمر و مخلاهاش جابر .. و هيثم واش يقصد بأنو عاش نفس لحكاية مرتييين ؟؟ و اكدووولي على اخر جملة فالحلقة يا زريعتكم ههه
خلولي توقعاتكم طواااال عراض .. و خلو كومنتار هنا غير نزيد نحط نجمجملكم على تعليقاتكم
#ليلوشة