👑 حسناء الآغا 👑

|| الحلقة 32 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 32 Il
هيثم : شكون حيزية ..
فاق على روحو و تذكرها و زاد كمل كلامو بسرعة قبل ما يصراو مشاكل من اول اتصال بينهم ..
هيثم : قصدي ايه عرفتك ..
ضحكتلو الضحكة خفيفة و هدرت .. ( الضحكة الصفرة قتشااااي كي دايرة بصوت طيموشة هههه .. )
حيزية : وشراك لاباس ..
هيثم : حمدلله و نتي ..
حيزية : بخير حمدلله .. عيطتلك نسقسي عليك بما انو بقا نهار لعرسنا قلت نسقسب عليك و فنفس الوقت نعرضك للعشا غدوة كيما تعرف العادات .. لازم تحضرو ..
رما يدو للكرافات تاعو فتحها .. حسها خنقاتو .. عدا يدو على شعرو بسرعة و هدر ..
هيثم : تعرفي نسيتو كامل .. مزية فكرتيني ..
حيزية : مالا مزية عيطتلك .. ( قتشاي كي دايرة للمرة الثانية ههههه .. )
هيثم : ان شاء الله نحاول نحضر ..
حيزية : ان شاء الله متشوقة نشوفك .. ( تحمست وجه لخرا هههه ) ..
هيثم : احمم ايه ..
ملقاش واش يهدر معاها .. اصلا اتصالها مكانش يتوقعو و مكانش يخمم فيها .. تخمامو كامل كان عند الجميلة تاعو ..
حيزية : مالا انا نخليك اتهلا فروحك و سلملي على ماما زهرة..
هيثم : يبلغ يسلمك ..
و قص عليها الاتصال بلا ميزيد حتا كلمة معاها .. حط تيليفون بقوة و هدر معا روحو ..
هيثم : كيفاه نتهنا مالمشاكل انا دوك .. علاه دخلتي لحياتي يا حسناء علاه ..
رجع قعد فالكرسي يخمم كيفاه يحكم عشيرة حيزية ماليد لي توجعهم لانو راح تكون اهانة ليهم يتزوج على بنتهم يوم عرسهم و اكيد مراحش يسكتولو عليها ..
نروحو لعند حسناء .. كانت قاعدة فوق سريرها .. تخزر للجرحة لي فيدها .. تذكرت الجرحة هادي جاتها وقت لي طاحت مالحصان هي و هيثم .. تبسمت تبسيمة خفيفة تلقائيا .. اما بسرعة محاتها .. حطت يدها على خدها فيزوج و هدرت معا روحها ..
حسناء : يا جدك يا حسناء وشبيك هبلتي .. فيمن راكي تخمي فيه .. و علاه ضحكتي مكاين حتا حاجة تضحك بهلولة علاجالو قريب متي .. نورمالمون ميدخلش روحو .. مزال مرجعتيش مرت الآغا باش يحكم فيك ..
رجعت تبسمت تبسيمة خفيفة و هدرت بلعقل ..
حسناء : امم تخرج عليا مرت الآغا .. ( هبلت ههههه ) ..
و هي هكاك تفتح الباب تاع غرفتها .. طلعت راسها للباب تشوف شكون لي دخل بلا اذن لقاتها يماها .. ناضت من فراشها و وقفت تسنا فيها تجي تضربها كيما ضربوها الباقي .. تبسمت باستهزاء و خزرت فيها بانكسار ..
بقات يماها تقرب .. و كل ما تقرب حسناء قلبها يزيد يدق .. وصلت ليها و رفدت يدها .. حسناء غمضة عينها بالقاوي .. حتا تحس فعبد عنقها ..
حلت عينها بلعقل لقات يماها عنقتها .. تصدمت .. يماها كيفا باباها مهووسين بالعادات كيفاه حتا مضربتهاش ..
هدرت هدية و هي تعدي فيدها على ظهر بنتها ..
هدية : مبروك عليك يا بنتي كبرتي و شفتك عروسة .. ربي يهنيك و يسعدك و يبعتلك كل خير ..
بعدت عليها شوية و خزرت فيها مستغربة ..
حسناء : و راكي قابلة ماما ..
هدية : ايه يا بنتي مابقاتليش هدرت فوق هدرت باباك .. نرضاو بالمكتوب ربي سبحانو ..
حسناء : سبحانو ..
هدية : لازم تجهزي روحك بقا نهار لعرسك .. دوك قبل ما ترقدي جهزي شوية اغراض و غدوة كملي لباقي ..
حسناء : ان شاء الله ماما ..
خرجت هدية و خلاتها هكاك واقفة مصدومة .. اما بعد مدة فاقت على روحها و راحت تجهز واش تقدر تجهزو ليوم و غدوة تكمل الباقي ..
فبلاصة وحدوخرا .. قاعد بين الصخرات لي كانو السبب فحكايتنا .. هاز فيدو قرعة شراب .. و يخزر للدم لي نشف على لرض .. دم معاد اما هو حاط فبالو دم عذرية حسناء.. عينيه حمورة و دموع يسيلو منها .. هدر و هو يزير على كل كلمة ..
اسماعيل : انا لي نقتلك .. انا ..
جات بين عينيه منظر حسناء و هي تحت معاد .. زاد تفكر هدرت صالح وقت قال جينا طالبين يد بنتكم لوليدنا هيثم .. تعصب اكثر ..
زير على قبضة يدو .. و حكم القرعة و خبطها على الحيط و ناض مبلاصتو يمشي و يتمايل و يعيط ..
اسماعيل : منخليكش تديهالييييي ، مستحييييل تديهالي .. حسناء ديالي .. و تبقا ديالي .. نقتلللللك ....
#ليلوشة
—————————————————
🤍اوبالاتي
اسماعيل تحمس شوية زيادة عن اللزوم لالا هههههه .. راح يصراو مشاكل كحولة نهار العرس .. تعرفوني حاجة ما نجوزها بالساهل ..
حيزية اللسقة واش راح دير كي تسمع بحسناء .. و تقولو زعما تسمع بيها من قبل ولا حتا نهار العرس .. و اسماعيل واش راح يدير .. زعما يتفاهم معاها و كاش ما يديرو لحسناء و هيثم .. خلولي توقعاتكم طوااال عراض ..
و خلو تعليق غير نحط نجمجملكم
#ليلوشة