👑 حسناء الآغا 👑

|| الحلقة 42 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 42 Il
لحق نهاااار جديد .. نهار العرس .. كانت راقدة فسابع نومة .. كانت الساعة جوايه التسعة تاع صباح ..
تقلبت للحيهة الثانية و عنقت لمخدة .. و هي هكاك دخلت سمر تعيط ..
سمر : حسناااااااااااء .. يااااا حسنااااء نوووضي لي يشوف يقول ليوم عرسي ماشي عرسك ..
حسناء : امم خلوه لغدوة عندي شحال مرقدتش هاكا ..
سمر : على حسابك وقيل .. و بعد معاناة طويلة .. ناضت حسناء و دخلت للدوش ديراكت ...
نروحو لعشيرة شعابني .. كانت الدنيا قايمة قاعدة .. الساحة كانت مزينة بزينة العرس .. على طول الدخلة كاين ورود .. و فالوسط كاين بساط طويييل يمشو عليه العرسان .. يوصل حتا للحديقة تاع القصر لي كانت تفتق .. غالب عليها اللون الوردي الفاتح و الابيض .. طوابل بزاااف محطوطين تما .. ورود فكل بلاصة .. و مقابل كل هادوك طوابل المساحة المخصصة للعرسان وين يقعدو . كان كاين كرسي ملكي كبييير و سامبل محطوط تما .. و الحيط لي موراه مغطي كامل بالورد ..
زهرة : اسمع وليدي زيد حط شوية ورد لهيك الطابلة هاديك راهي فارغة ..
الخادم : حاضر مادام ..
و هي هكاك جات عندها مرت صالح جهيدة ..
جهيدة : اووو ماشاء الله راكي تباني نتي لعروسة .. نوصفلكم زهرة .. كانت لابسة بدرون باج يهبل .. فيه دونتال و فوق دونتال موزعين فيه حجرات يلمعو .. حاطة ماكياج سامبل على قد عمرها .. و ماشطة شعرها كواف صغيرة .. بالحق كانت تهبل ..
زهرة : يعطيك الصحة جهيدة .. اما هيثم وينو ..
جهيدة : ولله يا اختي مزال محبطش .. نظن مزالو يجهز فروحو ..
زهرة : خلاص معليش خليه نروحو حنا نكملو شغلنا ..
راحو يكملو شغلهم .. و يكملو التحضيرات لانو اهل حيزية يجو بكري بحكم انهم يسكنو بعيد .. يجو يريحو شوية و بعدها يبدا العرس ..
نروحو عند هيثم لي كان فغرفتو يربط فالكرافاطة تاعو .. شعرو كان يلمع و ممشوط مليح .. لحيتو كانت مطراسيا .. الكوستيم تاعو جاية فالازرق الغامق .. كان كتلة من الرجولة و الوهرة .. كمل عدلها .. هز البارفان تاعو و حط منو .. و اكتمل جمال القمر ههههه ..
حبط فالدروج .. غير شافتو يماه و نسا عمومو بداو الزغاريت ..
زهرة : بسم الله ماشاء الله على وليدي ..
هيثم : راكي تهبلي يما وقيل نتي لعروسة هههه .. و ضحك معاها بالصوت .. ( قليييع قلبي ، ايما قلبي ) ..
سلم عليهم كلهم .. و بعدها هدر ..
هيثم : يما انا نروح نوجد طونوبيل .. مطولوش باش نروحو و نرجعو تمتم ..
هزتلو براسها بمعنى ايه و راحت تكمل شغلها و هو خرج للساحة لقاها مزينة .. عجباتو ..
و هو واقف تما جا ليه عصام ..
عصام : صباح الخير آغا ..
هيثم : صباح الخير عصام ..
عصام : راك منور ليوم آغا و راك فرحان هههه يا رب يرزقني فرحتك ..
تبسم تبسيمة خفيفة و دخل يدو فجيبو .. جات بين عينيه حسناء و هي داخلة لقصرهم .. وساعت تبسيمتو .. حاليا قاعد يخمم غير فيها .. حيزية نساها كامل ..
عصام : آغا راني جبت الطونوبيلات .. و دوك راح نزينوهم اما ارواح نتا خير زينة ..
هيثم : دوك نجي نعاونكم ..
عصام : حاشة آغا خلي حنا نخدمو خدمتنا ..
هيثم : لالا معليش ..
توجه هيثم للسيارات لي جابوهم .. كانو يهبلو ( منعرفش اسموات طونوبيلات شابين اتخايلو لي يعجبوكم هههه ) .. و بداو خدمتهم ..
نروحو عند حيزية لي كانت هي تان وجدت .. قلبها طاير بالسعادة .. من لي ناضت و هي تتبسم .. اخيرا راح ترجع مرت الآغا .. صحيح انها تحب هيثم اما تحب التملك اكثر من حبها لهيثم .. جات الحفافة مشطتلها و ماكياتلها .. خلاتلها شعرها شوية مطلوق و اوندولي و شوية طماتو .. حطتلها زينة صغيرة فشعرها .. الصراحة جاتها شابة .. معا هي خمرية و عينيها كحولة .. حطتلها ماكياج غامق .. و بعد ما كملت معا الحفافة راحت تلبس .. لبست غوب بلونش ماشي برانساس عكس لاغوب بلونش تاع حسناء ..
لاغوب بلونش تاع حيزية كانت كأي روب عادية مطروزة بشوية حجرات مالفوق .. لانو معندهاش ذوق شباب بزاف فاللبسة .. حطت لفوال تاعها على شعرها .. و بقات دور و تتحكم فلي قاعدين يخدمو و تعيط عليهم لانو كانو مضغوطين و هي قاعدة تزيد عليهم ..
و هي هكاك جات امها ..
سليمة : تبارك الله على بنيتي ..
حيزية : راني نهبل صح هههههه ليوم طرف عقل منخليه فهيثم .. ( لا ياا حليش .. لا تفعلها يا حليش .. من اين لك هذة الثقة يا حلييش .. ) ...
#ليلوشة
—————————————————
اوبالاتي 💙
منطولش عليكم .. ادخلو هنا بهدلو حيزية برك و اجروووو للحلقة لي موراها راح نوصف بالتفصيل حسناء كيفاه توجد رووحها 🥺 تخرج زلة الزلاااات علابالكم
#ليلوشة