👑 حسناء الآغا 👑

|| الحلقة 94 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 94 Il
جملة جابر خلاتو يتوقف ضربة وحدة فبلاصتو .. يمكن بسبتها الرعشة سرات فبدنو .. سرح بذاكرتو للنهار لي عرف فيه انو جابر لي قتل خوه ..
~~ فلاش باك ~~
بعد ما قص جابر الاتصال معا هيثم و عرف بلي سعيد خو هيثم تان تقتل .. راح ديراكت لباباه ..
رجع عيط فوجهو عيطة اقوى من لي قبلها بصوت غالبة عليه الرجفة .. خايف يسمع جوابو ..
جابر : قتلت سعيد شعابني !!
خزر فيه سلمان ببرودة و هدر ..
سلمان : و شكون قالك بلي هو لي قتلتو ..
حس كأنو سطل ما بارد تكب عليه .. رجع لون وجهو صفررر .. يعني باباه قتل خوه صاحبو .. صاحبو و عشيرو و اقرب من الاخ .. قاعد يحس فجسمو ثقيل عليه .. حكماتو فشلة لدرجة انو كلمة مقدرش ينطقها ..
قعد مدة معتبرة و هو هكاك .. و سلمان يخزر فيه ببرودة و سمر موراه معنقة قمر و تبكي و تهدر معاها دخلت فهيستيرية كيفاش متدخلش و صحبتها ميتة بين يدها .. دمها كلو على حوايجها ..
و حسناء معنقة هدية لي كانت غايبة عن الوعي .. يماها فيدها و تخزر لختها مقتولة .. الشي لي خلاها تتأزم نفسيا و تتعقد .. قليل وين تخرج و حتا البشر لي تتلاقاهم معدودين على الاصابع و متوثق فحتا حد ..
دار جابر مدمر .. بقا يمشي و هايم ماشي عارف وين راح يروح ..
لمدة ساعة كاملة و هو يمشي حتا لقا روحو قدام قصر شعابني .. يشوف فيهم من بعيد .. الدنيا قايمة قاعدة .. لبكا تاع النسا يتسمع مالبعيد .. الغاشي كحل .. من بينهم كامل ميز هيثم .. لي كانو دموعو على خدو .. يعزو فيه ..
طاحو دموعو شي من وفاة ختو و شي من موت سعيد لي يشهدو عليه انو مش انسان يمكن يكون ملاك و شي من صاحبو ..
خذا نفس عميق .. و هدر بينو و بين روحو ..
جابر : مضطر سامحني هيثم انا يقعد بابا و لازم ندافع عليه ..
تمشى متوجه لعند هيثم .. وقت هيثم شافو وقف يسنا يوصل عندو .. كان حاب يهدر معاه لانو هو الوحيد لي يفهمو و يتعامل معاه على طبيعتو و يسقط قناع الآغا معاه ..
غير وصل جابر عند هيثم هدر بدون مقدمات و عينيه مليانين دموع .. و كاان سكات كأنو حسو راح يهدر حاجة مهمة فاللحظة لي هدر فيها هدووء كبير لدرجة انو كل الحضور لي تما سمعو واش قال..
جابر : انا قتلت سعيد ..
بقا هيثم شارد فيه .. كأنو قاعد يحاول يستوعب لي سمعو ..
فجأة تبسم على جنب .. و من تبسيمة رجعت ضحكة و من ضحكة رجعت هيستيرية .. خلا جابر يدخل فبعضاه عارف غضب هيثم سيء و بزااااااف .. هدر بين ضحكتو ..
هيثم : راك تتمن** بيا ر** ..
و ترسمو ملامح الجدية و الغضب على وجهو ضربة وحدة .. شدو بقوة مالكول تاع شوميز و عيط فوجهو خلى حتا الحضور يخافو ..
هيثم : اهددددرررر رررر** ..
جابر : ايه كي سمعت انا قتلتو ..
ملحقش يكمل هدرتو جاتو دبزة للوجه .. طاح فلرض ملحقش ينوض جاتو دبزة ثانية .. و بقا هكاك يضرب فيه ولا واحد تجرأ يدخل بيناتهم ..
كانت كل ضربة توجعو اكثر من لي قبلها اما وجيعة قلبو اكبر .. خسر ختو و صاحبو فنفس النهار و برد قلبو من جيهة باباه .. يمكن اكثر شخص تضرر من لي عملو سلمان هو جابر ..
بعدها بعد عليه .. جبد سلاحو و وجهو ليه .. فتح الامان و رايح يقوص عليه .. طاحت عينو فعين جابر .. نضرتو كانت نظرة ضعف .. نظرة ظلم .. نظرة استنجااد .. النظرة لي خلات هيثم ميقتلوش و يكلع سلاحو لسما .. فرغ سلاحو فسما خلى كل لي تما يحبطو على ركبهم خايفين ..
عيط باعلى صوتو بدرجة انو صدى صوتو قاعد يتعاود ..
هيثم : مليوووووم اكبر عدو لعشيرة شعابني هما عشيرة آل ضافر ..
و حبط راسو و خزر بإحتقار فجابر لي كان كلو مدمدم .. و رجع هدر و هو يخزر فيه ..
هيثم : دم خويا ميروحش هكاك و صدقني ثأر الدم هادا مراحش يتغلق حتا نكمل سلالتكم واحد بواحد ....
#ليلوشة
—————————————————
اوبالاتي 💜
شفتو جابر شحال تعذب مسكين .. ميستهلش نزيد نعذبو .. المهم حطووولي توقعاتكم و واش جا فبالكم و اجرو للخلقة لي موراها ...
#ليلوشة