👑 حسناء الآغا 👑

|| الحلقة 75 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 75 Il
حسناء وقت سمعت جملة الطبيب تصدمت .. حست نفسها تقطع .. تقعدت فبلاصتها تخزر فيه مصدومة ..
هيثم ممانش اقل منها .. رجع وجهو صفر .. لي كان خايف منها صرات .. هي فبطنها روح .. جنين منها و من خوه .. راح يكون كأنو حيط كبير بينهم هوما لثنين ..
بقا يخزر فطبيب لمدة طويلة .. جملة " مبروك المدام حامل " قاعد يسمع فيها بسرعة ..
كانو الوقت حبس فهاديك اللحظة .. تمنى يكون تخيل فقط .. اما للاسف رجعو للواقع المر حيزية وقت شداتو من كتفو و هدرت ..
حيزية : خلالكم معاد قطعة منو ربي يرحمو ..
و دارت عند حسناء متبسمة و هدرت ..
حيزية : مبروك يتربى فعزك لعاقبة ليا انا و هيثم .. و خزرت فيه و تبسمت..
ركز عينيه فحسنلء لي كانت تهرب بعينها .. تعصر فمخها تحاول تتفكر لي صرالها معا معاد .. اغتصبها لدرجة انها حملت منو ..
حست باحساس غريب .. لو كانت روح فكرشها اكيد كانت راح تحس بيها .. حتا اعراض الحمل محستش بيهم كيما سمر ..
عقدت حواجبها و هدرت معا طبيب ..
حسناء : ممكن ديرولي الايكو .. ( قصدها حبت تشوف البيبي فليكوغرافي ) ..
نطق الطبيب و هو متبسم ..
طبيب : اكيد .. راح نروح لمكتبي و نرجع لحظة ..
و توجه خارج مالغرفة .. و في طريقو طاحت عينو فعين حسناء و تبسموا معا بعض .. تبسيمة غريبة نوعا ما ( اخرجوا كونان الذي بداخلكم ) ..
قدم هيثم لعند حسناء بلعقل .. استغلت حيزية الوضع و رجعت خرجت بلا ماتهدر وين راحت ..
خزر فيها بنظرة انكسار لدرجة انو الدمعة كانت راح طيحلو .. اما تمتم فاق على روحو .. دور وجهو شوية مسحها و عدا يدو على وجهو بهدوء و خذا نفس طويييل .. رسم ابتسامة مصطنعة على وجهو و رجع دار ليها هدر ..
هيثم : حسناء ..
طلعت راسها خزرت فيه .. سكت شوية .. قعد يخزر فيها و رجع هدر ..
هيثم : نوعدك نتي و وليد خويا راكم فحمايتي .. و راح نعاملك كختي و اكثر .. مهما كان تبقاي اختيار المرحوم ..
كل كلمة يهدرها تنغرس فقلبو كالموس .. حكماتو غصة و هو يهدر لدرجة انو كلامو مقدرش يكملو و حبس فالنص ..
كان داير باش يخرج اما وقفو صوتها .. قعد عاطيها بظهر و يسمع فيها ..
حسناء: مظلومة ولله ..
و سكتت .. مقدرش يتحمل اكثر .. غلق باب الغرفة و خرج و خلاها غارقة فتخمامها احساس كبير قاعد يقوللها كاين إن فالموضوع ...
بعد ما تسللت خارج الغرفة .. خزرت يمين و شمال ملقات حتا واحد .. تبسمت بشر و توجهت لغرفة الطبيب .. دخلت بسرعة و غلقت موراها الباب و دارت تبسمت معاه بشر ..
حيزية : عجبتني ...
#ليلوشة
—————————————————
اوبالاتي 💜
ياااك فهمتووووو خطة حيزية .. لي مفهمتش بالمارطو للراس ههههه
دوووكا مدووولي توقعاااتكم لواش راهو جاي من جميع النواحي احممم حيزية راح تشكروها على عملتها علابالكم هههه
نروح نكتب لي نوراها و نجي
#ليلوشة