👑 حسناء الآغا 👑

|| الحلقة 34 ||

🔱 حسناء الآغا 🔱 بقلمي ليلوشة 🔱
🔸️ حصريا على كرونيكات اوبال 🔸️
—————————————————
lI الحلقة 34 Il
طلع نهار جديد .. بأحداث جدد .. نهار قبل عرس الآغا .. نعار قبل ما تتغير حياتو و حياة حسناء و حياة حيزية .. يا ترى كيفاه راح يكون لقاء الثلاثي ..
كانت راقدة فوق سريرها .. شعرها داخل فبعضاه .. خصلات منو طايحين على وجها لي شمس كانت ضاربة فيه .. معنقة مخدتها بين يدها ..حتا تفتح الباب ..
هدية : حسناء نوضي ..
اما ولا رد .. بقات راقدة كأنو مسمعت شي ..
هدية : يا حسناء نوضي .. ليوم عرسك ..
فتحت عينها على ضربة و تقعدت في بلاصة مخلوعة و هدرت ..
حسناء : علاه ليوم ..
هدية : لالا ماشي ليوم اما نتي متنوضيش لوكان منخلعكش ..
حسناء : حرام عليك يا ماما راني ميتة بالنعاس ..
هدية : نوضي نوضي .. كي تروحي لدار راجلك ارقدي شحال تحبي ..
حسناء : دوك ولا راجلي .. هاداك الراجل لي عندي .. ( ابزقو عليها بالوحدة من فضلكم هههه ) ..
ناضت حسناء من فراشها .. نفضاتو و عدلاتو و دخلت للدوش .. غسلت مشطت شعرها بدلت حوايجها و حبطت للصالون لقاتو مقلب بالحوايج ..
حسناء : ماما وشنو هادا ..
هدية : حوايج لي تديهم معاك .. و هاديك لاغوب بلونش ..
و اشرتلها بيدها للزاوية .. خزرت حسناء .. و خلات فمها مفتوح .. بصراحة تفتق .. غوب بلونس برانسس .. يديها بالدنتال .. مرصعة باللؤلؤ لي قاعد يلمع .. صدرها عريان شوية اما باهي .. ظهرها عريان اكثر .. محطوط قدامها تاج يهبل .. فيها حجرات لونهم غوز كلاغ ..
تعباو عينها بالدموع و هي تشوف فيهم .. تمنات لوكان عاشت هاد الشي بفرحة .. تمنات لوكان راح تتزوج بشخص اختارو قلبها ..
مسحت دمعة كانت راح طيح و دارت هدرت معا يماها ..
حسناء : يهبلو .. يعيطك الصحة ..
و راحت باستها .. حبطت سمر و وراولها كلش و هبلت عليهم هي تان .. و كملو يجهزو معا بعض و حسناء نسات همها بالقصرة و الحركة فالدار ..
نروحو عند هيثم لي فاق بكري .. لبس حوايج الصبور و خرج يجري قبل ما ينوض حتا واحد .. راح ادللغابة و قاعد يجري و يخمم كيفاه راح يكون يوم غدوة .. و فكل مرة يحس بالضعف ولا بعصب بتذكر عينها و نفسها فرقبتو يهدا .. رجعت مصدر امان بالنسبة ليه اما هو ماشي فايق و حتا هو رجع مصدر امان ليها و هي ماشي فايق ولا واحد فيهم استسلم لمشاعرو .. فيزوج قاعدين يحاربوا قلبهم .. خاصة هيثم ..
تعدات عليه ساعة و هو يجري .. رجع للقصر .. لقاهم كلهم فاقو ..
دخل و توجه لغرفتو .. عمل دوش و لبس حوايجو و هبط يفطر .. كانو كلهم مجتمعين على طابلة .. بنات عمو .. مرت عمو .. عمو كريم .. و يماه ..
قعد معاهم و هدر ..
هيثم : بصحتكم ..
بداو يفطرو حتا هدرت زهرو و هي تخزر فهيثم.. خايفة منو انو يبطل ..
زهرة : ياك ليوم تجي هيثم ..
هيثم : ايه ان شاء الله ..
زهرة : مالا كي تكمل تفطر جهز حوايجك لي تلبسهم.. و الا ملقيتش قولي نطلبلك جدد ..
هيثم : ان شاء الله يما .. اما عمي صالح وينو ..
زهرة : قال انو رايح لعشيرة حيزية .. عندو هدرة معاهم ..
للحظة قلبو دق بقوة .. خاف .. اما مخافش على روحو قد ما خاف على حسناء انو يتأمرو عليها و يقتلوها ..
حاول ما يبين والو .. كمل كلا بسرعة و ناض يجري ..
هيثم : بصحتكم..
زهرة : وليدي ما كليت والو ..
هيثم : شبعت يما ..
خرج يجري للساحة .. هز التيليفون و عيط لعمو .. ريبوندا عليه ..
صالح : الو ..
هيثم : عمي متقوليش قلتلهم الله يسترك ..
صالح : ......
#ليلوشة
—————————————————
اوبالاتي 💙
فرايكم زعما صالح خبرهم .. كيفاه راح تكون ردة فعلهم .. و حسناء كيفاه راح دير كي تعرف بحيزية هي تان .. و اسماعيل واش راح يدير بضبط .. خلولي توقعاتكم طوااال علاض و خلو تعليق هنا غير نزيد نحط نجمجملكم عليه
#ليلوشة